ევროპალიგა. 1/2 ფინალი: 'არსენალი' ფრეს დასჯერდა,-'მარსელი' ფავორიტია. ვრცველი მიმოხილვა [VIDEO]

არსენალი-ატლეტიკო 1:1
გოლები: 1:0 ლაკაზეტი (61), 1:1 გრიზმანი (82)
გაძევება: ვრსალიკო (10. ატლეტიკო)

მარსელი-ზალცბურგი 2:0
გოლები: 1:0 ტოვენი (15), 2:0 ნ"ჟი (63)

ევროპალიგის ნახევარფინალური სერიის პირველ მატჩში "მარსელმა" ავსტრიული "ზალცბურგი" მიიღო და 2:0 დაამარცხა.

მასპინძლებმა ჩვეული, ქარიშხლისებური ფეხბურთი ვერ ითამაშეს, მაგრამ საგოლე მომენტები ყაირათიანად გამოიყენეს და ეს იყო მთავარი. შესანიშნავი გახლდათ ფრანგთა ლიდერი დიმიტრი პაიე. მსოფლიოს ჩემპიონატი ახლოვდება და ევროპის გასული ჩემპიონატის გმირი დიდებულ ფორმაში შედის...

შეხვედრის დასაწყისში "მარსელი" პაიეს პასით ფლორან ტოვენმა დააწინაურა, ვინც მართლაც რომ ფენიქსივით აღდგა "ნიუკასლში" გატარებული კოშმარული პერიოდის შემდეგ.

აღსანიშნავია, რომ ტოვენმა ხელით გაიტანა, თუმცა იმ ეპიზოდში შოტლანდიელმა არბიტრმა უილიამ ქოლამმა თამაშის გაგრძელება ბრძანა...

"მარსელის" მწვრთნელმა რუდი გარსიამ შეცვლა გამოიცნო, მინდორზე კამერუნელი კლინტონ ნ"ჟი შეუშვა, ვინც სამიოდ წუთში პაიესთან გაითამაშა ბურთი და ანგარიში ძლიერი დარტყმით გააორმაგა.

"არსენალს" ჩემპიონთა ლიგაში მოხვედრის შანსი შეუმცირდა. არსენ ვენგერის გუნდი შინ "ატლეტიკოს" დაუზავდა და საპასუხო მატჩის წინ ფავორიტი, რასაკვირველია, დიეგო სიმეონეს კრებულია.

არადა, თითქმის მთელი შეხვედრის განმავლობაში "ატლეტიკო" კაცნაკლული თამაშობდა. ხორვატმა მცველმა შიმე ვრსალკომ პირველ ათ წუთში (!) ორი ყვითელი ბარათის მიღება მოასწრო და გასახდელის გზას გაუდგა...

"არსენალი" ალექსანდრ ლაკაზეტის გოლით დაწინაურდა, ანტუან გრიზმანმა კი ლონდონელთა დაცვის ჩვეული ჩაფლავებით ისარგებლა და ანგარიში გაათანაბრა. ისიც ვთქვათ, რომ შესანიშნავად ითამაშა "ატლეტიკოს" მეკარე იან ობლაკმა.

ყოველდღიური სპორტული გაზეთი "ლელო"
990
მკითხველის კომენტარები / 0 /
მსგავსი ამბები
რუბრიკის სხვა სიახლეები
;