ევროპალიგა. II ეტაპი: 'მარიბორი' VS 'ჩიხურა': ურთულესი, მაგრამ შესაძლებელი

2 აგვისტო. მარიბორი. 22:15 (პირველი მატჩი 0:0)

დღეს საჩხერის "ჩიხურა" ევროპალიგის მეორე საკვალიფიკაციო ეტაპის საპასუხო შეხვედრაში სლოვენიური საკლუბო ფეხბურთის გრანდს, "მარიბორს" ესტუმრება. თბილისური მატჩი 0:0 დასრულდა და, აქედან გამომდინარე, ფავორიტი მეტოქეა.

"მარიბორამდე", "ჩიხურამ" თავისზე გაცილებით მდიდარ და ამბიციურ "ბეითარს" მოუგო. ისტორია გვასწავლის, რომ საჩხერელებს არასოდეს შეურცხვენიათ თავი ევროთასებზე და, რატომღაც, გვჯერა, რომ ამჯერადაც ასე იქნება.

"მარიბორის" დამარცხებას სოსო ფრუიძის გაწვრთნილი გუნდისგან აპრიორს ვერ მოვითხოვთ და ეს ჩვენი მხრიდან არასწორი იქნება. სლოვენიური კლუბი ყველა საფეხბურთო კომპონენტითა და ბიუჯეტით მაღლა დგას "ჩიხურაზე", მაგრამ ამ უკანასკნელს არაერთხელ დაუმტკიცებია, რომ ყველაფერ ამას შეიძლება აჯობო

ძალიან მცოდნე მწვრთნელით, ბოლომდე ბრძოლით, უკიდურესი თავდადებით...
"მარიბორი" სასწაული გუნდი ნამდვილად არ არის, არც ზეტექნიკური ფეხბურთელები ჰყავს, მაგრამ ფიზიკური მომზადებით ბარე ორ საშუალოევროპულ გუნდს გაეჯიბრება. ჩვენთვის საკითხი ასე დგას: გავუძლებთ ფიზიკურად მეტოქეს და არ დავეჯაბნებით ორთაბრძოლებში? მაშინ ჩვენი შანსი ერთიორად გაიზრდება..

ქართველებთან სლოვენიელებს დააკლდებათ ტრავმირებული მარტინ მილეცი. ბოლო შეხვედრა "მარიბორმა" შინაური ჩემპიონატის ეგიდით "მურასთან" ჩაატარა და ისიც 0:0 ითამაშა. აღსანიშნავია, რომ "ჩიხურასთან" მატჩის წინ ჩვენი მეტოქის სამწვრთნელო შტაბმა რამდენიმე ფეხბურთელს დასვენების საშუალება მისცა.

დანაკლისის გარეშე არც "ჩიხურაა". საჩხერულ კლუბს სლოვენიაში ვერ დაეხმარება გუნდის ერთ-ერთი ლიდერი ირაკლი ლეკვთაძე. როგორც გახსოვთ, მან თბილისურ მატჩში ტრავმა მიიღო. გვაიმედებს ის, რომ პირველ შეხვედრაში ძალიან ყოჩაღად ჩაერთვნენ საჩხერელი სამარქაფოები, რომელთაც, თუნდაც, ლეკვთაძის ნაადრევი გასვლა მინდვრიდან არ აგრძნობინეს გუნდს.

გუნდს დააკლდება ასევე ტრავმირებული ლიდერი შოთა კაშია, ვინც თბილისური შეხვედრაც ამავე მიზეზით გამოტოვა. რა თქმა უნდა, "ჩიხურასთვის" ძალიან მნიშვნელოვანი იქნება ის, თუ რამდენად ყაირათიანად გამოიყენებს მოწინააღმდეგის კართან შექმნილ საგოლე მომენტებს. თბილისში ეს რომ გაეკეთებინათ, შეიძლებოდა, დღეს გაცილებით კარგ ხასიათზე და უფრო იმედიანად ვყოფილიყავით...

როგორც ყოველთვის, "ჩიხურას" მთავარი მწვრთნელი სოსო ფრუიძე მოზომილ, მაგრამ საქმიან კომენტარს აკეთებს თამაშის წინ:

"მიმაჩნია, რომ არის ამ ბარიერის დაძლევის შანსი. დანარჩენი უშუალოდ მინდორზე გამოჩნდება. ჩვენს ფეხბურთელებს აქვთ უდიდესი მოტივაცია იმისა, რომ წინ წავიდნენ და გაახარონ ქართველი გულშემატკივარი. ასეთ დროს ფინანსური მოტივაცია არ არის მთავარი, მაგრამ არსებობს ეს მომენტიც...

ასევე, უნდა შევინარჩუნოთ ის ფიზიკური ფორმა, რომელშიც ახლა არის გუნდი. მოგეხსენებათ, ევროთასების შეხვედრებს გაცილებით მეტი ძალა მიაქვს, ვიდრე საქართველოს ჩემპიონატის მატჩებს... გოლი თუ ჩვენ გვაქვს გასატანი, ის გასატანი აქვს მოწინააღმდეგესაც. რა თქმა უნდა, თავიდანვე ეცდებიან, საკუთარი გულშემატკივრის წინაშე შემოგვიტიონ. ჩვენ კი დაბალანსებული ფეხბურთი უნდა ვითამაშოთ".

"ჩიხურა" სლოვენიას ამ შემადგენლობით ეწვია: დინო ჰამზიჩი, ზურაბ მწყერაშვილი, რევაზ ჩიტეიშვილი, ბაქარ მირცხულავა, დავით მაისაშვილი, ლევან კაკუბავა, დავით მეგრელიშვილი, ლაშა ჩიკვაიძე, დენის დობროვოლსკი, თეიმურაზ მარკოზაშვილი, მიხეილ სარდალიშვილი, ირაკლი ბუღრიძე, გიორგი გაბედავა, დემურ ჩიხლაძე, კახა კახაბრიშვილი, გიორგი ბუხაიძე, დავით იონანიძე.

ჩვენი დროით მატჩი 22:15 საათზე დაიწყება და მას თურქ მსაჯთა ბრიგადა მოემსახურება. მთავარი სასტვენი უმუთ მელერის ხელში იქნება. საინტერესოა, რომ ის პირველად იმსაჯებს ქართველების თამაშს.

ყოველდღიური სპორტული გაზეთი "ლელო"
1453
მკითხველის კომენტარები / 0 /
მსგავსი ამბები
რუბრიკის სხვა სიახლეები
;