ევროპას ხუთეული იწყებს

რუსეთში, დაღესტნის ქალაქ კასპიისკში მოჭიდავეთა ევროპის ჩემპიონატი იწყება, რომელშიც თავდაპირველად ბერძენ-რომაელები ჩაებმებიან. დღეს 5 წონის - 55, 63, 77, 87 და 130 კილოგრამის ფალავნები იჭიდავებენ, თუმცა ტურნირი 2-დღიანი ფორმატით ტარდება და გამარჯვებულთა ვინაობას ხვალ შევიტყობთ.

55 კილოგრამში ნუგზარ წურწუმიას პირველი მეტოქე აზერბაიჯანელ ახალგაზრდებში მსოფლიოს ჩემპიონი, 23-წლიანებში ევროპის მესამე პრიზიორი ელდანიზ აზიზლია. მოგებული ნახევარფინალში გადის, სადაც მეტოქედ უკრაინელ ვლადისლავ კოროსტელოვსა და რუს ვასილ ტოპოევს შორის მოგებული შეხვდება.

63-შიც ლევან ქავჟარაძე პირველივე წრეში აზერბაიჯანელს ხვდება - ტალეჰ მამადოვს. გამარჯვებულის მომდევნო მეტოქე სერბი ტამაშ ნადი ან რუსი ზაურ კაბალოევი იქნებიან.

დებიუტანტი თორნიკე ძამაშვილი (77) თავიდან თურქ სერხან აკოუნს ხვდება, მოგების შემთხვევაში კი, დიდი ალბათობით, უძლიერეს მეტოქეს, რუსთა ორ-ორგზის ოლიმპიურ, მსოფლიოსა და ევროპის ჩემპიონ რომან ვლასოვს დაეჭიდება, ვისაც მანამდე არ უნდა გაუჭირდეს მოლდოველი იგორ ბასლეაგას დამარცხება.

მსოფლიოს მესამე პრიზიორ რობერტ კობლიაშვილს (87) თავდაპირველ მეტოქედ ბულგარელი ტარეკ მოჰამედ აბდელსლამ შებლე მოჰამედი ერგო, შემდეგ ეტაპზე გასვლისას კი შვედ კრისტოფერ ზაქარიას ბერგსა და ჩეხ არტურ ომაროვს შორის გამარჯვებულს შეხვდება.

იაკობ ქაჯაია (130) პირველ პაექრობას ესპანელ ხუან რაფაელ ერეიდა მენასთან გამართავს, ამათში მოგებულს კი უკრაინელ ვლადისლავ ვორონინსა და აზერბაიჯანელ თურმან ეიუბოვს შორის უძლიერესი ელოდება.

შეგახსენებთ, რომ სხვა წონებში ჩვენი გუნდის ღირსებას ახალგაზრდებში მსოფლიოს ჩემპიონი დავით ჩხარტიშვილი (60), ევროპისა და ოლიმპიადის პრიზიორი შმაგი ბოლქვაძე (67), იური ლომაძე (72), ევროპის ორგზის ჩემპიონი ზურაბ დათუნაშვილი (82) და კუკური კირცხალია (97) დაიცავენ.

ყოველდღიური სპორტული გაზეთი "ლელო"
332
მკითხველის კომენტარები / 0 /
მსგავსი ამბები
რუბრიკის სხვა სიახლეები