ევროპა სარეკორდო მაჩვენებლით

* დურესში ევროპის ჩემპიონატზე ქართველებმა სარეკორდო რაოდენობა, 27 მედალი მოიპოვეს.
* საქართველოს ჰიმნი ევროპის ახალგაზრდულ ჩემპიონატზე ოთხჯერ აჟღერდა.
* 2019 წლის ევროპის ჩემპიონატს ძალოსნობაში ბათუმი უმასპინძლებს.

ალბანეთის ქალაქ დურესში დამთავრდა ახალგაზრდა და 23-წლამდელ ძალოსანთა ევროპის ჩემპიონატი, რომელშიც 35 ქვეყნის 350-მდე სპორტსმენი იბრძოდა საპრიზო ადგილებისთვის. საქართველოს ორივე ნაკრების წევრებმა 27 მედალი მოიპოვეს, რაც ჯილდოების რაოდენობით ძალოსნობის ეროვნული ფედერაციისთვის სარეკორდო მაჩვენებელია.

ახალგაზრდებმა 5 ოქროს, 4 ვერცხლისა და 2 ბრინჯაოს მედლით გუნდური პირველი ადგილი დაიკავეს, ხოლო 23-წლამდელებს 8 ოქროს, 4-4 ვერცხლისა და ბრინჯაოს ნადავლით მეორე ადგილი ერგოთ.

შეგახსენებთ, რომ დურესში საქართველოს ჰიმნი ოთხჯერ აჟღერდა, რადგან ორჭიდში ევროპის ჩემპიონები გახდნენ ახალგაზრდებს შორის - რევაზ დავითაძე (85 კგ, ატაცში (165 კგ), აკვრასა (188) და ორჭიდში (353) ოქროს მედლები) და დავით ხეცურიანი (105 კგ, ატაცსა (173) და ორჭიდში (377) ოქრო, აკვრაში (204 ) ბრინჯაო); 23-წლამდელებში - ანატასია გოტფრიდი (90 კგ. ატაცში (123), აკვრასა (140) და ორჭიდში (263) ოქრო) და შოთა მიშველიძე (62 კგ. ატაცში (134), აკვრასა (153) და ორჭიდში (287) ოქრო).

ქართველი ათლეტების მიერ ბოლო წლებში საერთაშორისო სარბიელზე მიღწეული მაღალი მაჩვენებლები იმის შედეგიცაა, რომ, მიზანმიმართულ საწვრთნელ პროცესებთან ერთად, ძალოსნობის ეროვნულმა ფედერაციამ სამინისტროს მხარდაჭერით საგრძნობლად გააუმჯობესა ინფრასტრუქტურა, გაიხსნა ახალი დარბაზები, რომლებიც უახლესი ინვენტარით აღიჭურვა.

ყოველივე ამან ძალოსნობაში მომეცადინეთა რაოდენობა და შიდა ჯანსაღი კონკურენცია საგრძნობლად გაზარდა, შედეგებმა და დიდ შეჯიბრებებში მოპოვებულმა მედლებმა მნიშვნელოვნად იმატა. მაგალითად, შარშან ეილათში (ისრაელი) ახალგაზრდებისა და 23-წლამდელთა ევროპის ჩემპიონატებზე ქართველებმა სხვადასხვა სინჯის 22 მედალი თუ მოიპოვეს, დურესში მსგავს პირველობაზე მათმა რაოდენობამ, როგორც აღვნიშნეთ, 27-ს მიაღწია.

ალბანეთში ჩვენებმა კიდევ ერთი დიდი გამარჯვება იზეიმეს - კონკურენტებს აჯობეს და, ევროპის ძალოსნობის ფედერაციის აღმასრულებელი საბჭოს გადაწყვეტილებით, 2019 წლის ევროპის ჩემპიონატი აჭარის დედაქალაქ ბათუმში გაიმართება, რაც საქართველოს ძალოსნობის ფედერაციის კიდევ ერთი აღიარებაა.

დურესიდან დაბრუნების შემდეგ საქართველოს ძალოსნობის ფედერაციის პრეზიდენტს, სამგზის ოლიმპიურ ჩემპიონ კახი კახიაშვილს, ძალოსანთა ეროვნული ნაკრების მთავარ მწვრთნელს, ოლიმპიურ ჩემპიონ გიორგი ასანიძეს, ასაკობრივი ნაკრებების წევრებსა და მწვრთნელებს სპორტისა და ახალგაზრდობის საქმეთა მინისტრი ტარიელ ხეჩიკაშვილი სამინისტროში შეხვდა და წარმატება მიულოცა.

ტარიელ ხეჩიკაშვილი: "კვირა არ გაივლის, ქართველმა სპორტსმენებმა ევროპულ და მსოფლიო ასპარეზზე არ გვასახელონ. შესანიშნავი თაობა გვეზრდება. განსაკუთრებულ შედეგებს ძალოსნები აღწევენ. ეს არის შედეგი იმ პროგრამისა, რომელსაც ძალოსნობის ეროვნული ფედერაცია სპორტის სამინისტროსთან ერთად ახორციელებს. თითოელ სპორტსმენს, მწვრთნელსა და მთლიანად ფედერაციას ვულოცავ დურესში მოპოვებულ დიდ გამარჯვებას. დარწმუნებული ვარ, ამ სპორტსმენთაგან ძალიან ბევრი მომავალ ოლიმპიურ თამაშებში საქართველოს სპორტულ ღირსებას დაიცავს.

ჩვენი ქვეყნის დიდი აღიარებაა, რომ ბოლო წლებში ბევრ მნიშვნელოვან შეჯიბრებას ვუმასპინძლეთ მაღალ დონეზე. ამან განაპირობა ახალი ნდობა და გამოწვევა - 2019 წელს ბათუმში ძალოსანთა ევროპის ჩემპიონატი გაიმართოს. მჯერა, რომ ყველა მოთხოვნას დავაკმაყოფილებთ. ეს პირველობა დამატებითი მოტივაცია იქნება ჩვენი ათლეტებისთვის და საქართველოს მეტ პოპულარიზაციასაც შეუწყობს ხელს".

კახი კახიაშვილი: "ჩვენი ქვეყნის ძალოსნობის ისტორიაში პირველად, მედლების რაოდენობით ყველას ვაჯობეთ, ხოლო საერთო გუნდურ ჩათვლაში მეორე ადგილი დავიკავეთ. გოგონებში მხოლოდ ერთი წარმომადგენელი გვყავდა - ანასტასია გოტფრიდი. მისმა სამმა ოქრომ ქალებში მეოთხე ადგილი მოგვიტანა. ბოლო წლებში მიღწეულმა წარმატებებმა ჩვენი ქვეყნის მიმართ პატივისცემა ერთიორად გაზარდა. კონკურენტები მოწიწებით გვეპყრობიან, რჩევებს გვეკითხებიან. დასტურად ისიც გამოდგება, რომ ევროპის ფედერაციის აღმასკომმა 2019 წელს ბათუმში კონტინენტის პირველობის გამართვას ერთხმად დაუჭირა მხარი".

გიორგი ასანიძე: "ჩვენი სპორტსმენების მიღწევებით უზომოდ გახარებული ვარ. დურესში მიღწეული შედეგები ეროვნული ფედერაციისა და სპორტის სამინისტროს ერთობლივი მუშაობის ნაყოფია. წინ მსოფლიოს ჩემპიონატი გველის. ვეცდებით, გულშემატკივრები კიდევ ერთხელ გავახაროთ".

რევაზ დავითაძე: "ევროპის ჩემპიონატზე საქართველოს ნაკრებმა შესანიშნავად იასპარეზა და დიდ წარმატებას მიაღწია, რაშიც მეც შევიტანე მოკრძალებული წვლილი - სამივე დისციპლინაში ოქროს მედლები მოვიპოვე. ბედნიერი ვარ, რომ მწვრთნელებსა და ქომაგებს იმედები არ გავუცრუე".

ყოველდღიური სპორტული გაზეთი "ლელო"

1490
მკითხველის კომენტარები / 0 /
მსგავსი ამბები
რუბრიკის სხვა სიახლეები
;