ევროპის ახალგაზრდული ოლიმპიური ფესტივალი ვერცხლის დუბლით გავხსენით 

გუშინ, 21 ივლისს ბაქოში საზეიმოდ გაიხსნა ევროპის XV ახალგაზრდული ოლიმპიური ფესტივალი და გუშინვე დაიწყო შეჯიბრებები ჭიდაობაში, სადაც ჩვენმა ნაკრებმა ორი ვერცხლი მოიპოვა:

თავისუფალ ჭიდაობაში ფესტივალის ვიცე-ჩემპიონი ნიკოლოზ სანთელაძე (45) გახდა, ხოლო ბერძნულ-რომაულში - რომეო ბერიძე (55). 

სანთელაძე ჭაბუკებში ევროპის წლევანდელი ჩემპიონია. მან ეს ტიტული ივნისში იტალიურ ფეანძაში მოიპოვა, სადაც ფინალში აზერბაიჯანელი მურად ჰაგვერდიევი დაამარცხა. ბაქოშიც ევროპის ფინალი განმეორდა, თუმცა გამარჯვება ამჯერად მასპინძელს დარჩა, რაც, იქნებ, მოსალოდნელიც იყო მასპინძელთა ფაქტორიდან გამომდინარე. სანთელაძემ ფინალამდე პოლონელი ფაბიან ნიედზვიეკი, იტალიელი პაოლო პიო ლუმია და რუსი ელდარ ასაკაევი დაამარცხა. 

რომეო ბერიძეს ევროპის ჩემპიონატზე არ უჭიდავია - ბრინჯაოს მედალოსანი დიმიტრი ხაჩიძე შეცვალა. თუმცა ფირად დამაჯერებლად კი იჭიდავა - ვერცხლის მედალი ერთია და ბაქოში მეოთხედფინალში მასპინძელთა ევროპის მოქმედი ჩემპიონი ნიჰატ ზაჰიდ მამადლი დაამარცხა. მანამდე მან ფრანგი იანის ნიფრიც დაამარცხა, ხოლო ნახევარფინალში თურქი ბეკირ ატეც დაჯაბნა, მაგრამ, სამწხაროდ, ფინალში ვერაფერს გახდა ევროპის ფინალისტთან, ბელარუს გლებ მაკარანკასთან და ვერცხლს დასჯერდა. 

გუშინ შეჯიბრებაში ორივე სახეობაში 2-2 წონის - 45 და 55 კილოგრამების მოჭიდავეები ჩაებნენ. ჩვენგან „თავისუფალში“ ბეჟან ბარსონიძე (55), ხოლო ბერძნულ-რომაულში დავით გვასალიაც (45) ჩაებნენ, თუმცა ისინი უმედლოდ დარჩნენ. 

თავად ევროპის XV ახალგაზრდულ ოლიმპიურ ფესტივალს რაც შეეხება, მას ბაქო 21-27 უმასპინძლებს, მის პროგრამაში კი ამჯერად სპორტის 10 სახეობაა: კალათბურთი, ფრენბურთი, ხელბურთი, ცურვა, ველოსპორტი, მძლეოსნობა, ძიუდო, ჭიდაობა, ჩოგბურთი და სპორტული ტანვარჯიში. 

ამ ფესტივალში მონაწილეობას მიიღებს ევროპის 49 ქვეყანა. არ იქნება სომხეთი, რომელსაც მასპინძლებმა უსაფრთხოების გარანტიები ვერ მისცეს. საქართველო ევროპულ ღონისძიებაში 6 სახეობაში გამოვა 36 სპორტსმენით: ძიუდო, ჭიდაობა, ცურვა, ველოსპორტი, ჩოგბურთი და მძლეოსნობა.

საქართველოს დელეგაციის შემადგენლობაში მთლიანობაში 60 კაცია: 36 სპორტსმენი, 13 - მწვრთნელი, 2-2 - მსაჯი და ექიმი, სხვები კი ადმინისტრაციის წევრები არიან. ჩვენს ოლიმპიურ დელეგაციას სეოკ-ის პრეზიდენტი ლერი ხაბელოვი უხელმძღვანელებს, ოლიმპიურ სოფელში მისიის ხელმძღვანელი კი გიორგი ესაკიაა. 

19 ივლისს სეოკ-ის შტაბბინაში საქართველოს დელეგაციას საზეიმო გაცილება მოუწყვეს. მას ქვეყნის პრემიერ-მინისტრი მამუკა ბახტაძე, განათლების, მეცნიერების, კულტურისა და სპორტის მინისტრი მიხეილ ბატიაშვილი თავის მოადგილეებთან ერთად, სეოკ-ის პრეზიდენტი ლერი ხაბელოვი, პარლამენტარები, მონაწილე ფედერაციებისა თუ გუნდების ხელმძღვანელები და თავად სპორტსმენები ესწრებოდნენ. 

შეგახსენებთ, რომ ამ რანგის ფესტივალებზე ყველაზე წარმატებული გამოსვლა 2001 წელს ესპანურ მურსიაში და 2015 წელს თბილისში გვქონდა, როცა გუნდურ X ადგილზე გავედით. 

საქართველოს დელეგაციის მედროშე მძიმეწონოსანი ძიუდოისტი გიგა ტატიაშვილი იყო, ვინც ერთი თვის წინ ჭაბუკებში ევროპის ჩემპიონი გახდა. 27-ში იქვე დახურვის ცერემონიალიც შედგება.

ყოველდღიური სპორტული გაზეთი "ლელო"
996
მკითხველის კომენტარები / 0 /
მსგავსი ამბები
რუბრიკის სხვა სიახლეები
;