ევროპის ახალგაზრდული ჩემპიონატი: დასასრული ოქროს დუბლით

ესპანურ პონტევედრაში მიმდინარე ახალგაზრდა მოჭიდავეთა ევროპის ჩემპიონატზე გამოსვლა დაამთავრეს ბერძენ-რომაელებმა.

ჩვენმა გუნდმა გუშინაც დამაჯერებლად იასპარეზა და აქტივს ორი ოქროს მედალი შეჰმატა. ხულოელი ფრიდონ აბულაძის (55) შემდეგ კონტინენტის ჩემპიონის ტიტულს ბათუმელი დიეგო ჩხიკვაძე (60) და ლანჩხუთელი გიორგი შოთაძეც (67) დაეუფლნენ. სამწუხაროდ, ბრინჯაოს მედლისთვის ბრძოლაში ხელი მოეცარათ ხულოელ ოთარ აბულაძეს (72) და თბილისელ კოკა ღარიბაძეს (97). 

ამდენად, რევაზ ლაშხის გუნდმა ესპანეთში გამოსვლა 6 მედლით დაასრულა: 3 ოქრო, 1 ვერცხლი და 2 ბრინჯაო. ჩემპიონთა ტრიოზე უკვე გითხარით და ევროპის ვიცე-ჩემპიონი ხულოელი ლერი აბულაძე (63) გახდა, ხოლო მესამეზე თბილისელი ნიკა შერბაკოვი (77) და გარდაბნელი გიორგი ქაცანაშვილი (87) გავიდნენ. გუნდურ ჩათვლაში ჩვენი ნაკრები მეორეზე გავიდა 151 ქულით. პირველი რუსეთია 159-ით, ხოლო მესამე - უნგრეთი 124-ით. 

ჩხიკვაძემ კარიერაში პირველი ტიტული მოიპოვა, ფინალში კი დამაჯერებლად დაამარცხა აზერბაიჯანელი ასგარ ალიზადა: 8:3. მისი რბევა ქართველმა უკვე ნახევარი წუთის შემდეგ დაიწყო, როცა უზადო კისრულზე წამოიღო: 2:0.

პირველი წუთის მიწურულს თვითონ დაკარგა ერთი ქულა, როცა თავდაცვისას წრის გარეთ გაუცდა ფეხი. სამაგიეროდ, მალე ამას არაჩვეულებრივი ეპიზოდი მიაყოლა, სადაც თავდაცვისა და კომბინაციური შეტევის საჩვენებელი მაგალითი გვაჩვენა: ალიზადამ მოახერხა ზურგიდან მოვლა და ხელების შეკვრა, ჩხიკვაძე კი ლამის წაქცეული იმდენს მოძრაობდა, ისე უსხლტებოდა ხელიდან მეტოქეს, თითქოს ალიზადა გაქონილს ეპოტინებოდა და ვერაფრით მოახერხა მისი ხელში მოგდება. ამ ეპიზოდში ჩხიკვაძემ კარგად მოიქცია იღლიაში მისი თავი და არ მისცა ილეთის გაკეთების საშუალება. პირიქით - ასე ლამის ზურგზე დაწოლილმა უჩვეულო სისხარტე გამოავლინა, როცა შემოუბრუნდა მეტოქეს და მუხლებზე ჩაჩოქილმა ისევ კისრულით დაარჭო ლეიბს. ალიზადა ვერც კი გაერკვა ეპიზოდში, ქართველი ისე ელვისებურად ამოვიდა და გაუკეთა ილეთი.

თუმცა კომისრებმა ეს ეპიზოდი 2:2-ზე შეაფასეს და 2 ქულა მეტოქესაც მისცეს: 4:3. მეორე პერიოდის დასაწყისშივე ჩხიკვაძემ უკვე დგომიდან გაუკეთა კისრული და 4 ქულა მიითვალა: 8:3, ეს ანგარიში კი შეხვედრის ბოლომდე შეინარჩუნა. ალიზადამ ვერა, მაგრამ ჩემპიონს საფინალო სასტვენის შემდეგ უკვე ლაშხმა შეუსრულა ტრადიციული გდება და ასე მიულოცა ეს დიდი გამარჯვება. 

ჭაბუკებში ევროპის ორგზის და მსოფლიოს ჩემპიონმა შოთაძემ კიდევ უფრო იოლად, წმინდად მოუგო სომეხ ჰაიკ მელიქიანს - 9:0. პირველივე წუთის ბოლოს მან დგომიდან მოგვერდზე გადმოიღო სომეხი, მერე კი ჯვარედინი მოვლებით ვარდნაში გაუკეთა იგივე გდება, რაც 4-ქულიანად შეაფასეს: 6:0. იქვე დატრიალებასაც ბევრს ეცადა, მაგრამ არ გამოუვიდა. სამაგიეროდ, მალე ილეთი დაუხურა მელიქიანს და დაატრიალა კიდეც: 9:0. 

გუშინ ჩვენებიდან ბრინჯაოსთვის ორი ფალავანი იბრძოდა. კოკა ღარიბაძე დამამშვიდებლის ფინალში იყო და პირდაპირ ბრინჯაოსთვის ჭიდაობდა, მაგრამ ბელარუს ულადისლაუ პუსტაშილაუსთან 1:7 წააგო და მეხუთეზე დარჩა. ოთარ აბულაძემ სანუგეშოში პირველივე პაექრობა 2:12 დათმო თურქ ისმაილ გუნთან და უმედლოდ დარჩა. 

379
მკითხველის კომენტარები / 0 /
მსგავსი ამბები
რუბრიკის სხვა სიახლეები
;