ევროპის ახალგაზრდული ჩემპიონატი. ორი ბრინჯაო სტარტზე

ბულგარეთის დედაქალაქ სოფიაში დაიწყო ევროპის ახალგაზრდული ჩემპიონატი ძიუდოში, რომელშიც საქართველო წარმოდგენილია, როგორც ბიჭების, ასევე გოგონების გუნდით.

პირველ დღეს ხუთმა ქართველმა ძიუდოისტმა იჭიდავა და ორმა მედალი მოიპოვა - ჯაბა პაპინაშვილმა (60 კგ) და ბაგრატ ნინიაშვილმა (66) ბრინჯაოს მედლები მოიპოვეს.

55 კილო წონით კატეგორიაში ვანო ხუბაშვილი პირველ წრეში თავისუფალი იყო, მეორეში კი იგი თურქ ოგიუზჰან ოზისიკთან იპონით დამარცხდა და ევროპის ჩემპიონატს გამოეთიშა. ამ წონაში ევროპის ჩემპიონი უკრაინელი დიშოტ ხალმატოვი გახდა.

60 კილოში ორი მონაწილე გვყავდა - ჯაბა პაპინაშვილი და თემურ ნოზაძე. პაპინაშვილმა წინასწარ რაუნდში იპონით დაამარცხა კვიპროსის სახელით მოასპარეზე გეორგიოს ბალარჯიშვილი. შემდეგ ასევე იპონით მოუგო თურქ სამეთ კუმტასს და მოულოდნელად იპონით დამარცხდა აზერბაიჯანელ ტოფიგ მამადოვთან.
პაპინაშვილი რეპეშაჟში გადაერთო, სადაც ვაზარით აჯობა რუს ობიდ ძებოვს. მე-3 ადგილისთვის ბრძოლაში პაპინაშვილმა ჰოლანდიელ ივო ვერჰორსტერტს მოუგო - მეტოქეს ვაზარით აჯობა.

თემურ ნოზაძემ დროზე ადრე აჯობა კვიპროსელ ლუკა ლუკასს, მაგრამ შემდეგ იპონით დამარცხდა რუს კონსტანტინ სიმეონიდისთან. ამ წონაში ჩემპიონი აზერბაიჯანელი მამადოვი გახდა.

66 კგ-მდე წონით კატეგორიაში მოასპარეზე ბაგრატ ნინიაშვილმა ევროპის ახალგაზრდული ჩემპიონატი კარგად დაიწყო. ჯერ მონტენეგროელი მარკო გუსიჩი დაჯაბნა, შემდეგ - ფრანგი რედა სედუკი, 1/2 ფინალში კი იტალიელ მანუელ ლომბარდოს დაუპირისპირდა. ბრძოლა აპენინელის გამარჯვებით დასრულდა და ნინიაშვილს ბრინჯაოსთვის ჭიდაობამ მოუწია.

მესამე ადგილისთვის იგი ებრაელ ამიტ ბობოვიჩს შეხვდა. ბრინჯაოსთვის ჭიდაობა საინტერესო, შემტევი გამოდგა და ეფექტურად დასრულდა, ნინიაშვილმა მეტოქე ასწია და სუფთაზე დადო.

გოგონებში, 48 კილოში ნატალია ყიფშიძე იპონით დამარცხდა ავსტრიელ ჟაკლინ შპრინგერთან. გუშინ გოგონებში მეტი მონაწილე არ გვყოლია.

ბექაური ახალ წონაში

დანარჩენი ორთაბრძოლები დღეს-ხვალ გაიმართება, გუნდური შეჯიბრება კი კვირასაა დანიშნული. გაგაცნობთ სხვა ქართველი ძიუდოისტების შესაძლო მეტოქეებს:

81 კილოში ორი ძლიერი ახალგაზრდა გვყავს - ტატო გრიგალაშვილი და ლუკა მაისურაძე.

ამ ასაკში ევროპის ჩემპიონატის შარშანდელი ფინალისტი მაისურაძე პირველ წრეში ბოსნიელ ვუკ ელეზს დაეჭიდება, ამათში მოგებულს კი მომდევნო ეტაპზე ჩერნოგორიელ ალექსანდრ ტომიჩსა და ესტონელ ასლანბეკ მაგომედკარიმს შორის უმჯობესი შეხვდება.

პირველივე წრეში იჭიდავებს ანტალიის "დიდი პრიზის", მსოფლიოსა და ევროპის ახალგაზრდული ჩემპიონატების მესამე პრიზიორი გრიგალაშვილიც - გერმანელ ემილ ჰენებახთან, გამარჯვების შემთხვევაში კი ბოსნიელ ბოჟიდარ ვუკურევიჩსა და ჰოლანდიელ იან რაიხნტინს შორის მოგებულს გაეჯიბრება.
81 კილოგრამში მესამე ქართველიცაა - ვასილ ბალამპანაშვილი, ვინც ინტენსიურად "მოგზაურობს" საქართველოსა და საბერძნეთს შორის: ხან ჩვენი სახელით ჭიდაობს, ხან - იმათი.

წლევანდელი სეზონის ერთ-ერთი მთავარი ტრიუმფატორი ლაშა ბექაური ახალ წონაში პირველ ოფიციალურ ტურნირს ჭიდაობს, შეჯიბრებაში კი მეორე წრიდან ჩაებმება, სადაც რუს მანსურ ლორსანოვს გაეჯიბრება. ამ წყვილის მოგებულს შემდეგ ეტაპზე მეტოქედ პორტუგალიელი გილერმე სალვადორისა და უკრაინელი ვადიმ ველკოვის დუეტიდან გასული ეყოლება.

შეგახსენებთ, რომ ბექაური ჯერ კიდევ შარშან 73 კილოგრამში ჭიდაობდა, თანაც - ჭაბუკებში და შარშან დუბლიც მიითვალა: ევროპის ჩემპიონიც გახდა და მსოფლიოსიც, წლეულს კი ასაკობრივი ნაკრებიც შეიცვალა და წონაც - ერთბაშად "ისკუპა" 90-ში. თუმცა ამას ხელი არ შეუშლია ფენომენალური შედეგების ჩვენებაში და შინ თუ გარეთ თითქმის ყველა ტურნირი მოიგო, სადაც კი იჭიდავა, ხოლო უმედლოდ არსად დარჩენილა. თან ძალიან იოლად ჩაანაცვლა წონის ლიდერები სახლში თუ უცხოეთში. ამავე წონაში ილია ხაბულიანიც გამოდის ესპანეთიდან, ოღონდ ის სხვა ქვეჯგუფშია.

100-ში ორი მონაწილე გვეყოლება. თბილისის "დიდი პრიზის" წლევანდელი მესამე პრიზიორი ონისე სანებლიძე თავდაპირველად ფრანგ პოლ დევოს გაეჯიბრება, ამ წყვილის გამარჯვებულს კი მეორე წრეში საკმაოდ ძლიერი ჰოლანდიელი სიმეონ კატარინა ელოდება.

ამავე ჯგუფშია აზერბაიჯანელი ადილ კარიმლიც და უკრაინელი იევჰენ ვეჰერაც (ვისაც ზაურ კენჭაძემ მოუგო რუმინეთის ტურნირის ფინალში) - სანებლიძეს საკმაოდ დიდი ბრძოლა ელოდება, თუმცა თავად ისიც ფავორიტთა შორისაა. თან ჭაბუკებში ევროპის ჩემპიონს (თუმცა მაშინ 90-ში გამოდიოდა) ახალგაზრდებში ჯერ პირადში ოფიციალური ტურნირი არ მოუგია (მხოლოდ გუნდურშია ევროპის ჩემპიონი) და დროა, ეს ხარვეზი გამოასწოროს.

თავად ჭაბუკებში ევროპის ვიცე-ჩემპიონი კენჭაძე პირველ პაექრობას შვეიცარიელ დანიელ აიხთან გამართავს, მოგების შემთხვევაში კი, რაც სავსებით ხელეწიფება, დანიელ მადსენს შეხვდება. ამავე ჯგუფშია მისთვის კარგად ნაცნობი უნგრელი პეტერ არვაიც, ვისაც წლეულს ბერლინში სძლია.

მძიმე წონაში გელა ზაალიშვილი შარშან ამავე ტურნირზე მოპოვებული ბრინჯაოს მედლის უფრო მაღალი სინჯის ჯილდოზე გადაცვლას ეცდება. ის მეორე წრიდან ჩაებმება პაექრობაში, სადაც უკრაინელი ვლადისლავ ბერეჟკას ძლევას შეეცდება.

დარჩა კვარტეტი

გოგონებში ორი მონაწილე მხოლოდ 57 კილოგრამში გვეყოლება. ორივე ჭაბუკებში ევროპის ჩემპიონია და პირველ წრეში ორივე ისვენებს. მეორეში ეთერ ლიპარტელიანი მაკედონიელ ბერნა შერიფოვსკასთან იჭიდავებს, ხოლო მზია ბებოშვილი - ავსტრიელ ლისა გრაბნერთან.

თბილისის "დიდი პრიზის" მესამე პრიზიორი და ახალგაზრდებში მსოფლიოს ბრინჯაოს მედალოსანი მარიამ ჭანტურია (70) პირველივე ეტაპზე ბერძენ იოანა-არისტეა დიმოუს ხვდება, ამათში მოგებულს კი საკმაოდ ძლიერი კონკურენტი ელოდება - ჩერნოგორიელ იოვანა პეკოვიჩსა და ჭაბუკებში ევროპის წლევანდელ ჩემპიონს, იტალიელ მარტინა ესპოზიტოს შორის გამარჯვებული.

სოფიო სომხიშვილი (+78) მეორე წრეში იჭიდავებს ბულგარელ დარინა სტოიჩევასთან. ამ ჯგუფში კიდევ ორი მონაწილეა - პოლონელი ჯულია სვიატკივიჟი და ჩეხი მარკეტა პაულუსოვა, რომლებიც თავდაპირველად ერთმანეთს ხვდებიან.

ყოველდღიური სპორტული გაზეთი "ლელო"
940
მკითხველის კომენტარები / 0 /
მსგავსი ამბები
რუბრიკის სხვა სიახლეები
;