ევროპის თასი ჭაბუკთა შორის: 8 მედალი პოლონეთიდან

პოლონურ ბიელსკო ბიალაში დამთავრდა ევროპის თასი ჭაბუკთა შორის, რომელშიც საქართველოდან მხოლოდ ბიჭების ნაკრები გამოდიოდა.

მთავარმა მწვრთნელმა გიორგი ყიზილაშვილმა იქ გაფართოებული შემადგენლობა წაიყვანა - 35 სპორტსმენი, ძირითადად საქართველოს ჩემპიონატის მედალოსნები. მათ საკმაოდ კარგადაც იასპარეზეს და პოლონეთში 8 მედალი მოიპოვეს: თითო ოქრო-ვერცხლი და 6 ბრინჯაო. საერთო-გუნდურ ჩათვლაში ჩვენი ნაკრები მეოთხე ადგილზე გავიდა, საკუთრივ ბიჭებში კი - მესამეზე. 

ჩემპიონი გიზო გუგუნაშვილი (90) გახდა, გიგა ტატიაშვილი (+90) მეორეზე გავიდა, ხოლო ბრინჯაოს მედლებს ნიკა ბაჩიაშვილი, აკაკი ჩაპურიშვილი (ორივე - 50), კოტე კაპანაძე (60), გიორგი ტერაშვილი (66), ალექსანდრე ლოლაძე (73) და ირაკლი დემეტრაშვილი (+90) დაეუფლნენ.

როგორც ვხედავთ, ჩვენი გუნდი რვა წონიდან უმედლოდ მხოლოდ ორში დარჩა - 55-სა და 81 კილოგრამებში, თუმცა 55-ში გუგა ამირხანაშვილმა (55) ბრინჯაოსთვის კი იჭიდავა, მაგრამ წააგო და მეხუთეზე დარჩა.

ჩვენები ყველაზე მეტი წარმატებით 55-სა და მძიმე წონებში გამოვიდნენ, სადაც ორ-ორი მედალი მოიპოვეს. არადა, შარშან ეს წონა ჩვენი „აქილევსის ქუსლი“ იყო და მთავარმა მწვრთნელმა მთავარ შეჯიბრებებზე სულაც გამოტოვა ის. ახლა აქ ერთბაშად ორი მონაწილე გახდა პრიზიორი, თუმცა ცუდია, რომ პოლონეთში ორივე ერთსა და იმავე ფალავანთან - რუსთა მომავალ ფინალისტ სერგეი მასტრიუკოვთან დამარცხდა.

ბაჩიაშვილი მასთან ერთად მოხვდა ქვეჯგუფში და რუსთან მეოთხედფინალში დამარცხდა, ხოლო ჩაპურიშვილმა ნახევარფინალში წააგო. ჩვენი მედალოსნები საქართველოს ჩემპიონატის ფინალისტები არიან, მათ შორის გამარჯვებული კი ჩოპურიშვილია.

ახლა მათ ერთნაირი შედეგით დაასრულეს გამოსვლა, თუმცა იქნებ ჩაპურიშვილის მხარის მცირე უპირატესობა მისი ნახევარფინალისტობა იყოს. ოღონდ არც იმას გამოვრიცხავთ, რომ, მედლის მიუხედავად, სამწვრთნელო შტაბს იქნებ სულაც არ მოეწონა მათი ჭიდაობის ხარისხი. 

მძიმე წონაში დემეტრაშვილი ტატიაშვილთან დამარცხდა. არადა, ისინიც საქართველოს პირველობის ფინალისტები არიან და მაშინ დემეტრაშვილმა მოუგო. ამდენად, ამ წონაში კონკურენცია კვლავაც ძველებურად დაძაბულია, ფინალი კი ტატიაშვილმა გერმანიის სახელით მოჭიდავე თანამემამულე დანიელ უძილაურთან წააგო. 

გუგუნაშვილმა ფინალი ესტონელ კარლ პრიილინ ტურკს მოუგო იპონით, მანამდე კი სლოვაკი ადამ კოშუტი, ლიეტუველი მარტინას პასკევიჩიუსი, ფრანგი კევინ ლივესი, ნახევარფინალში კი კიდევ ერთი სლოვაკი ბენჯამინ მატასეიე დაამარცხა.

საინტერესოა, რომ ჩვენებურმა ყველა პაექრობა იპონით მოიგო. თან, გუგუნაშვილი საქართველოს ჩემპიონიცაა და დიდი ალბათობით, ამ წონაში კონკურენცია აღარც დარჩა. მით უფრო, რომ ქვეყნის ვიცე-ჩემპიონი თორნიკე ფოლადაშვილი მეორე შეხვედრაში დამარცხდა და სანუგეშომდეც ვერ მივიდა, მის კვალად კი თავი ვერც სხვებმა გამოიჩინეს. 

ყოველდღიური სპორტული გაზეთი "ლელო"
268
მკითხველის კომენტარები / 0 /
მსგავსი ამბები
;