ევროპის ჩემპიონატის ტრიუმფალური ფინიში და 'ლელოს' ჯილდო ლაშას! [ანალიზი]

„ლაშა ტალახაძემ ტრიუმფალური ფინალი აჩუქა როგორც ქართველ, ისე ევროპელ მაყურებელს“, - ეს სიტყვები ევროსპორტის კომენტატორს ეკუთვნის, რომელიც ბათუმში ევროპის ჩემპიონატზე ქართველი გოლიათის გამოსვლით აღფრთოვანებული გახლდათ.

აღტაცებას ვერ მალავდა აჭარის დედაქალაქის სპორტის სასახლის პირთამდე სავსე ტრიბუნებიც - გულშემატკივრები მქუხარე ოვაციებით ხვდებოდნენ ქართველი ძალოსნების - 25 წლის ლაშა ტალახაძისა და 34 წლის ირაკლი თურმანიძის (ორივე +109 კგ) გამოსვლას. საამისო მიზეზიც ჰქონდათ.

რიოს თამაშების გამარჯვებულის, სამ-სამგზის მსოფლიოს და ევროპის ჩემპიონ ლაშა ტალახაძის შესაძლებლობებს, ეტყობა, ზღვარი არ აქვს. მან ეს ძალოსანთა კონტინენტის პირველობის დასკვნით დღესაც დაამტკიცა: როგორც ბოლო ოთხი წლის განმავლობაში, ტალახაძემ ბათუმის ფიცარნაგზეც ფანტასტიკური შედეგი აჩვენა - მსოფლიოს სამი რეკორდი გააუმჯობესა, ისე, რომ ყველა ცდა არც გამოუყენებია და სამი ოქროს მედალიც დაიმსახურა.

საჩხერელმა გოლიათმა მძიმე წონის ათლეტთა პაექრობის პირველსავე ცდაზე 208 კილოგრამი აიტაცა და ამ მოძრაობაში ოქროს მედალი მოიპოვა, მაგრამ ამას არ დასჯერდა და მეორე ცდაზე შარშან აშხაბადში მსოფლიოს ჩემპიონატზე დამყარებული საკუთარი რეკორდი (217 კილო) კილოგრამით გააუმჯობესა. მესამე ცდა კი არ გამოუყენებია.

შესანიშნავად იასპარეზა საქართველოს ძალოსანთა ნაკრების კაპიტანმა ირაკლი თურმანიძემ - მესამე ცდაზე მან 206-კილოგრამიანი შტანგა დაიმორჩილა და ევროპის ჩემპიონატის ვერცხლის მედალი დაიმსახურა. 200 კილოგრამით მესამე ადგილზე გავიდა ოლიმპიური თამაშების, მსოფლიოს და ევროპის ჩემპიონატების სომეხი პრიზიორი გორ მინასიანი, რომელმაც ორჯერ შეუტია 205 კილოს, მაგრამ - უშედეგოდ.

ლაშა ტალახაძე შეუდარებელი იყო აკვრაშიც - 260-კილოგრამიანი შტანგა მან ბუმბულივით შემართა თავს ზემოთ და აშხაბადში დამყარებული მსოფლიოს რეკორდი 3 კილოგრამით გააუმჯობესა, ორჭიდის ჯამში კი 478 კილოს მოუყარა თავი, რაც უწინდელ მსოფლიოს მიღწევას (ისიც ლაშას ეკუთვნოდა) ოთხი კილოგრამით აღემატება.

აკვრაში 245 კილოგრამით მეორე ადგილზე სომეხი რუბენ ალექსანიანი გავიდა, 241 კილოგრამით მესამე იყო ირაკლი თურმანიძე. მედალოსნები ქვეყნის პრემიერმინისტრმა მამუკა ბახტაძემ, ძალოსნობის ეროვნული ფედერაციის პრეზიდენტმა კახი კახიაშვილმა და EWF-ის პრეზიდენტმა ანტონიო ურსომ დააჯილდოვეს.

მამუკა ბახტაძემ ჩემპიონატის დამთავრების შემდეგ შეჯიბრების მაღალ დონეზე ჩატარებისთვის ორგანიზატორებსა და ძალოსნობის ეროვნულ ფედერაციას მადლობა გადაუხადა.

ქართველმა ძალოსანმა ვაჟებმა ბათუმის ფიცარნაგზე 5 ოქროს, 6 ვერცხლისა და 4 ბრინჯაოს მედალი მოიხვეჭეს. 96 კილოში ანტონ პლესნოიმ ატაცში 173 კილოთი მეორე ადგილი დაიკავა, აკვრაში 204 კილოთი მე-4 იყო, ხოლო ორჭიდში 377 კილოთი მესამეზე გავიდა. 102 კილოგრამ წონით კატეგორიაში ირაკლი ჩხეიძეს ატაცში 169 კილოთი ბრინჯაოს მედალი ერგო, აკრაში 203 კილოთი მე-6 ადგილს დაყაბულდა, ხოლო ორჭიდში 372 კილოთი მე-4 ადგილზე გავიდა.
ჩვენმა ვაჟთა ნაკრებმა 636 ქულა მოაგროვა და გუნდური პირველი ადგილი დაიკავა. ბელარუსს 634 ქულით მეორე, ხოლო სომხეთს 596 ქულით მესამე ადგილი ხვდა.

ლაშა ტალახაძე: „ამ შეჯიბრებისთვის მონდომებით ვემზადებოდით და ბედნიერი ვართ, რომ გულშემატკივრების იმედები გავამართლეთ. ჩვენს წარმატებაში უდიდესი წვლილი მიუძღვით მწვრთნელებს, ექიმებს, ძალოსნობის ეროვნულ ფედერაციას, სპორტის სამინისტროს და ქომაგებს, რომელთა მხარდაჭერა ჩემპიონატის დღეებში არ მოგვკლებია. ვეცდებით, მომავალ შეჯიბრებებშიც გავახაროთ სრულიად საქართველო“.

კვარცხლბეკი

ვაჟები

96 კგ
1. იაუჰენი ციხანცოუ (ბელარუსი) - 400 (178+222)
2. ევგენი კლიმონოვი (რუსეთი) - 378 (168+210)
3. ანტონ პლესნოი (საქართველო) - 377 (173+204)

102 კგ
1. დმიტრო ჩუმაკი (უკრაინა) - 391 (175+216)
2. სამველ გასპარიანი (სომხეთი) - 377 (168+209)
3. ვაძიმ სტრალცოუ (ბელარუსი) - 376 (170+206)
4.ირაკლი ჩხეიძე (საქართველო) - 372 (169+203)

109 კგ
1. სიმონ მარტიროსიანი (სომხეთი) - 427 (192+235)
2. ანდრეი არამნაუ (ბელარუსი) - 411 (190+221)
როდინ ბოჩკოვი (რუსეთი) - 410 (192+218)

+109 კგ
1. ლაშა ტალახაძე (საქართველო) - 478 (218+260)
2. ირაკლი თურმანიძე (საქართველო) - 447 (206+241)
3. რუბენ ალექსანიანი (სომხეთი) - 440 (195+245)

ყოველდღიური სპორტული გაზეთი "ლელო"
516
მკითხველის კომენტარები / 0 /
მსგავსი ამბები
რუბრიკის სხვა სიახლეები
;