ევროპის ჩემპიონატი ახალგაზრდებში. დასასრული ოქროთი და ბრინჯაოთი [ანალიზი]

პონტევედრაში დღეს დასრულდა თავისუფალი სტილით მოჭიდავეთა ევროპის ჩემპიონატი ახალგაზრდებს შორის. ის ჩვენმა ნაკრებმა მაჟორულ ნოტზე დაასრულა - ბოლო დღეს სამი მედალი მოიპოვა. მათ შორის - ოქროსიც, რასაც კიდევ ორი ბრინჯაო დაუმატა.

ევროპის ჩემპიონი ონელი მირიან მაისურაძე გახდა 86 კილოგრამში, ბრინჯაოს მედლები კი თბილისელებმა - გოგა მამიაურმა (74) და ვასილ ხვისტანმა (125) მოიპოვეს.

მაისურაძე -მსოფლიოდან ევროპამდე 

ჭაბუკებში მსოფლიოს ჩემპიონმა მაისურაძემ პირველივე შეხვედრაში გააკეთა საჩემპიონო განაცხადი, როცა აზერბაიჯანელი ფუად მაილოვი დიდი ანგარიშით, 14:6 დაამარცხა. მეოთხედფინალში მოლდოველ ივან ნედეალკოს 2:1 მოუგო, ნახევარფინალში კი უკრაინელ დემიდ კარაჩენკოსთან მიითვალა მორიგი დამაჯერებელი გამარჯვება - 11:3. 

გუშინ ფინალში მან საკმაოდ დაძაბულ პაექრობაში 3:2 დაამარცხა სომეხი მჰერ მარკოსიანი. საბედნიეროდ, მაისურაძემ კრიტიკული მომენტიდან თავის დაძვრენა შეძლო - მეტოქემ ფეხი კი აუღო, მაგრამ ქართველმა გდება არ დაანება. ის დარჩენილ ერთ წუთშიც გააფთრებით იცავდა თავს, უძნელესი გამარჯვება მოიპოვა და ემოციებით გაბრუებული ჯერ შეხვედრის მსაჯს გადახვია, ბოლოს კი საქართველოს დროშით ამაყად შემოურბინა არენას. 

ბრინჯაოს დუეტი

როგორც გითხარით, ჩვენს ნაკრებს ბრინჯაოს მედლები მამიაურმა და ხვისტანმა მოუტანეს. 

მამიაურმა ოქროს მედლის მოპოვების შანსი ნახევარფინალში დაკარგა, როცა რუსთა მომავალ ჩემპიონ დმიტრი კურპინთან 2:9 წააგო. იქამდე მისასვლელად ჩვენებურს ორი შეხვედრის მოგება დასჭირდა და ორივეში წმინდად იმარჯვა: საკვალიფიკაციოში სომეხი ჰრაირ ალიხანიანი 12:0, ხოლო შემდეგ უკრაინელი იევჰენი დუბოვი 13:3 დაამარცხა.

დამამშვიდებლის ფინალში ქართველის მეტოქე აზერბაიჯანელი ნასიბ ისაევი იყო, ვისთანაც ასევე წმინდად, 10:0 იმარჯვა. მან პირწმინდად დაჯაბნა მეტოქე, რაზეც ანგარიშიც მიუთითებს. 

ხვისტანი საკვალიფიკაციო წრეში ისვენებდა და ჩემპიონატში მეოთხედფინალიდან ჩაება, სადაც უკრაინელ იური იძინსკისთან 0:10 წააგო. უკრაინელი მერე ფინალშიც გავიდა და ჩვენებური სანუგეშო წრეში გაიყოლა. რაკიღა ბადის ამ მხარეს ცოტა ხალხი იყო, ამიტომ ხვისტანმა პირდაპირ ბრინჯაოსთვის იჭიდავა, სადაც მეტოქედ ბელარუსი მიკიტა ჰორჰუნი ჰყავდა. ჩვენმა ფალავანმა ძალიან დაძაბულ შეხვედრაში მოიპოვა გამარჯვება: 9:5. თუმცა პირველი პერიოდი 4:5 დათმო, ხოლო თავად პაექრობა, მძიმეწონოსანთა კვალობაზე, მოსალოდნელზე უფრო სანახაობრივი გამოდგა: საწყის ორ წუთში დგომში ჯვარედინ მოვლებაზე ორჯერ გაკეთდა 4-ქულიანი გდება. 

თავიდან ეს პირველივე წუთზე ხვისტანმა გააკეთა და იქვე შეეძლო შეხვედრის დასრულებაც, მაგრამ „ტუშე“ ვერ დააფიქსირა - ბეჭებზე დადებული მეტოქე გაექცა, თუმცა 4:0 მაინც დაწინაურდა. ცოტა ხანში ასევე დგომიდან ჯვარედინი მოვლების შემდეგ უკვე ჰორჰუნმა გადააგდო ქართველი უკან 4-ქულიანზე და ანგარიში გაათანაბრა, პერიოდის მიწურულს კი ხაზთან გამართულ ძიძგილაობაში ხვისტანი უფრო ადრე დაეცა ხალიჩაზე და ქულა ბელარუსს მისცეს: 5:4 მის სასარგებლოდ.

მეორე პერიოდი მთლიანად ხვისტანისა გამოდგა, ვინც უფრო გამძლეობისა და ფიზიკური კონდიციების ხარჯზე აჯობა ჰორჰუნს: ჯერ იყო და, ამოსმულის მსგავსი მოძრაობის მცდელობისას ილაჯგამოცლილი ბელარუსი თვითონ გადავარდა უკან და ხვისტანს ისღა დარჩენოდა, მთელი მასით მისწოლოდა და გდება დაეფიქსირებინა, ბოლო წუთზე კი ისევ დგომში ჯვარედინ მოვლებაზე, როცა ჩვენებური არც ცდილობდა გამწვავებას, რადგან არც სჭირდებოდა, ჰორჰუნმა კისრულის მსგავსი გდება დააპირა, მაგრამ ვერ შეძლო და ხვისტანმა არა მარტო ადვილად დააგდო ხალიჩაზე, არამედ ბეჭებიც დაადებინა.

ჩვენი ნაკრებიდან დამამშვიდებელ წრეში გორელი ამირან ვახტანგაშვილიც (65) გადავიდა, მაგრამ იქ პირველივე შეხვედრა წააგო ფრანგ მარვანე აჰმედ იეზასთან - 6:8. მანამდე მან პირველივე ორთაბრძოლა დათმო აზერბაიჯანელთა მომავალ ჩემპიონ თურან ბაირამოვთან - 1:2.

სამწუხაროდ, ჩვენი გუნდის დანარჩენი წევრები ნაადრევად გამოეთიშნენ შეჯიბრებას. თუმცა გოდერძი ძებისაშვილმა (61), ოთარ ბაგაურმა (70), ბაგრატ გაგნიძემ (79) და ელგუჯა ბალანჩივაძემ (97) თითო შეხვედრა კი მოიგეს.

ძებისაშვილმა მერვედფინალში შვეიცარიელი ნინო ლუტერტი 8:2 დაამარცხა, მაგრამ შემდეგ დაძაბულ და უხვქულიან ბრძოლაში 16:19 წააგო თურქ ჰამზა ალაჯასთან. ბაგაურმა საკვალიფიკაციოში უკრაინელ ანდრიი ნუჰუმანოვს წმინდად, 10:0 აჯობა, რასაც თურქ ომერ ფარუკ ჯაირთან 5:8 დათმო. გაგნიძემ მერვედფინალში ავსტრიელი ბენჟამინ გრაილი 5:4 დაჯაბნა, ოღონდ მომდევნო პაექრობა 1:11 დათმო ესტონელ ერიკ რაინბოკთან.

ბალანჩივაძემ ასევე საკვალიფიკაციოში 10:7 აჯობა სლოვაკ ვილიამ ოროსს, მერე კი 0:10 წააგო უნგრელ არტურ ვეგთან. საბოლოოდ არც ერთ მათგანს არ მიეცა დამამშვიდებელ წრეში გადასვლის შანსი. 

გიორგი ნიშნიანიძემ (57) პირველივე პაექრობა დათმო უკრაინელ კარიმ კერიმოვთან - 2:12 და გამოვარდა. დავით ქოჩქიანი (92) საკვალიფიკაციო ეტაპზევე დამარცხდა თურქ პოლატ პოლაჩთან - 0:10 და მერე არც მას მიეცა დამამშვიდებელში გადასვლის საშუალება. 

ყოველდღიური სპორტული გაზეთი "ლელო"
455
მკითხველის კომენტარები / 0 /
მსგავსი ამბები
რუბრიკის სხვა სიახლეები
;