ევროპის ჩემპიონატი თავისუფალ ჭიდაობაში: 6 მედალი, არცერთი ოქრო

საქართველოს თავისუფალი სტილით მოჭიდავეთა ნაკრებმა ოქროს გარეშე, თუმცა კი 6 მედლით ჩაამთავრა დაღესტნურ კასპიისკში დღეს დასრულებული ევროპის ჩემპიონატი. გიორგი იანტბელიძის გუნდმა გუშინ რომ ბრინჯაოს 3 მედალი მოიპოვა, უკვე გაცნობეთ, დღეს, 6 მაისს კი მონაგარს 2 ვერცხლი და 1 ბრინჯაო შეჰმატა.

სამწუხაროდ, ფინალში ბექა ლომთაძე (61) და გენო პეტრიაშვილი (125) დამარცხდნენ, რითაც ვერცხლს დასჯერდნენ, ხოლო ბრინჯაო სანდო ამინაშვილმა (86) მოიპოვა. შეგახსენებთ, რომ გუშინ ბრინჯაოს მედლებს ვლადიმერ ხინჩეგაშვილი (65), ზურაბ იაკობიშვილი (70) და ელიზბარ ოდიკაძე (97) დაეუფლნენ.

ლომთაძემ ფინალი დაღესტანელთა ევროპის ჩემპიონთან, მსოფლიოს შარშანდელ ფინალისტ ჰაჯიმურად რაშიდოვთან 1:4 წააგო. სამწუხაროდ, მთელი შეხვედრა მეტოქე ფლობდა უპირატესობას, ლომთაძემ კი ბოლოსღა მოიპოვა ერთი ქულა, რაც უკვე ვერაფერს ცვლიდა.

ძალიან დასანანი და მოულოდნელიც კი იყო პეტრიაშვილის წაგება ფინალში თურქ ტაჰა აკგულთან. ოლიმპიური, მსოფლიოსა და ევროპის რამდენიმეგზის ჩემპიონი თურქი რომ ნამდვილად ძლიერია, ამაზე არავინ კამათობს, მაგრამ გენომ მას შარშან მსოფლიოს ჩემპიონატის ფინალში მოუგო, ამჯერად კი თურქმა ღირსეული რევანში აუღო - 2:1.

თუმცა - ტაქტიკურ ბრძოლაში, თორემ ამ შეხვედრაში ქულა არ გაკეთებულა: მეტოქეებმა თითო ქულა პასიურობისთვის ჩართული 30-წამიანი საჯარიმოს შემდეგ მიიღეს, რასაც თურქმა კიდევ ერთი ქულა წრიდან გაყვანისთვის დაუმატა. ყველაზე დასანანიც ეს ეპიზოდია - იქ გენომ ფეხიდან აიყვანა, მაგრამ ვერ გადააგდო, ტაჰა გაექცა, თუმცა გენოს მისი წრიდან გაყვანა მაინც შეეძლო. ამის სანაცვლოდ, თურქმა გაიყვანა გარეთ და მომგებიანი ქულაც მიიღო.

ამინაშვილი ნახევარფინალში აზერბაიჯანელ ალექსანდრ გოსტიევთან დამარცხდა, ბრინჯაოსთვის შეხვედრაში კი გერმანიის სახელით მოჭიდავე ჩეჩენი ახმედ დუდაროვი 4:4-ზე, დამატებითი მაჩვენებლებით დაამარცხა.

დებიუტანტმა ირაკლი მწითურმა (92), თამამად შეიძლება ითქვას, ბრინჯაოს მედალი ჯიბიდან ამოიღო და საკუთარი ხელით გადასცა უკრაინელ კირილო მიშკოვს: დასრულებამდე 40 წამით ადრე მშვიდად იგებდა 6:0, მაგრამ დარჩენილ დროში 6 ქულა დაკარგა და მოგებაც მეტოქეს გადააბარა.

1159
მკითხველის კომენტარები / 0 /
მსგავსი ამბები
რუბრიკის სხვა სიახლეები