ევროპის ჩემპიონატი: 14 ქართველი და ახალგაზრდების დიდი იმედი

დღეს ფინურ ვანტააში ევროპის ჩემპიონატი აიღებს სტარტს ახალგაზრდა ძიუდოისტთა შორის, რომელშიც 14 ქართველიც მიიღებს მონაწილეობას - 9 ბიჭი და 5 გოგო.

ბიჭებში მთავარი მწვრთნელი ლაშა გუჯეჯიანი ორ წონას - 60-სა და 73-ს ტოვებს, მათ ხარჯზე კი სამ წონას აორებს, ხოლო გოგონებში გია თენაძის გადაწყვეტილებით, 4 წონაში ვიასპარეზებთ. 

შეგახსენებთ, რომ ესაა პირად-გუნდური ჩემპიონატი. 12-14 სექტემბერი პირად პირველობას დაეთმობა, ხოლო 15-ში გუნდური შეჯიბრება ჩატარდება. ის კვლავაც შერეული პრინციპით გაიმართება და მასში ჩვენი ნაკრებიც გამოვა.

შეჯიბრების განრიგი ასეთია: 12 სექტემბერი: 60-66 კილოგრამი ბიჭებში და 48, 52 და 57 კილოგრამები - გოგონებში; 13 სექტემბერი: 73-81 და 63-70 კგ; 14 სექტემბერი: 90-100-+100 და 78-+78 კგ.

66 კილოგრამში ორი მონაწილე გვეყოლება - ლუკა კაპანაძე და გიორგი თუთაშვილი. ორივე მათგანი პირველივე წრიდან ჩაებმება შეჯიბრებაში. კაპანაძე თავიდან პორტუგალიელ ბრუნო ბაროსს დაეჭიდება, ხოლო ამ წყვილის გამარჯვებული მერვედფინალში რუსი ისმაილ მისიროვისა და მოლდოველი ადილ ოსმანოვის დუეტიდან გასულს შეხვდება.

ეს კაპანაძისთვის არცთუ მთლად ხელსაყრელი წილისყრაა, ვინაიდან მისიროვი ამ ჯგუფის ფავორიტი და რეიტინგის ერთ-ერთი ლიდერია. ჭაბუკებში მსოფლიოს ფინალისტი, ხოლო ევროპის შარშანდელი ბრინჯაოს მედალოსანი კაპანაძე ახალი გადმოსულია ახალგაზრდებში და რუსს ჯერ არ შეხვედრია, ასევე არ უჭიდავია პორტუგალიელთან, ხოლო ოსმანოვთან ერთხელაა შენახვედრი და ისიც მოუგო ორი წლის წინ. 

თუთაშვილი თბილისის წლევანდელი „დიდ პრიზის“ ფინალისტია და მისი გამოსვლა ამ ტურნირზე განსაკუთრებულ ინტერესს იწვევს - შეძლებს თუ ვერა სეზონის ისეთივე წარმატებული ჭიდაობით დასრულებას, როგორითაც დაიწყო? ვანტააში მისი პირველი მეტოქე სლოვენიელი ურ კლოპჩიჩია, მოგების შემთხვევაში კი ისიც მერვედფინალში გავა, სადაც ლატვიელ არტიომს გალაქტიონივსსა და ჩეხ იან სვობოდას წყვილის გამარჯვებულს გაეპაექრება.

იმის მიუხედავად, რომ ლატვიელს კარგი რეიტინგი აქვს, თუთაშვილის დონის ფალავანმა ეს ბარიერი უნდა გაიაროს, მეოთხედფინალში კი ყველაზე ძლიერ კონკურენტად ჰოლანდიელი ივო ვერჰორსტერტი უჩანს, ვისთანაც წლეულს ჰოლანდიაში წააგო. ამის მიუხედავად, დაუმარცხებელი არც ის გვგონია და მიგვაჩნია, რომ თუთაშვილს საკმაოდ კარგი ბადე აქვს. 

81 კილოგრამშიც ორი მონაწილე გვყავს და ორივე - ახალი თაობის განსაკუთრებული ტალანტია. მეტადრე - ტატო გრიგალაშვილი, ვინც უკვე მოასწრო უფროსებში რამდენიმე გამარჯვების მოპოვება - მოიგო ბუდაპეშტის „დიდი პრიზი“, ხოლო დიდ შეჯიბრებებზე მესამე იყო თბილისში, ბაქოსა და ზაგრებში. 

ჩვენებურები მეორე წრიდან ჩაებმებიან შეჯიბრებაში. გრიგალაშვილის პირველი მეტოქე უკრაინელი დმიტრო პილიპენკოსა და ესტონელი მარკუს პერელშტაინის პაექრობაში გამოვლინდება, ახალკაცისა კი ახლავეა ცნობილი: შვეიცარიელი სიმონ გაუჩი.

გრიგალაშვილი გამარჯვების შემთხვევაში მომდევნო შეხვედრას მაკედონიელი ედი შერიფოვსკისა და ბოსნიელი ვუკ ელეზის დუეტიდან უძლიერესთან ჩაატარებს, ეს ორი ბარიერი კი რომ ვერ გადალახოს, დიდი სენსაცია იქნება. ამავე ჯგუფშია გიგა აბუაშვილი საფრანგეთიდან, თუმცა გრიგალაშვილი მას მეოთხედფინალამდე ვერ შეხვდება. 

ახალკაცი შვეიცარიელს თუ მოუგებს, მერვედფინალში უნგრელი ბენედეკ ტოტის, თურქი მუჰამედ კოჯისა და მოლდოველი კატალინ მარიანის ტრიოდან გასული იქნება. 

90 კილოგრამშიც ორი მონაწილე გვყავს და თანაც - მოგვარეები: ლაშა და მიხეილ ბექაურები. ახალგაზრდებში მსოფლოს ჩემპიონი ლაშა ბექაური მსოფლიოს რეიტინგის ლიდერია და პირველ წრეში ისვენებს, მეორეში კი ბერძენ ალექსანდროს პატინიოტისსა და ესტონელ სიმონ სულას შორის მოგებულს გაეჯიბრება. მას მეოთხედფინალის სავარაუდო მეტოქეთა შორისაც არ ჰყავს ვინმე გამორჩეულად ძლიერი, ნახევარფინალის შესაძლო კონკურენტთა შორის კი ესპანეთიდან მოჭიდავე ილია ხაბულიანიცაა. 

ევროპის ოლიმპიური ფესტივალის გამარჯვებული და ჭაბუკებში ევროპის ფინალისტი მიხეილ ბექაური პირველი წრიდან ჩაებმება შეჯიბრებაში, სადაც ხორვატ იოსიპ ბულიჩს გაეჯიბრება, ამათში მოგებულს კი შემდეგ წრეში თურქი მერთ სისმანლარი ელოდება. ერთი ქართველი ამ ჯგუფშიც გამოდის - ლუკა ხუსკივაძე საბერძნეთიდან.

ჭაბუკებში ევროპის მესამე პრიზიორი ილია სულამანიძე (100) პირველი წრის პაექრობას იტალიელ ენრიკო ბერგამელისთან გამართავს, ხოლო მოგების შემთხვევაში ახალგაზრდებში ევროპის შარშანდელ კოსოვოელ ფინალისტს (მაშინ ონისე სანებლიძემ მოუგო) - შპატი ზეკაის დაეჭიდება. თუ მასაც მოუგებს, მეოთხედფინალში ახალგაზრდებში აზერბაიჯანელთა შარშანდელ ევროპის მესამე პრიზიორ ადილ კარიმლის ან ლატვიელ ემილს გერკენსს გაეპაექრება. სულამანიძეს დასახელებულთაგან მხოლოდ გერკენსთან აქვს ნაჭიდავები და ის შეხვედრაც წააგო - წლეულს, ლაიბნიცში. 

ჩვენი გუნდის კიდევ ერთი გამოკვეთილი ფავორიტი მძიმეწონოსანი გელა ზაალიშვილია. ლაშა ბექაურის მსგავსად, ისიც მსოფლიოს რეიტინგის ლიდერია და პირველ წრეში ისვენებს. ახალგაზრდებში მსოფლიოს ჩემპიონი ვანტააში შარშან მოპოვებული ევროპის ჩემპიონი ტიტულის დასაცავადაა ჩასული. ის მერვედფინალში პირველ მეტოქედ ბოსნია-ჰერცეგოვინელ იგორ ვრაკარსა და მონაკოელ მარვინ კადეუს შორის უძლიერესს ელოდება.

მეოთხედფინალში გასვლისას ჩვენებურს მეტოქედ საფრანგეთიდან მოჭიდავე ლუკა მხეიძესა და უკრაინელ იავჰენი ბალიევსკის შორის მოგებული ეყოლება.

იაპონელი ჰისაიოში ჰარასავას, ებრაელი ორ სასონის, ჰოლანდიელი როი მეირისა და ამ ყალიბრის ძიუდოისტებთან მოგების შემდეგ (ზოგიერთს რამდენჯერმეც კი აჯობა) ამათთან არ უნდა გვეშინოდეს, ამავე წონაში ჩვენი მეორე მონაწილე საბა ინანეიშვილი კი პირველ წრეში ხორვატ მარცელ სკალეცს ხვდება, ხოლო ამათში მოგებულს კონკურენტად ბოსნიელი ვასილიე ვუიჩიჩი ეყოლება.

ნატალია ყიფშიძე (48) ჩემპიონატში მეორე წრიდან ჩაებმება, სადაც მაინცდამაინც ჯგუფის ლიდერს, რუს ალინა სერგეევას შეხვდა! 

ახალგაზრდებში ევროპის შარშანდელი ფინალისტი და ჩვენი გუნდის ერთ-ერთი ლიდერი ეთერ ლიპარტელიანი (57) პირველ წრეში თავისუფალია, მეორეში კი უნგრელ ანდრეა კარმანსა და ხორვატ დორა ბორტასს შორის მოგებულს შეხვდება. ვფიქრობთ, ლიპარტელიანს ნახევარფინალში გასასვლელად ბრძოლა ჰოლანდიელ პლეუნი კორნელისესთან მოუწევს, ვისაც აქამდე არსად შეხვედრია. 

პირველ წრეში თავისუფალია ახალგაზრდებში ევროპის შარშანდელი მესამე პრიზიორი მარიამ ჭანტურიაც (70). შემდეგ მისი მეტოქე ავსტრიელი ანა-ლენა შუხტერი ან ლიეტუველი დარია პისკუნოვა იქნება, მეოთხედფინალის სავარაუდო მეტოქეთა შორის კი ხორვატი ანდელა ვიოლიჩი, იტალიელი მარტინა ესპოზიტო და სლოვაკი ანა გერსიოვა არიან. 

დაბოლოს, მძიმე წონა, სადაც ორი მონაწილე გვეყოლება. ახალგაზრდებში ევროპის შარშანდელი მესამე პრიზიორი სოფიო სომხიშვილიც მეორე წრიდან ჩაებმება შეჯიბრებაში, სადაც უკრაინელ კრისტინა ჰომანს გაეჯიბრება. თუ მოუგებს (რაც სულაც არ იქნება სენსაცია) მეოთხედფინალშიც გავა, იქ კი ფრანგ ლეა ფონტაინსა და ავსტრიელ მარია ჰოლვარტს შორის მოგებულს შეხვდება. 

სალომე მაყიშვილიც პირველივე წრეში იჭიდავებს და ისიც უკრაინელთან - რუსლანა ბულავინასთან, ამათში მოგებული კი შემდეგ ეტაპზე პოლონელ კინგა ვოლჩჟაკს გაეჯიბრება. 

ყოველდღიური სპორტული გაზეთი "ლელო"
595
მკითხველის კომენტარები / 0 /
მსგავსი ამბები
რუბრიკის სხვა სიახლეები
;