ევროპის ჩემპიონატი 23-წლიანთა შორის. ახლა თავისუფლების ჯერია

სტამბოლში მიმდინარე 23-წლამდელთა ევროპის ჩემპიონატში დღეს თავისუფალი სტილით მოჭიდავები ჩაებმებიან და იასპარეზებს პირველი ხუთეული. ცხადია, მათ შორის ჩვენი ფალავნებიც იქნებიან.

ახალგაზრდებში ევროპის ვიცე-ჩემპიონი რობერტ დინგაშვილი (57) საკვალიფიკაციო ეტაპზე სომეხ კარენ ზურაბიანს შეხვდება, ამათში მოგებულს კი მეტოქედ თურქ ბეკირ შაჰინსა და კოსოვოელ დრილონ სილას შორის უძლიერესი ეყოლება. უკვე აქედანაც ჩანს, რომ დინგაშვილს არცთუ კარგი წილისყრა აქვს, მაგრამ ეს კიდევ არაფერია - რუსი იბრაგიმ ილიასოვიც აქეთაა.

ახალგაზრდებში ევროპის შარშანდელი მესამე პრიზიორი ედემი ბოლქვაძე (65) შედარებით იოლ ჯგუფშია. აქ ყველაზე საშიში აზერბაიჯანელი ანვარბეკ დალგატოვი ჩანს და მასაც მეორე წრეში გადაეყრება, თუმცა მანამდე უკრაინელი ანდრეი სვირიდი უნდა დაამარცხოს.

ახალგაზრდებში ევროპის ბრინჯაოს პრიზიორი გიორგი სულავა (70) საკვალიფიკაციო ეტაპზე სლოვაკ თეიმურაზ სალკაზანოვს შეხვდება, ვისაც აპრილში უფროსებში, ევროპის ჩემპიონატზე ზურაბ იაკობიშვილმა მოუგო. ჩვენებურს მაინცდამაინც ძლიერი მეტოქე არც მომდევნო ეტაპზე უნდა ჰყავდეს - ესტონელ აიმარ ანდრუსესა და შვეიცარიელ მარკ დიჩეს შორის გამარჯვებული. აი, მერე კი - ნახევარფინალში რუსისა და თურქის ბადიდან გასული დახვდება.

20-წლამდელებში ევროპის შარშანდელი ფინალისტი ნიკოლოზ კენჭაძე (79) ჩემპიონატში მეორე წრიდან ჩაებმება, სადაც პოლონელი კრშიშტოფ გრჟეგორჟ სადოვიკის დამარცხებას ეცდება. მიზანს თუ მიაღწევს, მერე მეტოქედ უკრაინელი ჰეორჰი კასაი ან იტალიელი არონ კანევა ეყოლება. ნახევარფინალში სხვებთან ერთად მასაც ელოდება რუსი ან თურქი მოცილე (მანამ მათი გზები იკვეთება).

ასევე მეორე წრიდან (რაც ამ წონაში მეოთხედფინალია) ჩაებმება შეჯიბრებაში გივი მაჭარაშვილიც (97), ვინც ბერძენ ნიაზი იმპისს ხვდება. 23-წლიანებში ევროპის მოქმედი ჩემპიონი მაჭარაშვილი შარშანდელი სეზონის ტრიუმფატორია - 20-წლიანებშიც გახდა კონტინენტის ჩემპიონი, ხოლო მსოფლიოს პირველობაზე ვერცხლი მოიპოვა. ის ახლაც ფავორიტია, თუმცა ნახვარფინალში სავარაუდო მეტოდ რუსი რასულ მაგომედოვი ჰყავს, ვინც მანამ უკრაინელ ოლექსანდრ ბიკანოვს ხვდება.

ამ ხუთეულის გარდა, ჩვენი გუნდის შემადგენლობაში თეიმურაზ ვანიშვილი (61), ავთანდილ კენჭაძე (74), საბა ჩიხრაძე (86), ირაკლი მწითური (92) და როლანდ ანდრიაძე (125) გამოვლენ.

ყოველდღიური სპორტული გაზეთი "ლელო"
1263
მკითხველის კომენტარები / 0 /
მსგავსი ამბები
რუბრიკის სხვა სიახლეები
;