ევროპის ჩემპიონატს ბერძნულ-რომაულებიც იწყებენ

რუმინეთის დედაქალაქ ბუქარესტში გრძელდება ევროპის ჩემპიონატი ჭიდაობაში - თავისუფალი სტილით მოჭიდავეებისგან ესტაფეტას ბერძნულ-რომაული სტილით მოჭიდავეები გადაიბარებენ, რომელთა შეჯიბრება 12-14 აპრილს გაიმართება.

მართალია, ოქროს მედალი ვერ მოვიპოვეთ, მაგრამ "თავისუფლების" გამოსვლა ევროპის ჩემპიონატზე წარმატებული იყო - 2 ვერცხლისა და 4 ბრინჯაოს მედალი მოვიპოვეთ.

ბექა როყვას გუნდი კი ასეთი შემადგენლობით იასპარეზებს ევროპის ჩემპიონატზე: ევროპისა და მსოფლიოს მესამე პრიზიორი ნუგზარ წურწუმია (55), რამაზ სურმანიძე (60), ლევან ქავჟარაძე (63), საჩინო დავითაია (67), რამაზ ზოიძე (72), ბექა მამუკაშვილი (67), მსოფლიოს ბრინჯაოს მედალოსანი ლაშა გობაძე (82), ევროპის ჩემპიონი, მსოფლიოს ორგზის მესამე პრიზიორი რობერტ კობლიაშვილი (87), გიორგი მელია (97) და ევროპის მედალოსანი იაკობ ქაჯაია (130).

გუშინ ბუქარესტში წილისყრა გაიმართა და ქართველმა მოჭიდავეებმა მომავალი მეტოქეების ვინაობა შეიტყვეს. დღეს რუმინეთში ევროპის ჩემპიონატზე წინასწარი და ნახევარფინალური ეტაპის შეხვედრებს გამართავენ ბერძნულ-რომაული სტილით 55, 63, 77, 87 და 130 კგ კატეგორიის ფალავნები. დღეს ხალიჩაზე საქართველოს ღირსებას ნუგზარ წურწუმია (55), ლევან ქავჟარაძე (63), ბექა მამუკაშვილი (77), რობერტ კობლიაშვილი (87) და იაკობ ქაჯაია (130) დაიცავენ.

წურწუმია სომეხ მკრტჩიანს ხვდება, გამარჯვების შემთხვევაში, კი აზიზლისა (აზერბაიჯანი) და კოლომპარის (სერბეთი) დაპირისპირების მოგებულს შეხვდება.

ქავჟარაძე 1/4 ფინალიდან იწყებს, მისი მეტოქე უნგრელი კოვაჩი იქნება. მამუკაშვილის მეტოქე ავსტრალიელი ვაგნერია. კობლიაშვილი პირველ შეხვედრაში პოლონელ მიკალიკს დაუპირისპირდება. რაც შეეხება მძიმეწონოსან ქაჯაიას, მისი პირველი მეტოქე ფინელი ლაჰტი იქნება.

ყოველდღიური სპორტული გაზეთი "ლელო"
1050
მკითხველის კომენტარები / 0 /
მსგავსი ამბები
რუბრიკის სხვა სიახლეები
;