ევროპის ჩემპიონთა თასისა და ჩელენჯ კაპის გათამაშებაში ჯგუფური ეტაპი დასრულდა - პლეი ოფში მხოლოდ ორი

ევროპის ჩემპიონთა თასისა და ჩელენჯ კაპის გათამაშებაში ჯგუფური ეტაპი დასრულდა. მომდევნო ეტაპზე, ანუ მეოთხედფინალში ორივე ტურნირზე ქართველ მორაგბეთა მხოლოდ ორი გუნდი გავიდა. ჩემპიონთა თასზე ბრძოლას „რასინგი“, ხოლო ჩელენჯ კაპისთვის ასპარეზობას „კლერმონი“ განაგრძობს.

ვასილ კაკოვინისა და გურამ გოგიჩაშვილის „რასინგმა“ D ჯგუფში ექვსი თამაშიდან ხუთი მოიგო და პირველობა არავის დაუთმო. ბოლო ტურში პარიზელებმა უელსურ „ჰლანეჰლის“ უმასპინძლეს და უხვლელოიან მატჩში 46:33 დაამარცხეს. აღსანიშნავია, 53-ე წუთამდე სტუმრები ანგარიშში წინ იყვნენ და 26:22 იგებდნენ. „რასინგმა“ მეტოქე საბოლოოდ დასკვნით 20 წუთში გატეხა.

ახალგაზრდა ქართველი შერკინების ბურჯი გურამ გოგიჩაშვილი ძირითად შემადგენლობაში შესანიშნავად გაისარჯა და 49-ე წუთზე შეცვალეს, კაკოვინი განაცხადში არ იყო. მეოთხედფინალში პარიზელები შინ ფრანგულ „ტულუზს“ უმასპინძლებენ.

პლეი ოფში გასვლის შანსს ბოლომდე ინარჩუნებდა მიხეილ ნარიაშვილის, კონსტანტინე მიქაუტაძის, უჩა ჭეიშვილის, ლევან ჩილაჩავასა და გელა აფრასიძის „მონპელიე“, რომელიც E ჯგუფის ბინადარი იყო. ჩვენებურთა გუნდის მეტოქე ბოლო ტურში გასვლით მატჩში ჯგუფის ლიდერი, შოტლანდიური „ედინბურგი“ იყო. მონპელიელებმა მასპინძლების დამარცხება ვერ შეძლეს - 10:19 დათმეს და პლეი ოფის მიღმა დარჩნენ.

ჩილაჩავა თამაშში 31-ე წუთიდან ჩაერთო, ჭეიშვილი მოედანზე 67-ე წუთიდან გამოჩნდა, ნარიაშვილი დისკვალიფიცირებულია, მიქაუტაძე განაცხადში არ იყო.
მიუხედავად იმისა, რომ ჯგუფიდან გასვლის შანსი აღარ ჰქონდა, სტუმრად ინგლისურ „ნიუკასლთან“ შესანიშნავად იასპარეზა მამუკა გორგოძის „ტულონმა“, რომელიც ასევე E ჯგუფში ასპარეზობდა. ტულონელებმა მეტოქეს 27:24 მოუგეს და საბოლოოდ მესამე ადგილს დასჯერდნენ. გორგოძე ძირითად შემადგენლობაში იყო და 61-ე წუთზე შეცვალეს.

როგორც უკვე აღვნიშნეთ, ჩელენჯ კაპის გათამაშებაში ქართველ მორაგბეთა გუნდებიდან პლეი ოფში მხოლოდ დავით ზირაქაშვილის, ბექა კაკაბაძისა და ვიქტორ კოლელიშვილის „კლერმონი“ გავიდა. „ვულკანებმა“ A ჯგუფში ექვსი თამაშიდან ექვსივე საპრემიო ქულით მოიგეს და მაქსიმუმი - 30 ქულა დააგროვეს.
ბოლო ტურში „კლერმონმა“ უელსში, „ნიუპორტის“ წინააღმდეგ ითამაშა და დიდი ანგარიშით 49:7 გაიმარჯვა. კაკაბაძე ძირითად შემადგენლობაში იყო და 31-ე წუთზე შეცვალეს. ზირაქაშვილს და კოლელიშვილს არ უთამაშიათ.

„კლერმონი“ მეოთხედფინალში ისევ თანაჯგუფელ ინგლისურ „ნორსჰემპთონს“ დაუპირისპირდება, რომელმაც ბოლო ტურში შინ დიდი ანგარიშით დაამარცხა რუმინული „ტიმიშოარა“ - 111:3.

მომდევნო ეტაპზე გასვლის თეორიულ შანსს ინარჩუნებდა B ჯგუფში მოასპარეზე გიორგი მელიქიძის „სტად ფრანსე“. პარიზელებმა სტუმრად წააგეს ლიდერ ინგლისურ „ვორსტერთან“ 31:36 და ჯგუფში მესამე ადგილს დასჯერდნენ. მელიქიძე თადარიგში იყო და თამაშში 53-ე წუთიდან ჩაერთო.

მიზერული, მაგრამ მაინც შანსი გაუშვა ხელიდან C ჯგუფში მოასპარეზე ბექა გორგაძის, ლექსო ყაულაშვილისა და ლაშა ტაბიძის „ბორდომ“, რომელმაც ბოლო ტურში შინ წააგო უშუალო კონკურენტთან, ირლანდიურ „ქონოთთან“ - 27:33. ქართველებიდან არავის უთამაშია.

კატასტროფული მარცხი განიცადა კრასნოიარსკის „ენისეიმ“ სტუმრად ინგლისურ „ბრისტოლთან“ - 19:107. მიხეილ გაჩეჩილაძემ სრულად ითამაშა, შალვა მამუკაშვილი 41-ე წუთზე შეცვალეს, დავით კაჭარავა ტრავმირებულია.

9-9 ქულით დაასრულეს ასპარეზობა და შესაბამისად E ჯგუფში მესამე-მეოთხე ადგილები გაყვეს ქართველ მორაგბეთა გუნდებმა „აჟენმა“ და გრენობლმა“. მე-6 ტურში ორივე მათგანი დამარცხდა. ქართველებიდან კი, მხოლოდ „გრენობლში“ მოთამაშე შერკინების ბურჯმა დავით ქუბრიაშვილმა ითამაშა. „ალპელები“ შინ დამარცხდნენ იტალიურ „ბენეტონთან“ - 7:39, ქუბრიაშვილი მოედანზე 33-ე წუთიდან გამოჩნდა.

ყოველდღიური სპორტული გაზეთი "ლელო"
974
მკითხველის კომენტარები / 0 /
მსგავსი ამბები
რუბრიკის სხვა სიახლეები
;