ევროპის ჩემპიონობაც და ანთიმოზ ივერიელის თასიც ჩვენია! [VIDEO]

საქართველოს ნაკრებმა რაგბი ევროპის ჩემპიონატის მატჩში უშუალო კონკურენტი რუმინეთი 25:16 დაამარცხა. 

მეტ ნაკლებად თანაბრად ჩატარებული პირველი ტაიმის შემდეგ "ბორჯღალოსნებმა" ინიციატივა ხელთ იგდეს და მეორე ტაიმში რუმინელებისთვის გამარჯვების შანსი აღარ მიუციათ.

ანგარიში მე-7 წუთზე სოსო მათიაშვილმა საჯარიმო დარტყმით გახსნა, ხოლო 21-ე წუთზე ლაშა ლომიძემ მოლის შემდეგ ბურთი მარტივად დადო მეტოქის ჩათვლის ხაზში (გარდასახვა მათიაშვილმა შეასრულა).

ბურთი კი მარტივად დავდეთ, მაგრამ ბრძოლა მძიმეა, რუმინელები არაფერს გვითმობენ და ერთხელ ლელოსთანაც ძალიან ახლოს იყვნენ...

მეორე ტაიმის დასაწყისში მეორე ლელო დადო ანზორ სიჭინავამ, გარდასახვა კვლავ შედეგიანად შეასრულა მათიაშვილმა. მანვე 47-ე წუთზე საჯარიმო დარტყმით სხვაობას სოლიდური სახე მისცა - 20:6.

საქართველო 25 ქულამდე ეფექტური ლელოთი კარლენ ასეიშვილმა აიყვანა, ბოლო წუთებზე კი რუმინელების ერთი ლელო გაგვეპარა და, როგორც მოგახსენეთ, 25:16 გავიმარჯვეთ.

მატჩის შემდეგ ქართველებზე არანაკლებ გახარებულები რუმინელები იყვნენ, რომლებმაც მსოფლიოს თასი 2019-ზე თამაში დაიბევეს. ამ საქმეში მათ ბელგიელები დაეხმარნენ, რომლებმაც ესპანეთი 18:10 დაამარცხეს.

მატჩის შემდეგ საქართველოს ნაკრებს ორი მშვენიერი თასი გადაეცა: რაგბი ევროპის ჩემპიონისა და ანთიმოზ ივერიელის სახელობისა.

1177
მკითხველის კომენტარები / 0 /
მსგავსი ამბები
რუბრიკის სხვა სიახლეები