ევროპის წამყვანი კლუბები ფიფას წინააღმდეგ. რატომ არ სურთ მათ თამაში მსოფლიოს საკლუბო ჩემპიონატზე?

მაიამიში ფიფას კონგრესზე რამდენიმე ძალიან საინტერესო საკითხი განიხილეს, მათ შორის, მსოფლიოს 2022 წლის ჩემპიონატის მონაწილეთა რაოდენობის გაზრდა 48 ნაკრებამდე, მსოფლიო საკლუბო ჩემპიონატთან ფორმატის შეცვლა, ერთა ლიგის გლობალიზაცია და საერთაშორისო მატჩების კალენდრის შედგენა და ასე შემდეგ.

lelo.ge მოკლედ უკვე შეეხო ამ თემებს და ინფორმაციაც გაქვთ, მაგრამ მკითხველის ინტერესიდან გამომდინარე, საჭიროდ მივიჩენიეთ თემა უფრო განვავრცოთ, მით უმეტეს, ევროპამ უკვე გამოხატა რეაქცია ფიფას გადაწყვეტილებების მიმართ...

ყატარი და 48 ნაკრები

პირველად, მსოფლიო ჩემპიონატის ფინალური ეტაპის მონაწილეთა რაოდენობის გაზრდის თაობაზე ჯერ კიდევ 2013 წელს ითქვა. მაშინ ზეპ ბლატერმა ბრძანა, რომ ეს შესაძლებელი იქნებოდა აზიური და აფრიკული გუნდების რაოდენობის გაზრდით ევროპული ნაკრებების შემცირების ხარჯზე. საბოლოოდ, მონაწილეთა რაოდენობა იგივე დარჩა, უბრალოდ, ევროპა "შეიკვეცა".

ამასთან დაკავშირებით, მაშინ შემხვედრი ინიციატივით გამოვიდა უეფას პრეზიდენტი მიშელ პლატინი. მან თქვა, რომ აზიას და აფრიკას დამატებითი ადგილები უნდა მიეცეთ, მაგრამ არა - ევროპის ხარჯზე, არამედ იმით, რომ მონაწილეთა რაოდენობა 40-მდე უნდა გაიზარდოს. ბლატერი ამის წინააღმდეგი წავიდა. ის მიიჩნევდა, რომ 32 გუნდი ოპტიმალური რაოდენობა იყო. ამ საკითხს საფეხბურთო თემი 2015 წელს დაუბრუნდა, მაგრამ ფიფა მაშინაც ვერ მივიდა საბოლოო გადაწყვეტილებამდე...

მოგვიანებით, ბლატერმა სკანდალით დატოვა პოსტი და მის ნაცვლად თანამდებობაზე ჯანი ინფანტინო აირჩიეს. ჯერ კიდევ წინასაარჩევნო კამპანიის დროს მან განაცხადა, რომ ბოლომდე უჭერს მხარს მუნდიალის მონაწილეთა რაოდენობის გაზრდას.

"40 გუნდი, ეს არის 19 პროცენტი ფიფას წევრების რაოდენობის. ვფიქრობ, ეს არ არის საკმარისი", - ამბობდა მაშინ ინფანტინო.

და აი, მან აღასრულა დანაპირები. 2017 წელს, ფიფას კონგრესზე მიღებული გადაწყვეტილების შესაბამისად, მუნდიალის მონაწილეთა რაოდენობა 48 გუნდამდე გაიზარდა. ანალიტიკოსებმა დაიანგარიშეს, რომ ეს რეფორმა ფიფას დამატებით 640 მილიონ დოლარს მოუტანს, გასავალი კი მხოლოდ 300 მილიონი იქნება. ამის გათვალისწინებით, მიიღეს კიდეც გადაწყვეტილება გუნდების რაოდენობის გაზრდის თაობაზე. მაშინ ითქვა, რომ ცვლილებები ძალაში 2026 წლის მუნდიალიდან შევიდოდა...

მაგრამ გადაწყდა, რომ ცვლილება ძალაში შევა ახლავე, უკვე ყატარული მუნდიალიდანვე. ამას თან ახლავს გარკვეული სირთულეები. ბევრი მიიჩნევს, რომ მნიშვნელოვნად გაიზრდება უინტერესო მატჩების რაოდენობა. გარდა ამისა, დიდი შანსია, რომ ყატარი ვერ აუვიდეს ამდენი მატჩის ჩატარებას. ცეცხლზე ნავთს ასხამს ისიც, რომ ყატარს ცუდი ურთიერთობა აქვს მეზობელ ქვეყნებთან - საუდის არაბეთთან, ბაჰრეინსა და არაბთა გაერთიანებულ საამიროებთან. შეიძლება თანამასპინძლობის განხილვა ქუვეითსა და ომანთან.

ახალი საკლუბო ჩემპიონატი

ფიფას ეგიდით საკლუბო ჩემპიონატი 2005 წლიდან ტარდება და ის ყოველთვის დეკემბერში იმართებოდა. ტურნირში აქამდე სულ 7 კლუბი მონაწილეობდა. შედარებით იოლია ევროპული გუნდების გზა. ისინი შეჯიბრებას იწყებენ ნახევარფინალიდან, იოლად გადიან ფინალში და ხდებიან ჩემპიონები.

ინფანტინო მიიჩნევს, რომ ტურნირს ეფექტურობა ბოლომდე დაკარგული აქვს. ამიტომ მან საფეხბურთო საზოგადოებას ორი რეფორმა შესთავაზა: პირველი - გაიზარდოს გუნდების რაოდენობა 7-დან 24 კლუბამდე, და მეორე - მსოფლიოს საკლუბო ჩემპიონატი უნდა ჩატარდეს 4 წელიწადში ერთხელ, კონფედერაციათა თასის გათამაშების ნაცვლად. რა თქმა უნდა, ეს რეფორმაც დიდ ფინანსებს უკავშირდება.

ახალი ტურნირის დებიუტი ჩანიშნულია 2021 წლისთვის. მონაწილე კლუბებს უშუალოდ ფიფა შეარჩევს. ევროპიდან ფეხბურთის მმართველი ორგანო "რეალის", "ბარსელონას", "ლივერპულის", "მანჩესტერ იუნაიტედის", "იუვენტუსის", "ინტერის", "მილანის", "ბაიერნის", "პარი სენ ჟერმენის" და "აიაქსის" მიწვევას აპირებს. კიდევ არის დამატებითი სია, საიდანაც მხოლოდ 2 კლუბი შეირჩევა - "მანჩესტერ სიტი", "ჩელსი", "ატლეტიკო", "პორტუ", "ბენფიკა" და "დორტმუნდი." უეფამ ფიფას წინადადებისგან თავი შორს დაიჭირა და ეს იმით ახსნა, რომ საკმარისი დასაბუთება ვერ მიიღო.

ინფანტინომ 2018 წლის მარტში განაცხადა, რომ გამოჩნდა ინვესტორი, რომელიც მზად იყო ამ პროექტში ჩართვისთვის, ასევე, გლობალური ერთა ლიგის ფორმატის მხარდაჭერისთვის. ლაპარაკი 25 მილიონ დოლარზე. გაირკვა, რომ მასში მონაწილეობდნენ აზიური "სოფტბანკი" და მავანი საუდელი ინვესტორები.

როცა იურისტებმა დოკუმენტები გამოითხოვეს, შოკში ჩავარდნენ - აღმოჩნდა, რომ ფიფა ტურნირის ჩატარების გარკვეულ უფლებებს სწორედ ამ ინვესტორებს გადასცემდა, რაც წარმოუდგენელი ამბავია. თუმცა ინფანტინო ამ პროექტს მხოლოდ "საპილოტეს" უწოდებს.

როგორც უნდა იყოს, ფიფას ამ რეფორმას არ აქვს მხარდაჭერა უეფასგან, რაც პროექტის განხორციელებას ამ ეტაპზე შეუძლებელს ხდის. უეფას გარდა, პროექტის წინააღმდეგია ევროპის კლუბების ასოციაცია (ECA, პრეზიდენტი ანდრეა ანიელი/იუვენტუსი), რომელიც შიშობს, რომ ფიფა მაინც განახორციელებს მას თუნდაც კომერციული ინტერესებიდან გამომდინარე.

ECA-მ სპეციალური წერილიც შეიმუშავა და ხელმოწერებით აფრინა ფიფაში (იხ. ფოტო). თემის აქტუალობიდან გამომდინარე, "დოიჩე ველეს" ინტერვიუ მისცა გერმანიის საფეხბურთო კავშირის პრეზიდენტმა რაინჰარდ გრინდელმა, რომელმაც 5 მთავარ საკითხზე გაამახვილა ყურადღება:

1) ევროპული კლუბების გარეშე საკლუბო მუნდიალის ჩატარებას აზრი არ აქვს. ამიტომ, უეფას პოზიცია სერიოზული თავსატეხი იქნება ფიფასთვის, რომელიც იძულებული გახდება, ანგარიში გაუწიოს ამ პოზიციას.

2) ვინ შეარჩევს მონაწილეებს ამ ტურნირისთვის? ან რა კრიტერიუმებით შეარჩევს? ჩვენ ვფიქრობთ, რომ ეს არ უნდა იყოს ფიფა. კლუბების შერჩევაზე პასუხისმგებელნი უნდა იყვნენ შესაბამისი ასოციაციები და კონფედერაციები.

3) ECA წინააღმდეგია ტურნირში 8 ევროპული კლუბის მონაწილეობის, რადგან ეს კონკურენციას შეუქმნის ჩემპიონთა ლიგას. მეორე მხრივ, ევროპის ზოგიერთი კლუბი, შეიძლება, მართლაც იყოს დაინტერესებული ახალ ფორმატში მონაწილეობით.

4) საკლუბო ჩემპიონატის უპირატესობა ის არის, რომ თანხა დარჩება მხოლოდ ფეხბურთს და კლუბებს, და არა - მხოლოდ მათ სპონსორებს. წინა ვარიანტში სოლიდარობის ვარიანტი საერთოდ იგნორირებული იყო.

5) თუ ჩვენ არ ჩავატარებთ ამ ტურნირს, მაშინ უპირატესობას ხელში აიღებენ კერძო ინვესტორები, რომლებიც არ გაითვალისწინებენ კლუბების ინტერესებს და სოლიდარული გადახდის ფაქტორს.

874
მკითხველის კომენტარები / 0 /
მსგავსი ამბები
რუბრიკის სხვა სიახლეები
;