ევროტურნირების წინ. ტორპედო შერიფს ქუთაისში ვერ უმასპინძლებს?

გავრცელდა ინფორმაცია, რომლის თანახმადაც, ჩემპიონთა ლიგის პირველ საკვალიფიკაციო ეტაპზე "ტორპედომ" ტირასპოლის "შერიფს", შესაძლოა, ქუთაისში ვერ უმასპინძლოს...

ინფორმაციის საფუძველი გახდა "რამაზ შენგელიაზე" ფეხბურთის ფედერაციის სტადიონების ლიცენზირების ჯგუფის სტუმრობა, რომელმაც ხარვეზები აღმოაჩინა. ჯგუფის დასკვნებზე დაყრდნობით, სფფ-მ სტადიონის მეპატრონეს (სტადიონი ქუთაისის მერიის ბალანსზეა) პრობლემების გამოსწორება დაავალა.

კონკრეტულად, დასახელდა განათებისა და კანალიზაციის პრობლემები. გასახდელებში სუნი იგრძნობა და პერსონალისა და მაყურებლისთვის განკუთვნილ საპირფარეშოებში სანიტარული ნორმები მოსაგვარებელია. ასევე მიუთითეს გარკვეულ ადგილებში ფასადის მოწესრიგებასა და პრესლოჟის მოწესრიგების

აუცილებლობასა და კიდევ რამდენიმე საკითხზე.
მაგრამ პრობლემები არ მოგვარებულა. სწორედ ამის გამო გაჩნდა ვარაუდი, რომ უეფას მეორე კატეგორიის "რამაზ შენგელიას" ნაცვლად, შესაძლოა, შეხვედრათბილისში ჩატარდეს.

ამაზე ქუთაისელ გულშემატკივარს მკვეთრად უარყოფითი რეაქცია ჰქონდა:

"ამის გამო ყველაზე მეტად გუნდი დაზარალდება, რადგან ქუთაისელი გულშემატკივრების უმეტესობა თბილისში გამგზავრებას ვერ შეძლებს".

"გააკეთეთ სტადიონი დროზე! როგორ შეიძლება გუნდს ელემენტარული პირობები არ ჰქონდეს! ერთი გამაგებინეთ, ქალაქის ხელმძღვანელობა რას აკეთებს? ეს თქვენი სირცხვილი იქნება, თორემ გუნდი ვისაც უყვარს, თბილისში წავა, თამაშს უყურებს და გუნდს უგულშემატკივრებს".

"ეს კანალიზაციისა და განათების ელემენტარული საკითხები როგორ ვერ უნდა მოგვარდეს? რა ხდება?"

"ნორმალური თამაში გვეღირსა და ისიც თბილისში? რატომ არ ინძრევით დროულად?".

არსებული ცნობით, საბოლოო გადაწყვეტილებას მატჩის კომისარი მიიღებს, რომელმაც შესაძლოა შეხვედრის ჩატარება თბილისში მოითხოვოს.

იყო პრობლემები, მაგრამ არა ისეთი, რომ ვერ მოგვარდეს და გუნდში იმედოვნებენ, რომ უახლოეს პერიოდში ყველაფერი თავის ადგილზე დადგება. მეტიც, გვითხრეს, რომ დიდი ალბათობით, შეხვედრა ქუთაისში ჩატარდება. ზუსტი პასუხი კი უახლოეს დღეებში გვეცოდინება.

ამასობაში, ქუთაისელთა მეტოქე ძლიერდება. "შერიფის" ოფიციალური ვებ-გვერდის ცნობით, ტირასპოლის გუნდში სერბი ფეხბურთელი დაიმატეს - ის 25 წლის ცენტრალური მცველი ვლადიმირ კოვაჩევიჩია. მოლდოვის ჩემპიონმა და სერბმა მცველმა კონტრაქტი 17 ივნისს გააფორმეს.

სერბული ნოვი სადის "ვოივოდინას" აღზრდილი 25 წლის კოვაჩევიჩის ბოლო გუნდი ბელგიური "კორტრეიკი" იყო. მას სერბეთის ყველა ასაკობრივ ნაკრებში უთამაშია, 2016 წელს კი ეროვნულ გუნდშიც მიიწვიეს. თუმცა, გუნდის შეკრებებზე სისტემატურად არ იწვევენ და სერბეთის ნაკრების ფორმა მხოლოდ მოირგო.

სამტრედიას თამაშის დღე  შეუცვალეს

"ლელოს" ინფორმაციით, "სამტრედიას" და "ჩიხურას" პრობლემა, დიდი ალბათობით, გადაიჭრა. შეგახსენებთ, რომ ევროპალიგის წილისყრით, "ჩიხურამ" და "სამტრედიამ" პირველი მატჩები 12 ივლისს შინ უნდა ჩაატარონ - საჩხერელები ისრაელის "ბეითარს" შეხვდებიან, ხოლო სამტრედიელები - კუსტანაის "ტობოლს". პრობლემაც სწორედ ამან შექმნა - ამ გუნდების სტადიონები უეფას სტანდარტებს ვერ აკმაყოფილებს და ორივემ ევრომატჩების საშინაო არენად მიხეილ მესხის სახელობის სტადიონი მიუთითა. ერთ დღეს და ერთ სტადიონზე ორი მატჩის გამართვა კი შეუძლებელია.

როგორც "ჩიხურას" მთავარი მწვრთნელი, სოსო ფრუიძე ვარაუდობდა, გასული წლის პრეცედენტი განმეორდა. ანალოგიური პრობლემა შარშანაც შეიქმნა და მაშინ "ჩიხურას" თამაში ორი დღით გვიან დანიშნეს. სხვა გამოსავალი არც ახლა იყო და როგორც გვითხრეს, ახლა თამაშის გადატანა "სამტრედიას" შეეხო - "ტობოლს" "მიხეილ მესხზე" 10 ივლისს უმასპინძლებს.

როგორც ყაზახური მედიიდან გავარკვიეთ, სტადიონის პრობლემა კუსტანაის გუნდსაც შეექმნა. ამის შესახებ გაზეთ "კუსტანაის სიახლეებთან" "ტობოლის" პრეზიდენტმა ნიკოლაი პანინმა ილაპარაკა:

"მაისის ბოლოს ინსპექტირებაზე უეფას სპეციალისტი ინგლისელი მარკ ბლექბერი ჩამოვიდა. ის არენაზე დილის 10 საათიდან საღამოს 7-მდე მუშაობდა. ჩვენი სტადიონი უეფაში გამოცხადებულია მეორე კატეგორიის სტადიონად.

მაგრამ გუნდი ჯგუფურ ეტაპზე თუ მოხვდება, მეორე კატეგორია ამ დონეს არ შეესაბამება - იქ მხოლოდ მესამე კატეგორიის სტადიონებზე დაიშვება თამაში. შენიშვნა ინსპექტორის მხრიდან იყო, მაგრამ არა - მოუგვარებელი. ის დაბრუნდა და დასკვნა მოამზადა, ჩვენ კი აღნიშნული ხარვეზების აღმოსაფხვრელად უკვე ვმუშაობდით. ეს 1 ივლისამდე უნდა მოვასწროთ და უეფას ფოტოანგარიში გავუგზავნოთ".

ევროპაიგაზე გამოსვლის გამო, "ტობოლმა" ყაზახეთის პრემიერლიგაში სამი თამაშის დღე შეცვალა.

ყოველდღიური სპორტული გაზეთი "ლელო"
1554
მკითხველის კომენტარები / 0 /
მსგავსი ამბები
რუბრიკის სხვა სიახლეები
;