[ანალიზი, VIDEO] ევრო 2020. გიბრალტარი 2-3 საქართველო. სირცხვილის ზღვარზე

ევრო 2020. საკვალიფიკაციო მატჩი. D ჯგუფი
გიბრალტარი-საქართველო    2:3
15.10. გიბრალტარი. ვიქტორია სთედიუმი
0:1 ხარაიშვილი (10. შენგელიას პასით), 0:2 კანკავა (20), 1:2 კაშიარო (67. ბრიტოს პასით), 2:2 . ჩიპოლინა (74. მუელის პასით), 2:3 ქვილითაია (84. შენგელიას პასით)
გიბრალტარი (4-2-3-1): გოლდუინი - სერჯენტი, . ჩიპოლინა, . ჩიპოლინა, ოლივერო - მუელი (81. . ერნანდესი), ბადრი - . კაშიარო, . უოლკერი (90. პონსი), ბრიტო - დე ბარი.
სათადარიგოები: ბანდა, ჯოლი, პონსი, გარსია, პაუერი, კუმბსი, სანტოსი, კაფერი, ანტ. ერნანდესი, სტაიჩი, ბარნეტი
მწვრთნელი: ხულიო სესარ რიბასი
საქართველო (4-2-3-1): ლორია - კაკაბაძე, ხოჭოლავა, გრიგალავა, ნავალოვსკი (90. კვირკველია) - კანკავა, ხარაიშვილი (60. კიტეიშვილი) - ყაზაიშვილი, ანანიძე, შენგელია - ლობჯანიძე (68. ქვილითაია)
სათადარიგოები: მაკარიძე, კუპატაძე, აბურჯანია, ტაბიძე, დაუშვილი
მწვრთნელი: ვლადიმირ ვაისი
გაფრთხილება: ბადრი (45), ხოჭოლავა (49), სერჯენტი (56)
არბიტრი: პაოლო ვალერი (იტალია)


საქართველოს ნაკრებმა მეორე გამარჯვება მოიპოვა ევროპის ჩემპიონატის შესარჩევ ციკლში. მეორედაც დავამარცხეთ გიბრალტარი, რომელსაც ყველა უგებს, მაგრამ გამარჯვება მაინც სასიამოვნოა.

არადა, როგორი საქმეა - კინაღამ ფრედ ვითამაშეთ პოლიციელებით, მუსიკოსებითა და მშენებლებით დაკომპლექტებულ ნაკრებთან...

ვაისის ცვლილებები

ცნობილი იყო, რომ საქართველოს ნაკრებს გიბრალტართან შეხვედრის წინ დააკლდებოდნენ ვაკო გვილია, თორნიკე ოქრიაშვილი, გურამ კაშია და საბა ლობჟანიძე. ამან თავისთავად გამოიწვია ცვლილებები ჩვენი გუნდის სასტარტო შემადგენლობაში.

დაცვის ცენტრში ვიხილეთ დავით ხოჭოლავა. ისევ სათადარიგოთა სკამზე დარჩა საბა კვირკველია. ჯიმი ტაბიძემ დაცვის მარცხენა ფლანგზე ადგილი გიორგი ნავალოვსკის დაუთმო. საყრდენ ზონაში გამოჩნდა გიორგი ხარაიშვილი - საფიქრებელია, რომ ოთარ კიტეიშვილის მცირე ტრავმის გამო.

ოქრიაშვილი ლევან შენგელიამ ჩაანაცვლა, შეტევის ფორპოსტზე კი გიორგი ქვილითაიას ნაცვლად ელგუჯა ლობჯანიძე ვიხილეთ.

ხარაიშვილი გვჭირდება!

საქართველოს ნაკრებმა ანგარიში მე-10 წუთზე გახსნა. ლევან შენგელიამ შესანიშნავი პასი გაუკეთა გიორგი ხარაიშვილს, რომელმაც კარგად ჩამოიღო ბურთი და კარში შეაგორა. ამით მან ვლადიმირ ვაისს საყურადღებო მესიჯი გაუგზავნა. ეს იყო ხარაიშვილის სადებიუტო გოლი ნაკრებში.

ზოგადად, ის ერთობ სასარგებლო იყო პირველი წუთიდანვე. მალე გიორგი ნავალოვსკის პასის შემდეგ ხარაიშვილმა კინაღამ მეორეც შეაგდო - თავური მცირედით ასცდა მიზანს.

ნაპრალები დაცვაში

უპირატესობა ვერ გავაორმაგეთ და ორჯერ კინაღამ დავისაჯეთ კიდეც. განსაკუთრებით სახიფათო იყო დე ბარის მომენტი. გვესმის, გიბრალტარია და კონცენტრაცია იკარგება, მაგრამ ოდნავ უფრო მაღალი კლასის მეტოქე დაცვაში ასეთ ჩავარდნებს არ გვაპატიებს. ასე განსაჯეთ, არც ბელარუსი თუ ლუქსემბურგი.

რა თქმა უნდა, გიბრალტართან ასეთი მოდუნება არ არის კარგი, თუმცა მეტოქე ისეთი გვყავდა, რამდენსაც გვინდოდა და როცა გვინდოდა, მაშინ გავუტანდით, თუკი კონცენტრაციას ბოლომდე შევინარჩუნებდით და ხარისხიც მაღალი გვექნებოდა.

კანკავაა თუ ზარბაზანი?

მე-20 წუთზე საქართველოს ნაკრების უპირატესობა ორბურთიანი გახდა - გოლის ნახვა კი ერთ რამედ ღირდა: ჯაბა კანკავას უშორესმა და უძლიერესმა დარტყმამ მიზანს უწია. გოლი და შესრულება ისეთი იყო, ხელს ნებისმიერი დიდოსტატი რომ მოაწერდა, თუმცა ვერც იმას ვიტყვით, რომ დარტყმა აუღებელთა კატეგორიას განეკუთვნებოდა.

ტაიმი ისე გაილია, მეტი პრაქტიკულად აღარაფერი მომხდარა, ეგაა, გიბრალტარი ოდნავ უკეთესი გამხდარა იმაზე, ვიდრე ადრე იყო...

ლორიამ გვიხსნა, ხარაიშვილი დაგვიშავდა

მეორე ტაიმი საქართველოს ნაკრებმა ოდნავ მოდუნებულმა დაიწყო. ალბათ, იმოქმედა 2-ბურთიანმა ფორამ. გვქონდა ერთი მომენტი, მერე კი გიორგი ლორიამ გვიხსნა - დე ბარის დარტყმულს თითის წვერები წაატანა, თორემ გოლი გარდაუვალი ჩანდა...

მერე სერჯენტი შეასკდა ხარაიშვილს და კარგად გამრჯე ნახევარმცველი დაგვიშავა. გიორგიმ თამაში ვერ გააგრძელა - მინდვრიდან საკაცით გასაყვანი გახდა. თამაშში ოთარ კიტეიშვილი ჩაერთო...

იქვე დე ბარმა კიდევ ერთხელ შემოგვიტია და კვლავ ცოტა დააკლდა გოლამდე - ლორიას გასცდა, მაგრამ მახვილი კუთხიდან ვეღარ შეაგდო. ჩვენი დაცვა ერთხელაც ჩავარდა. ეს იყო და, მერე ჩვენ უნდა გაგვეტანა ორჯერ - ვაკო ყაზაიშვილსა და ოთარ კაკაბაძეს კარგი მომენტები გაუცუდდათ...

ორი გოლი გავუშვით... ორი!

გიბრალტარი ისე უტევდა და იმდენ შეცდომას ვუშვებდით დაცვაში, რომ უნდა გაგვეშვა და... გავუშვით კიდეც. იმ ეპიზოდში ჩვენმა დაცვამ ძალიან ცუდად ითამაშა - ბრიტომ ლი კაშიაროს შეუსრიალა ბურთი საჯარიმოში და მეტოქემ ანგარიში "დაასველა".

გიბრალტარის ნაკრების პირველი გოლი მიმდინარე შესარჩევში! პატარა ამბავია, მაგრამ მაინც - ჩვენ ხომ კარგად ვიცით სხვისი ისტორიების წერა!..

მალევე ლორიამ 100-პროცენტიან გოლს გადაგვარჩინა - "ცხრიანიდან" მოუხსნა ბურთი ლაიამ უოლკერს, მაგრამ იქვე როი ჩიპოლინას არავინ შეუშალა ხელი და აგერ, მეორეც გავუშვით - 2:2!

ასე გადაგვარჩინა ქვილითაიამ...

საშვილიშვილო სირცხვილს გადავურჩით - ლევან შენგელიამ მეორე საგოლე პასი მიითვალა, როცა გიორგი ქვილითაიას მისამართით გასწვრივი გადაცემა გააკეთა და ახლო მანძილიდან ზუსტი დარტყმით კვლავ წინ გავედით - 3:2.

მაგრამ ეს ბევრს ვერაფერს ცვლის - არ შეიძლება ასე თამაში, როცა ეროვნული ნაკრების მაისურა გაცვია! არ შეიძლება დღენიადაგ ქართული ფეხბურთის პროგრესზე ლაპარაკი, როცა გიბრალტარს ძლივს უგებ!

ფაქტია, ერთა ლიგაზე მიღწეული წარმატების მიუხედავად, ნაკრებში კვლავ სერიოზული პრობლემები გვაქვს და როცა ასეთ გუნდებთან სირცხვილის ზღვარზე ვართ, პროგრესზე ვერ ვილაპარაკებთ!.. 

ყოველდღიური სპორტული გაზეთი "ლელო"
8661
მკითხველის კომენტარები / 8 /
Emigranti
0
vaisi ar axsenot, iq ar iyo.
დევი
1
ეს შედეგი თავიდან ბოლომდე ფეხბურთელების კისერზეა
მსგავსი ამბები
რუბრიკის სხვა სიახლეები
;