[ევრო 2021] საკვალიფიკაციო მატჩი. ზედიზედ მეორე! ცეცაძემ სიტყვა შეასრულა

აზერბაიჯანი-საქართველო    0:3
10.09. ბაქო. დალგა არენა
0:1 არველაძე (45+3. ლოჩოშვილის პასით), 0:2 ბუღრიძე (73. არაბიძის პასით), 0:3 არაბიძე (84)
აზერბაიჯანი (4-2-3-1): იბრაჰიმოვი - საიდიევი, თამაზოვი, სეილოღლი, მანაფოვი - ჰაჯიევი, სეიდოვი - ნაბიევი (46. მაგერამლი), იბრაჰიმლი (46. ჯაფარგულიევი), ეკინჯიერი (86. ბაირამლი) - ოქსიუზი
სათადარიგოები: ზაკიევი, სულეიმანოვი, მურადოვი, გაიალი, ატლამი, გურბანლი
მწვრთნელი: მილან ობრადოვიჩი
საქართველო (3-4-3): გუგეშაშვილი - ბერიაშვილი, ლოჩოშვილი, კობოური - მალი (86. სპანდერაშვილი), ნინუა (70. კოხრეიძე), კუცია, სილაგაძე -  არაბიძე, ქავთარაძე (70. ბუღრიძე), არველაძე (78. კიტეიშვილი)
სათადარიგოები: მამარდაშვილი, ანდრონიკაშვილი, უგრეხელიძე, ლაკვეხელიანი
მწვრთნელი: გიორგი ცეცაძე
გაფრთხილებები: თამაზოვი (24), ჰაჯიევი (26), კობოური (29), სეიდოვი (39), სეიდოვი (51), არაბიძე (52)
გაძევება: ჰაჯიევი (48. მეორე ყვითელი)
არბიტრი: ლორენ კოპრივა (ლუქსემბურგი)


საქართველოს ახალგაზრდული ნაკრებმა 2021 წლის ევროპის ჩემპიონატის შესარჩევი ციკლი მოგებით დაიწყო და ბაქოშიც 3 ქულას გეგმავდა - გუნდის მთავარი მწვრთნელი გია ცეცაძე გუნდს ახალი ევროშესარჩევის დაწყებამდე სწორედ ამ განწყობით ამზადებდა...

მეორე მოგების იმედად

ლიხტენშტაინთან გუნდმა მიზანს მიაღწია, ახლა აზერბაიჯანი იყო რიგში, რომელსაც სერბი მილან ობრადოვიჩი წვრთნის - სერბი ფეხბურთელი, რომელსაც "დორტმუნდში" უთამაშია, ბოლოს კი სერბეთის ნაკრების მწვრთნელის ასისტენტი იყო. აზერბაიჯანელებმა პირველი მატჩი ლიხტენშტაინთან წააგეს (0:1), მაგრამ შინ სლოვაკეთი 2:1 დაამარცხეს და საქართველოს მადააღძრული ელოდნენ...

გუნდს ავადმყოფობის გამო ბაქოში ორი ფეხბურთელი - დავით სამურკასოვი და თორნიკე ძებნიაური დააკლდა, დანარჩენები კი მწყობრში იყვნენ. საინტერესოა, რომ აზერბაიჯანელთა შორის ფარიდ ნაბიევი თამაშობდა - თბილისის "შევარდენის" ყოფილი ფეხბურთელი.

გოლი გასახდელში

შეხვედრა საქართველოს ახალგაზრდულმა ნაკრებმა თამამად და კარგად დაიწყო. გია ცეცაძის გუნდმა ბურთი გააგორა და უპირატესობა მოიპოვა. რაც მთავარია, სტუმრებმა რეალური საგოლე მომენტები შექმნეს. მე-8 წუთზე კარის აღებას ნიკა ნინუა ცდილობდა, მაგრამ მიზანს ააცილა. მე-12 წუთზე კარის ჩარჩოს უკვე ვატო არველაძემ დაუმიზნა, მაგრამ გოლის გატანა ვერ მოახერხა.

მე-16 წუთზე საქართველოს ანგარიშის გახსნის კარგი შანსი ჰქონდა: გიორგი არაბიძემ მშვენიერი გადაცემით ნიკა მალი ფლანგზე კარგ პოზიციაზე გაიყვანა, ამ უკანასკნელმა კარის წინ ჩააწოდა - ბექა ქავთარაძის დარტყმას მცველი გადაეფარა, ხოლო დამატებაზე არველაძეს მეკარე კამრან იბრაგიმოვმა არ გაატანინა.

ამის შემდეგ მასპინძლებმა ჯერ თამაში გაათანაბრეს, შემდეგ კი მცირე ტერიტორიული უპირატესობაც მოიპოვეს. მასპინძლებმა პირველი მწვავე შეტევა 25-ე წუთზე განახორციელეს: ფარიდ ნაბიევი ორ მცველს გასცდა და კარში დაარტყა, მაგრამ ჩვენმა მეკარე ლუკა გუგეშაშვილმა საიმედო ითამაშა.

პატარა ჩავარდნის შემდეგ, ჩვენი ნაკრები ისევ გააქტიურდა და ისევ შეუტია. 35-ე წუთზე საქართველომ კიდევ ერთი შეტევა განახორციელა, გატანას ამჯერადაც არველაძე ცდილობდა, მაგრამ მეკარემ ისევ კარგად ითამაშა. 42-ე წუთზე კი ნიკა ნინუამ მასპინძელთა კარის აღება საჯარიმოთი სცადა და მეკარემ ბურთი ისვე მოიგერია.

მაგრამ მასპინძელთა მეკარე ყველაზე მნიშვნელოვან დროს შეცდა: პირველი ტაიმის მესამე დამატებულ წუთზე, არაბიძის მიერ ჩაწოდებულ ბურთზე შეცდა, შეტევაში ჩართულმა ლუკა ლოჩოშვილმა ბურთი არველაძეს დაუგორა, რომელიც შემოტრიალდა და აზერბაიჯანელებს გოლი "გასახდელში" გააყოლა - 0:1.

მეორე გოლი კაცნაკლულებს

მეორე ნახევარში მდგომარეობის გამოსასწორებლად და შეტევების გასაძლიერებლად აზერბაიჯანელთა სერბმა მთავარმა მწვრთნელმა მილან ობრადოვიჩმა ერთდროულად ორი შეცვლა განახორციელა.

აზერბაიჯანელები არა მხოლოდ აქტიურობდნენ, საკმაოდ უხეშობდნენ კიდეც და ამის გამო მეორე ნახევრის დაწყებიდან სამ წუთში 10 კაცით დარჩნენ: ჰაგიაჯა ჰაჯიევმა უხეშად მოცელა ნიკა ნინუა, რომელმაც აზერბაიჯანელთა კაპიტანს ბურთი აართვა. ლუქსემბურგელმა არბიტრმა ლორენ კოპრივამ კი მას მეორე ყვითელი ბარათი უჩვენა და მოედანი დაატოვებინა.

 57-ე წუთზე, ნინუასა და ბექა ქავთარაძის მიერ გათამაშებულ კომბინაციას არველაძის დუბლი მოჰყვა. ერთ წუთში იბრაჰიმოვმა ნიკა მალის უძლიერესი დარტყმის შემდეგ ბურთი "ცხრიანიდან" მოხსნა. 61-ე წუთზე შორიდან უკვე ნინუამ სცადა ბედი და კარს სანტიმეტრებში ააცილა.

არაბიძე-ბუღრიძის შედეგიანი დუეტი

68-ე წუთზე, აზერბაიჯანელებს მეკარეც დაუშავდათ და იბრაჰიმოვი შაჰინ ზაკიევმა შეცვალა. პატარა პაუზის შემდეგ თამაში განახლდა და გია ცეცაძემ, შეტევების გასაძლიერებლად, მოედანზე ორი თავდამსხმელი - ირაკლი ბუღრიძე და გიორგი კოხრეიძე შეუშვა.

ამან შედეგი მალევე გამოიღო: კოხრეიძემ ჩვენი საჯარიმოდან შეტევა მოიგერია, არველაძემ გრძელი გადაცემით გიორგი არაბიძე მოძებნა, რომელმაც კარის წინ ირაკლი ბუღრიძე შენიშნა და 0:2.

83-ე წუთზე ჩვენებმა აზერბაიჯანელების კარი მესამედაც აიღეს და ამჯერად წინა გოლის გმირებმა როლები შეცვალეს: ლუკა სილაგაძემ საჯარიმოში ბუღრიძე მოძებნა, რომელმაც არაბიძეს უპასა, რომემაც საჯარიმოს სიახლოვიდან კარგად და ეფექტურად მოჭრა 0:3.

ეს აუცილებლად სათქმელია - გიორგი არაბიძე აშკარად შეცვლილია. ბავშვური ასაკი და საკუთარ ინდივიდუალიზმზე გართულება წარსულს ჩააბარა, დაღვინებულია და იმედია, მას ეროვნულ ნაკრებშიც მიეცემა შანსი. ახალგაზრდულში ნაჩვენები ფეხბურთით ეს ნიჭიერი ბიჭი ამ შანსს ნამდვილად იმსახურებს.

...აზერბაიჯანელებმა რეალური საგოლე მომენტი 88-ე წუთზე შექმნეს, მაგრამ მეკარესთან პირისპირ გასულმა მუსა გურბანლიმ კარს ააცილა.

საბოლოოდ, საქართველოს ახალგაზრდულმა ნაკრებმა დამაჯერებლად გაიმარჯვა, 2 შეხვედრაში 6 ქულა დააგროვა და მეორე შესარჩევ ჯგუფში 6 ქულით დაწინაურდა.

მეტოქეები

ლიხტენშტაინი-შვეიცარია     0:5
გოლები: 0:1 ზეჩირი (40), 0:2 ზეჩირი (49), 0:3 ნდოი (74), 0:4 ოკაფორი (77),  0:5 სტოჟილკოვიჩი  (90+3)

1. საქართველო 2 2 0 0 7:0 6
2. შვეიცარია 1 1 0 0 5:0 3
3. ლიხტენშტეინი 3 1 0 2 1:9 3
4. აზერბაიჯანი 3 1 0 2 2:5 3
5. სლოვაკეთი 1 0 0 1 1:2 0
6. საფრანგეთი 0 0 0 0 0:0 0

საქართველოს ნაკრების მომდევნო მატჩები

10 ოქტომბერი
შვეიცარია-საქართველო

15 ნოემბერი
საფრანგეთი-საქართველო

18 ნოემბერი
სლოვაკეთი-საქართველო

26 მარტი, 2021
საქართველო-სლოვაკია

4 სექტემბერი, 2021
საქართველო-საფრანგეთი

ყოველდღიური სპორტული გაზეთი "ლელო"
2289
მკითხველის კომენტარები / 0 /
მსგავსი ამბები
რუბრიკის სხვა სიახლეები
;