ეკატერინე გორგოძემ იანჩუკი დაამარცხა და იანჩუკს შეხვდება

სტამბოლში დაიწყო ჩოგბურთელ ქალთა საერთაშორისო ტურნირი (საპრიზო ფონდი 25 000 დოლარი), რომელშიც ეკატერინე გორგოძე მონაწილეობს.

ქართველმა ჩოგბურთელმა პირველი ბარიერი წარმატებით გადალახა. ერთეულების სტარტზე იგი ხორვატ ანა ვრლიჩს შეხვდა. ეს ჩოგბურთელები პირველად შარშანაც თურქეთში - ანკარის 50 000-იან შეჯიბრებაში დაუპირისპირდნენ ერთმანეთს. მაშინ გორგოძემ მეტოქეს იოლად აჯობა - 6:3, 6:2.

ჩვენებურს გამარჯვება არც ამჯერად გასჭირვებია: 33 წლის ხორვატს საათსა და 20 წუთში მოუგო - 6:2, 6:4. ანამ მატჩში 6 ორმაგი შეცდომა დაუშვა, გორგოძემ - ერთი, ბრეიკპოინტების გამოყენების მხრივ ორივეს, ფაქტობრივად, თანაბარი მდგომარეობა ჰქონდა - ვრლიჩს - 4/6-დან, ეკატერინეს - 7/9-დან. ქართველი ჩოგბურთელი მეორე წრეში ტურნირზე მე-7 ნომრად განთესილ ოლგა იანჩუკს (უკრაინა) გაუწევს მეტოქეობას.

საგულისხმოა, რომ გორგოძე გუშინ უკვე შეხვდა ოლგა იანჩუკს, ოღონდ წყვილებში. თურქ მელის სეზერთან შეამხანაგებულმა ქართველმა ჩოგბურთელმა იოლად დაჯაბნა ოლგა იანჩუკისა და ელა კაიევიჩის (ხორვატია) დუეტი - 6:0, 6:4. საამისოდ მხოლოდ 54 წუთი ეყო. არადა, ქართულ-თურქულმა ტანდემმა 4 ორმაგი შეცდომა დაუშვა და 8-დან მხოლოდ 4 ბრეიკპოინტი გამოიყენა. მეტოქეს ერთხელ მიეცა ამის შესაძლებლობა და ისიც - უშედეგოდ.

მეოთხედფინალში გორგოძესა და სეზერს სერიოზული მეტოქე ეყოლებათ - ასპარეზობის რეიტინგფავორიტები - აიალა აქსუ (თურქეთი) და ანა ვესელინოვიჩი (მონტენეგრო).

ყოველდღიური სპორტული გაზეთი "ლელო"
3085
მკითხველის კომენტარები / 0 /
რუბრიკის სხვა სიახლეები