[VIDEO+ანალიზი] ელიზბარ ოდიკაძემ რუსი მუსაევი 9:0 აგორავა და თბილისში მედლით დაბრუნდა

ელიზბარ ოდიკაძემ (97) ბრინჯაოს მედალი მოიპოვა ვლადიკავკაზში ჩატარებულ საერთაშორისო ტურნირში "ალანები". ევროპის ვიცე-ჩემპიონი და მსოფლიოს მესამე პრიზიორი ნახევარფინალში დამარცხდა მასპინძელთა ევროპის ჩემპიონ ვლადისლავ ბაიცაევთან, ბრინჯაოსთვის პაექრობაში კი ჩვენმა ფალავანმა დაღესტანელი შამილ მუსაევი 9:0 დაამარცხა. სამწუხაროდ, ვლადიკავკაზში უმედლოდ დარჩა მსოფლიოს მოქმედი ჩემპიონი ბექა ლომთაძე (61) - ის მეოთხედფინალში დამარცხდა დაღესტანელ მაგომედ მაგომედოვთან და მერე სანუგეშო წრეში გადასვლის საშუალებაც აღარ მიეცა, რადგან მაგომედოვმა ნახევარფინალური პაექრობა დათმო თანაგუნდელ რამაზან ფერზალიევთან. ბარემ აქვე გეტყვით, რომ ფრიად წარმომადგენლობით ტურნირზე მედალი მხოლოდ შვიდი ქვეყნის წარმომადგენელმა მოიპოვა - საკუთრივ რუსეთმა, ჩვენ, აშშ-მ, ირანმა, უზბეკეთმა, მონღოლეთმა და ბელარუსმა.

ოდიკაძე ტურნირში მერვედფინალიდან ჩაერთო, სადაც 5:2 დაამარცხა რუსეთის წარმომადგენელი აზრეტ შოგენოვი. ამ პაექრობაში შოგენოვი 2:0 დაწინაურდა, მაგრამ შემდეგ ოდიკაძემ თავისი "მანქანა" ჩართო: ფეხში წარმატებული შესვლით ჩოქბჯენში ჩაიყვანა მეტოქე, მერე კი იქვე დაატრიალა. ამის შემდეგ ოდიკაძემ კიდევ ერთი პაექრობა მოიგო, რასაც ბაიცაევთან წაგება მოჰყვა, ბრინჯაოსთვის ორთაბრძოლაში კი დამაჯერებლად დაამარცხა მუსაევი. ქართველმა დასაწყისში ისიც დაახლოებით ისეთივე კისრულზე წამოიღო, როგორიც რიო დე ჟანეიროს ოლიმპიადაზე ამერიკელთა მომავალ ოლიმპიურ ჩემპიონ კაილ სნაიდერს გაუკეთა (მან მოიგო წლევანდელი "ალანები" - ფინალში ბაიცაევს სძლია), ოღონდ ამჯერად ეს 2-ქულიანი გდება იყო. ამის შემდეგ მან თავისი საფირმო ფეხში შესვლებით აუღო ქულები მეტოქეს, თუმცა ამას რამდენიმე კარგი კომბინაციაც მიაყოლა და მუსაევთან იმაზე კიდევ უფრო მეტი უპირატესობით იმარჯვამ ვიდრე ეს თუნდაც ასეთი სოლიდური ანგარიშიდან ჩანს.

ლომთაძემ ერთი ხმაურიანი გამარჯვება მოიპოვა - პირველივე შეხვედრაში დაამარცხა რუსთა ბურიატი ფალავანი ალექსანდრ ბოგომაევი, ვისთანაც ოთხი წლის წინ ბაქოში, პირველი ევროპული თამაშების ფინალში დამარცხდა. ამჯერად მას ლომთაძე მერვედფინალში შეხვდა და დამაჯერებლად აუღო რევანში - 7:1. არადა, ქუთაისელი ათლეტი ლამის მთელი შეხვედრა 0:1 აგებდა, მაგრამ მეორე წუთის დასაწყისში სპრინტერული შეტევა წამოიწყო - საოცარი სისწრაფით ეკვეთა ბოგომაევს და თვალის დახამხამებაში, სულ რაღაც 10-ოდე წამში ზურგიდან შემოვლაც მოასწრო, ჩოქბჯენში ჩაყვანაც და - დატრიალებაც. არსებითად, შეხვედრის ბედიც აქ გადაწყდა, თუმცა ლომთაძე მაინც აგრზელებდა მაღალ ტემპში შეტევას და ფეხიდან აყვანილი ერთხელაც გადააგდო. სამწუხაროდ, მეოთხედფინალში ვერაფერს გახდა ზემოხსენებულ მაგომედოვთან და საბოლოოდ მაინც უმედლოდ დარჩა.

5251
მკითხველის კომენტარები / 0 /
მსგავსი ამბები
რუბრიკის სხვა სიახლეები
;