ელიტა მენის კუნძულზე - მოჭადრაკეთა დიდი საერთაშორისო ტურნირი

გაერთიანებული სამეფოს გვირგვინის მიწა - ასე მოიხსენიებენ მენის კუნძულს, რომელიც ირლანდიის ზღვაში მდებარეობს, დაახლოებით ერთსა და იმავე მანძილზე ინგლისიდან, ირლანდიიდან, შოტლანდიასა და უელსიდან. ზედიზედ მეექვსე წელიწადია, აქ მოჭადრაკეთა დიდი საერთაშორისო ტურნირები (FIDE Chess.com Grand Swiss) იმართება.

წლეულს მისი საპრიზო ფონდია 432.000 დოლარი. შეჯიბრებაში 42 ქვეყნის 154 წარმომადგენელი მონაწილეობს. მათ შორის არიან მსოფლიოს მოქმედი ჩემპიონი მაგნუს კარლსენი (ნორვეგია, 2876) და ჩემპიონის გვირგვინისთვის მისი კონკურენტი ფაბიანო კარუანა (აშშ, 2812). მათ გარდა, ტურნირში საპრიზო ადგილებისთვის 2700-იანთა კლუბის 20 მამაკაცი იბრძვის.

ელიტის მოძალება არ არის შემთხვევითი, რადგან ასპარეზობის გამარჯვებული 70.000 დოლარით დაჯილდოვდება. მეორე-მეხუთე ადგილებზე საპრიზო თანხა ასეთია: 50.000 - 40.000 - 35.000 - 30.000. სულ 30 პრიზი გათამაშდება. ქალებში 6 ფულადი პრიზია. პირველ-მესამე ადგილებზე გასულნი, შესაბამისად, 10.000 - 8.000 და 6.000 დოლარს მიიღებენ. 

გამარჯვებულებსა და პრიზიორებს შვეიცარიული სისტემით 11 ტური გამოავლენს. უკვე მიილია ექვსი ტური. 5-5 ქულით პირველ-მეორე ადგილებს ვან ჩაო (ჩინეთი) და ფაბიანო კარუანა იყოფენ. შვიდი მოჭადრაკე, მათ შორის - მაგნუს კარლსენი, მათ ნახევარ-ნახევარი ქულით ჩამორჩება.

მენის კუნძულზე სამი ქართველი დიდოსტატიც იმყოფება, თუმცა მათი შედეგები ჯერჯერობით მოკრძალებულია: ივან ჩეპარინოვი 3.5 ქულით 36-ე ადგილზეა, ბაადურ ჯობავას 2.5 ქულით 108-ე, ხოლო ნინო ბაციაშვილს 2 ქულით 142-ე ადგილი უკავია, თუმცა ქალთა მარათონში მან დაწინაურებულ მანდილოსნებზე ნახევარი ქულით ნაკლები მოაგროვა. 

დღეს მეშვიდე ტურის პაექრობები გაიმართება.

ყოველდღიური სპორტული გაზეთი "ლელო"
170
მკითხველის კომენტარები / 0 /
მსგავსი ამბები
რუბრიკის სხვა სიახლეები
;