ეროვნული ლიგა. VI ტურის მიმოხილვა: ცხრილში ლოგიკა, მატჩებში პირიქით

ეროვნული ლიგის გუნდებმა პირველი წრის ნახევარი მოილიეს და უკვე გარკვეული დასკვნების გაკეთებაც შეიძლება. ყოველ შემთხვევაში, სატურნირო ცხრილი მეტ-ნაკლებად კი არა, თითქმის რეალურად ასახავს თითოეული გუნდის მიზანს...

არადა, ჯერ მხოლოდ 6 ტურია გასული და ეროვნული ლიგის ცხრილი აშკარად ლოგიკურად გამოიყურება: ანუ, ლიდერთა ჯგუფშიც ის გუნდები არიან, სეზონის დაწყების წინ უმთავრეს ფავორიტებად რომ მივიჩნევდით. თითქმის იგივე სიტუაციაა ცხრილის ქვედა ნაწილშიც, სადაც მყოფ გუნდებს, ბევრის აზრით, სწორედაც რომ ეროვნულ ლიგაში ადგილის შენარჩუნებისათვის უნდა ებრძოლათ.

თუმცა, არც ის გაუკვირდეს ვინმეს, უახლოეს მომავალში თუ არა, ზაფხულის სატრანსფერო პერიოდის შემდეგ მაინც რომ შეიცვალოს ძალთა თანაფარდობა სატურნირო ცხრილში. ყველაფერს თავი რომ დავანებოთ, მოქმედი ჩემპიონი "ტორპედო" რომ წლეულსაც მხოლოდ და მხოლოდ მაქსიმალური მიზნებისთვის იბრძოლებს, ამაში ეჭვი ნამდვილად არ გვეპარება.

არც ის არის გამორიცხული, რომ დღესდღეობით არასახარბიელო სატურნირო სიტუაციაში მყოფმა ამა თუ იმ გუნდმა, სასიამოვნო სიურპრიზი შესთავაზოს საკუთარ გულშემატკივარს და წარმატებული სერიით სატურნირო მიზნებიც შეიცვალოს.

მით უფრო, რომ ამის მართლაც მშვენიერი მაგალითი გვაქვს - ჩემპიონატის დაწყების წინ, ალბათ, არც არავინ მოელოდა "დილას" ასეთ წარმატებულ ასპარეზობას. არადა, პირველი წრის ნახევარი გავიდა და გორელთა გუნდი კვლავაც ლიდერთა შორის იმყოფება.

"დილა" არც ამჟამად დამარცხებულა, თუმცა, ეს არ იყო გასული ტურის უმთავრესი მოვლენა: ყველაფერს თავი რომ დავანებოთ, ამ უქმეებზე ხომ ერთმანეთზე საინტრიგო ორი მატჩი, ორი დერბი გაიმართა...

ნაღდი, დედაქალაქური!..

როგორც მოსალოდნელი იყო, დედაქალაქური დერბი საინტერესოდ და დაძაბულად წარიმართა. ლიდერთა ამ დაპირისპირებას მხოლოდ ერთადერთი მინუსი ჰქონდა, ოღონდ, ამას ხომ ისედაც შეგუებული ვიყავით: "დინამოსა" და "საბურთალოს" დაპირისპირება აშკარად უფრო მეტ მაყურებელს იმსახურებდა.

"დინამომ" ამ სეზონში მეორე მატჩი წააგო და ისე როგორც I ტურის შეხვედრაში ("რუსთავთან"), კახა კაჭარავას გუნდი არც ამჯერად იმსახურებდა დამარცხებას. თუმცა, როცა ამდენ მომენტს შექმნი მეტოქის კართან, რეალიზაციის ხარისხზეც უნდა იფიქრო. ამ კომპონენტში კი ჩვენი ყველაზე ტიტულოვანი კლუბის შემტევები აშკარად მოიკოჭლებდნენ.

ოღონდ, არც ის უნდა დაგვავიწყდეს, მეტოქესაც რომ გაუცუდდა, ფაქტობრივად, 100-პროცენტიანი მომენტი პირველ ტაიმში: იმ ეპიზოდს ვგულისხმობთ, "საბურთალოს" გამოცდილმა ცენტრფორვარდმა დიმიტრი ტატანაშვილმა უაღრესად ხელსაყრელი პოზიციიდან ბურთი დაუცველ კუთხეში ზუსტად რომ ვერ გაგზავნა...

...V ტურში, როცა მანამდე 100-პროცენტიანი შედეგის მქონე "საბურთალო", ბევრისთვის მოულოდნელად დამარცხდა "ლოკომოტივთან", ეროვნული ლიგის ლიდერს იმდენი მომენტი ჰქონდა, ზოგი ჩვენი გუნდი 5-6 მატჩის განმავლობაში რომ ვერ მოაგროვებდა. ყველაზე ძალიან კი "საბურთალოს" გამოცდილ ნახევარმცველს, თორნიკე გორგიაშვილს არ უმართლებდა იმ მატჩში (განსაკუთრებით - პირველ ტაიმში), როცა ორ ეპიზოდში უაღრესად ხელსაყრელი პოზიციიდან ვერ გაიტანა.

და აი, "დინამოსთან" მატჩში, 29 წლის გორგიაშვილმა მიმდინარე სეზონის, უდავოდ, ყველაზე ეფექტური გოლი გაიტანა: მეტოქის საჯარიმოში ჩინებულად გაერკვა სიტუაციაში და "მოჭრილი" დარტყმით ბურთი "დინამოს" კარის შორეულ "ცხრიანში" გაგზავნა.

აი, მანამდე და ამის მერე კი მოვლენათა ეპიცენტრში "საბურთალოს" მეკარე და კაპიტანი, 22 წლის ლაზარე კუპატაძე გახლდათ, რომელმაც თავის კარიერაში, ალბათ, საუკეთესო მატჩი ჩაატარა და უდიდესი წვლილი შეიტანა საკუთარი გუნდის გამარჯვებაში.

სხვათა შორის, კუპატაძე ზედიზედ მეორე სეზონია "საბურთალოს" მეკარეებში არსებული უდიდესი კონკურენციის პირობებში არ თმობს ძირითადი მეკარის სტატუსს და ამ გუნდის მთავარი მწვრთნელის, გიორგი ჭიაბრიშვილის არჩევანიც აბსოლუტურად გამართლებული მიგვაჩნია, როცა ამ სეზონის დაწყების წინ კაპიტნის სამკლავური ლაზარე კუპატაძეს ანდო...

წაგების მიუხედავად, "დინამოზე" აუგი არავის არ უნდა დასცდეს, მით უფრო იმის გათვალისწინებით, თუ რა საკადრო პრობლემებით შეხვდა კახა კაჭარავას გუნდი ამ დედაქალაქურ დერბის.

თუმცა, ვიტალი დარასელიას სახელობის "დინამოს" საფეხბურთო აკადემიიდან მთავარ გუნდში ხომ ერთიმეორეზე ნიჭიერი ბიჭების დაწინაურების პროცესსაც მიჩვეული ვართ: 18 წლის თამაზ ბაბუნაძემ უმაღლეს ლიგაში პირველი მატჩი ჩაატარა და თავი აქტიური თამაშითაც დაგვამახსოვრა.

ველოდებით გაგრძელებას

ფეხბურთში, ყოველთვის და ყველგან არსებობს "უხერხული მეტოქის" ფაქტორი და გამონაკლისი, რაღა თქმა უნდა, არც საქართველოს ჩემპიონატია. სწორედ ასეთ უხერხულ მეტოქედ იქცა მოქმედი ჩემპიონისათვის "ჩიხურა", თანაც, განსაკუთრებით, საშინაო მატჩებში. მოკლედ, ბოლო წლებია, იშვაითი გამონაკლისის გარდა, სოსო ფრუიძის დამოძღვრილი "ჩიხურა" 3 ქულით ბრუნდება ქუთაისიდან...

ასე მოხდა ამჯერადაც. თანაც, "დინამო"-"საბურთალოს" მატჩის მსგავსად, ეს იმერული დერბიც იმავე სცენარით წარიმართა: "ტორპედოს" შეტევებს (განსაკუთრებით - მეორე ტაიმში) ბოლო არ უჩანდა, მაგრამ შეხვედრის მიწურულს, საჩხერელთა გუნდის 23 წლის შემტევის, თეიმურაზ მარკოზაშვილის უზუსტესმა დარტყმამ "ჩიხურას" გამარჯვება მოუტანა.

ეს გუნდები შარშან საქართველოს თასის ფინალში რომ შეხვდნენ ერთმანეთს, პენალტების სერიაში "ჩიხურამ" იმარჯვა. წლეულს, სეზონის პირველ ოფიციალურ მატჩში (სუპერთასზე), კახა ჩხეტიანის ხელმძღვანელობით მოასპარეზე "ტორპედომ" რევანში აიღო და დავით პეტრიაშვილის სახელობის სტადიონზე გამართულ

იმ დაპირისპირებაში ყველაფერი ბოლო წუთებზე (უფრო ზუსტად - წამებზე) გადაწყდა.
ამჯერადაც ყველაფერი ბოლო წუთებზე გაირკვა, ოღონდ, უკვე "ჩიხურას" სასარგებლოდ მოხდა ყველაფერი და, რაღა თქმა უნდა, ველოდებით გაგრძელებას...

უიღბლობის სერიალი

ეს მართლაც უიღბლობაზე მეტია: მიმდინარე სეზონში სულ სამი ავტოგოლი დაფიქსირდა და სამივე შემთხვევაში "ლოკომოტივის" ფეხბურთელების შესრულებით. ჯერ ვატო არველაძეს "აეჭრა" ბურთი საკუთარი კარის მიმართულებით, შემდეგ - რომან ჭანტურიას, ამ ტურში კი "ლოკომოტივის" კაპიტანს ნიკა ჭანტურიას...

...უიღბლობა "ლოკომოტივს" სხვა შემთხვევებშიც "საკმარისზე მეტი" აქვს: ამა თუ იმ მატჩში ხელსაყრელი მომენტების გამოუყენებლობასაც ვგულისხმობთ და წამყვანი ფეხბურთელების ტრავმიანობასაც.

ამასობაში კი პირველი წრის ნახევარი მიილია და არცთუ ურიგო ფეხბურთელებით დაკომპლექტებული გუნდი სატურნირო ცხრილის ბოლოში იმყოფება. აი, "სიონს" კი ნებისმიერი მეტოქისათვის რომ შეუძლია პრობლემის შექმნა, ამ ტურმაც დაამტკიცა.

ისე, როგორც უკვე მერამდენე წელიწადია ამტკიცებს თავის გოლიადორულ შესაძლებლობებს ბოლნისელთა გუნდის კაპიტანი ჯაბა დვალი, რომლის გოლითაც "სიონმა" უაღრესად საჭირო გამარჯვება მოიპოვა და სატურნირო მდგომარეობაც საგრძნობლად გამოასწორა.

რესურსი არის

ამ სეზონის დაწყების წინ, ჩემპიონატის ფავორიტთა შორის, ბევრი "რუსთავსაც" ასახელებდა: ეროვნული ლიგის დებიუტანტ გუნდში ხომ ერთი-მეორეზე ცნობადი ახალწვეულები ჩაირიცხნენ.

ახალი მწვრთნელის, ვლადიმირ გაზაევის ხელმძღვანელობით მოასპარეზე "რუსთავმა" საიუბილეო, XXX ჩემპიონატი მართლაც რომ ხმაურიანი სენსაციით დაიწყო, როცა გასვლით მატჩში დაამარცხა თბილისის "დინამო".

თუმცა ამას ზედიზედ 3 მარცხი მოჰყვა და უკვე იმაზე ალაპარაკდა ხალხი, რომ ახალი მწვრთნელის მოწვევაც შეცდომა იყო და რამდენიმე ახალწვეულიც რომ ვერაფრით სჯობდა წინა სეზონის ფორმაციის "რუსთავის" ფეხბურთელებს, დღესდღეობით სხვადასხვა ქართულ გუნდში რომ აგრძელებენ კარიერას.

მაგრამ, ამ წარუმატებელ სერიას უკვე საპირისპირო გაგრძელება მოჰყვა: "რუსთავმა" ზედიზედ 2 მატჩი მოიგო ერთნაირი ანგარიშით (2:0), სახიფათო ზონასაც ჩამოშორდა და მესამეადგილოსან "ჩიხურასაც" მხოლოდ 3 ქულით ჩამორჩება.

"ლელოს" გუშინდელ ნომერში უკვე ვწერდით "რუსთავი"-"კოლხეთის" მატჩის ერთ-ერთ გამორჩეულ ფეხბურთელზე, 22 წლის შემტევზე ზაზა ციცქიშვილზე, რომელმაც უმაღლეს ლიგაში სადებიუტო გოლი გაიტანა.

სამაგიეროდ, ყურადღება არ გაგვიმახვილებია იმ ფაქტზე, რომ "რუსთავში" საგრძნობლად იზრდება კონკურენცია: ტრავმის მერე დაბრუნდა ეროვნული ლიგის ერთ-ერთი საუკეთესო მარჯვენა მცველი ლევან გეგეჭკორი, ასევე ტრავმა მოირჩინა ნიჭიერმა შემტევმა, 22 წლის თამაზ მაქაცარიამ, ამას გარდა, სულ მალე "რუსთავში" დებიუტი უნდა ჰქონდეს დღესდღეობით ერთ-ერთ ყველაზე ნიჭიერ ახალგაზრდა ქართველ ფეხბურთელს.

და, რაც მთავარია, ტრავმის შემდეგ "რუსთავის" მაისურით პირველი მატჩი ჩაატარა საიუბილეო ჩემპიონატის ყველაზე ტიტულოვანმა და ასაკოვანმა ფეხბურთელმა, 37 წლის დავით კვირკველიამ.

ყოველდღიური სპორტული გაზეთი "ლელო"
612
მკითხველის კომენტარები / 0 /
მსგავსი ამბები
რუბრიკის სხვა სიახლეები