ერთადერთი უდანაკარგო საბურთალოა... ტორპედომ და დინამომ პირველი მოიგეს

საიუბილეო ჩემპიონატს ერთობ შედეგიანი დასაწყისი ჰქონდა: პირველ ტურში 22 გოლი გავიდა! სამწუხაროდ, ამ ყველაფერს გაგრძელება აღარ მოჰყოლია: მეორე ტურში გუნდებმა "მხოლოდ" 14 გოლი გაიტანეს. თუმცა ორი ტურის შემდეგ საერთო შედეგიანობა მატჩში საშუალოდ 3.6 გოლია, რაც საკმაოდ მაღალი მაჩვენებელია.
ტურის მიმოხილვა კი იმ გუნდის მორიგი წარმატებული მატჩით გვინდა დავიწყოთ, ქულათა მაქსიმუმით რომ იწონებს თავს - "საბურთალო" ერთადერთია, სეზონის სტარტზე ორივე მატჩი რომ მოიგო!..

ფავორიტიც, მებრძოლიც...

ახალი სეზონის ფავორიტებს როცა ვასახელებდით, ყველაზე ხშირად "საბურთალოს" ვახსენებდით და ეს იმის მიუხედავად, რომ გუნდი ორმა წამყვანმა ფეხბურთელმა - გიორგი ხარაიშვილმა და ლაშა შინდაგორიძემ დატოვა. თუმცა, ერთობ ეფექტიანი შევსებაც მიიღო და ამ სწორად წარმართული სატრანსფერო კამპანიის შედეგიც სახეზეა - ნიჭიერ ახალგაზრდა ფეხბურთელებს გამოცდილი ახალწვეულები დაემატნენ. ჰოდა, ცხრილიც ყველაფრის მთქმელია - ორი ტურის შემდეგ "საბურთალო" ასპროცენტიანი შედეგით აბსოლუტურად დამსახურებულად ლიდერობს. აღარაფერს ვამბობთ იმ ფაქტზე, რომ თბილისურმა გუნდმა ორივე მატჩი დიდი ანგარიშით მოიგო.

რა თქმა უნდა, ცალკე უნდა აღინიშნოს "საბურთალოს" შესაშური ბრძოლისუნარიანობა. თავად განსაჯეთ: ორივე შემთხვევაში ისეთი მატჩები მოიგო, რომლის პირველ ტაიმებშიც მარცხდებოდა. ასეთ დროს კი მწვრთნელის კვალიფიკაცია უნდა იყოს ერთ-ერთი გადამწყვეტი ფაქტორიც. "საბურთალოს" თავკაცმა გიორგი ჭიაბრიშვილმა პირველ ტურშიც გამოიცნო ცვლილება (როცა შეცვლაზე შესულმა დავით ვოლკოვმა დუბლი შეასრულა) და ამჯერადაც ეფექტური გადაადგილებები მოახდინა.

ფაქტია - ახლაც გამოიჩინეს თავი შეცვლაზე შესულმა ფეხბურთელებმა და საერთოდაც, "კოლხეთის" კარში სამი გოლი გამოცდილმა ახალწვეულებმა გაიტანეს: 34 წლის დიმიტრი ტატანაშვილმა, 30 წლის გიორგი რეხვიაშვილმა და 29 წლის თორნიკე გორგიაშვილმა.
ცალკე უნდა აღვნიშნოთ "საბურთალოს" ერთ-ერთი ყველაზე "სტაჟიანი" წევრის, გიორგი კოხრეიძის აქტიური თამაშიც: 19 წლის ნიჭიერ შემტევს რეალურად შეუძლია, გუნდის ერთ-ერთი ლიდერი გახდეს.

"კოლხეთზე" კი, რაღა უნდა ვთქვათ - ორი მატჩი და ორივეში დიდი ანგარიშით მარცხი, რასაც გუნდის მწვრთნელის, კონსტანტინ გალკინის გათავისუფლება მოჰყვა (ამაზე ვრცლად სხვა წერილში წაიკითხავთ). ისიც უნდა აღვნიშნოთ, რომ ამ ორ ტურში მეტოქეთა კარში ორივე გოლი "კოლხეთის" კაპიტანმა ლაშა გოგონაიამ გაიტანა და ორივე - პენალტით.

დაბოლოს, კიდევ ერთ გამორჩეულ ფაქტზე - "საბურთალოს" შემადგენლობაში შეცვლაზე შევიდა 21 წლის გურამ გოშთელიანიც - ნიჭიერი ფორვარდი, რომელსაც მძიმე ტრავმის გამო, ფაქტობრივად, 2 წელიწადი გაუცდა...

სად არის სიჭინავა?

სამწუხაროდ, II ტურის ცენტრალური მატჩი, სანახაობრივი თვალსაზრისით, ისეთი ვერ გამოდგა, როგორსაც ველოდით. თუმცა ამას, ალბათ, ობიექტური მიზეზიც ჰქონდა. ქვეყნის ჩემპიონი "ტორპედოც" და ახალი "რუსთავიც" თავიანთვის სასურველ შედეგზე ორიენტირებულ ფეხბურთს რომ აირჩევდნენ, არც ეს ფაქტი უნდა გაჰკვირვებოდა ვინმეს. თუმცა, გულშემატკივარს ხომ სანახაობა სჭირდება და თბილისში, ნეიტრალურ მოედანზე ჩატარებულ ამ მატჩს ქომაგები არც ერთი მხრიდან არ აკლდა...

ჩემპიონმა პირველ ტურში მოულოდნელი საშინაო მარცხი იწვნია და, აქედან გამომდინარე, არავის უნდა გაჰკვირვებოდა, "ტორპედოს" მწვრთნელი კახა ჩხეტიანი ძირითად შემადგენლობაში გარკვეულ კორექტივებს რომ შეიტანდა. სამაგიეროდ, ბევრისთვის გასაკვირი აღმოჩნდა "რუსთავის" შემადგენლობაში მომხდარი ცვლილებები თუ გადაადგილებები. თუმცა გუნდის გულშემატკივრებს უფრო საკვირველი რამ ელოდათ...

რა თქმა უნდა, ძირითადი შემადგენლობის შერჩევა თუ მატჩის მიმდინარეობის დროს გადაადგილები და ცვლილებები მთავარი მწვრთნელის კომპეტენციაა და ნამდვილად არ გვინდა, ეჭვი შევიტანოთ "რუსთავის" ახალი თავკაცის, ვლადიმირ გაზაევის კომპეტენციაში. მით უფრო, რომ წინა ტურში, თბილისის "დინამოსთან" მატჩში, სწორედ მის მიერ განხორციელებულმა ცვლილებებმა თუ გადაადგილებებმა შეცვალა თამაშის სურათიც, რომელმაც იმ შეხვედრის საბოლოო შედეგზე უდიდესი გავლენა იქონია...

ამჯერად კი ასე ნამდვილად არ მოხდა, თანაც, "რუსთავის" გულშემატკივართა მსგავსად, ქართული სპორტული მედიის წარმომადგენლებისთვისაც გამოცანად რჩება ერთი კონკრეტული ფეხბურთელის უთამაშებლობა - უკვე 2 ტური მიილია და ჯერ არც ერთი წუთი არ უთამაშია წინა სეზონში "რუსთავის" კაპიტანსა და ლიდერს, ეროვნული ლიგა 2-ის საუკეთესო ფეხბურთელსა და ბომბარდირ დათა სიჭინავას. ასევე, უცნაურია ნიჭიერი ახალგაზრდა ფორვარდის, ზაზა ციცქიშვილის 18-კაციან განაცხადში უკვე მეორედ ვერმოხვედრაც...

..."ტორპედომ" ამ მატჩის ერთადერთი გოლი დებიუტშივე გაიტანა, მაგრამ დარჩენილ დროში სტუმართა მეკარე როინ კვასხვაძეს საქმე, ფაქტობრივად, არც ჰქონია: "რუსთავს" კვლავაც ეტყობა შეუთამაშებლობა. ეს ფაქტი, ერთი მხრივ, არც არის გასაკვირვი: 18-კაციან განაცხადში, ზემოთ ნახსენები სიჭინავას გარდა, ყველა დანარჩენი ხომ გუნდის ახალწვეული იყო. თანაც, ამათგან სამმა - 33 წლის ოთარ მარცვალაძემ, 25 წლის გიორგი პაპავამ და 18 წლის ბექა ქავთარაძემ პირველად მოირგეს "რუსთავის" მაისურა.

ახალწვეული "ტორპედოსაც" ჰყავდა და თანაც, როგორი: 30 წლის ჯაბა ლიპარტია საქართველოს ჩემპიონატში 7-წლიანი პაუზის შემდეგ დაბრუნდა.


უცნაური დერბი

დედაქალაქურ დერბიზე ჩვენი გაზეთის გუშინდელ ნომერში ვრცლად ვისაუბრეთ და დღეს მხოლოდ იმას შეგახსენებთ, თუ როგორი უცნაური სცენარით წარიმართა ეს მატჩი: საწყისი 30 წუთის განმავლობაში "ლოკომოტივი" ყველა კომპონენტში სჯაბნიდა მეტოქეს და გუნდის ახალწვეულ თეიმურაზ შონიას ეფექტური გოლიც ამ უპირატესობის ლოგიკური გამოძახილი იყო.

თუმცა ამის შემდეგ მოედანზე ფეხბურთს მხოლოდ ერთი გუნდი თამაშობდა. კახა კაჭარავას დროულმა და, რაც მთავარია, ეფექტურმა გადაადგილებებმა მატჩის შინაარსი მთლიანად შეცვალა და "დინამომაც" ლოგიკურად გაიმარჯვა დიდი ანგარიშით.

ამ მატჩის გმირზე კი კვლავაც გვინდა ორიოდე სიტყვის თქმა: "დინამოს" 21 წლის კაპიტანმა ოთარ კიტეიშვილმა უმაღლეს ლიგაში თავისი მეორე დუბლი შეასრულა და ბარემ ისიც გავიხსენოთ, რომ კარიერაში პირველი ჰეთ-თრიკიც სწორედ "ლოკომოტივთან" მატჩში (ოღონდ, სათასო შეხვედრაში, რომელიც 2016 წლის შემოდგომაზე გაიმართა) შეასრულა.



უკმაყოფილო არ უნდა იყვნენ...

ამ ტურში და, საერთოდ, მიმდინარე ჩემპიონატში, ჯერჯერობით ერთადერთი მატჩი დასრულდა ფრედ. თუმცა, ვერავინ იტყვის, რომ "დილასა" და "ჩიხურას" შეხვედრა მშვიდად მიმდინარეობდა. ქარიან ამინდში ორივე გუნდი მოსაგებად გავიდა მოედანზე და თამაშის შინაარსიც ამას მოწმობდა. "დილაც" და "ჩიხურაც" არ უნდა იყვნენ უკმაყოფილონი - ისინი წაუგებლად აგრძელებენ ასპარეზობას.

მასპინძელთა შემადგენლობაში, ისევე, როგორც წინა ტურის მატჩში, კვალავაც აქტიური თამაშით გამოირჩეოდა "დილას" 25 წლის ახალწვეული, ფლანგის ნახევარმცველი, "რეაქტიული" ნოდარ ქავთარაძე, რომელმაც ახალი გუნდის მაისურით პირველი გოლი გაიტანა.

აი, "ჩიხურას" შემადგენლობაში კი კვლავ გამოიჩინა თავი გიორგი გაბედავამ - 28 წლის შემტევმა პირველ ტურში შესრულებულ ჰეთ-თრიკს ამჯერად ერთი გოლი მიუმატა და ბომბარდირთა დავაშიც დაწინაურდა!


არც ეს იყო სენსაცია

ბევრის აზრით, პირველ ტურში ორი მატჩი დასრულდა მოულოდნელი შედეგით. თითქმის ასეთი რამ მოხდა ამჯერადაც. ერთმანეთზე "ხარისხიანი" ლეგიონერებით დახუნძლულმა და ამ სეზონის ერთ-ერთ ფავორიტად მიჩნეულმა "სამტრედიამ" ჩემპიონატი ხომ მოგებით დაიწყო, მერე კიდევ ერთი უცხოელიც (27 წლის სენეგალელი ნახევარმცველი სიდიმან სანია) დაიმატა, მაგრამ უჩა სოსიაშვილის დამოძღვრილი გუნდი, დიდი მონდომების მიუხედავად, ამჯერად უქულოდ დარჩა.

ოღონდ, ვერავინ იტყვის, რომ უძლიერესთა რიგებში დაბრუნებულმა "სიონმა" ეს გამარჯვება არ დაიმსახურა: გამოცდილმა სპეციალისტმა კობა ჟორჟიკაშვილმა სწორი ტაქტიკა დაუპირისპირა ძლიერ მეტოქეს და ქვემოქართლელთა ერთ-ერთი მწვავე კონტრშეტევა შედეგიანიც აღმოჩნდა.
ნიშანდობლივია, რომ მატჩის ერთადერთი გოლი "სიონის" კაპიტანმა, 33 წლის ჯაბა დვალმა გაიტანა და ასე აღნიშნა უმაღლეს ლიგაში დაბრუნება ერთწლიანი პაუზის შემდეგ.

"სიონის" ყველა ფეხბურთელმა დიდი წვლილი შეიტანა ამ წარმატებაში, თუმცა, ცალკე უნდა აღინიშნოს გამოცდილი მეკარის, 33 წლის მიხეილ მუჯრიშვილის გმირობაც, როცა მეორე ტაიმში ჩერნოგორიელ მცველ ივან ფატიჩს პენალტი აუღო...

1564
მკითხველის კომენტარები / 0 /
მსგავსი ამბები
რუბრიკის სხვა სიახლეები