ერთა ლიგა. ეშმაკს ცხოვრებაში არასოდეს სძინავს და, მით უმეტეს, არ სძინავს ფეხბურთში

ერთა ლიგაში საქართველოს ეროვნული გუნდის მთავარი მეტოქე რომ ყაზახეთის ნაკრებია, ამას წყალი არ გაუვა, რადგან ლატვია და მეტადრე გიბრალტარი არ ჩანან იმ ყალიბის გუნდებად, ვლადიმირ ვაისის გაწვრთნილ გუნდს ჯგუფში პირველ ადგილს შეეცილონ.

ამ დროს, საქართველოს ნაკრების ფეხბურთელები სათამაშოდ მასობრივად მიდიან ყაზახეთში. ერთ-ერთი ბოლოს იყო ჯაბა ჯიღაური, რომელიც "აქტობეში" ჩაირიცხა.

მის გარდა, ეროვნული გუნდის ფეხბურთელებიდან ამ ზამთარს ყაზახეთში გადაბარგდა ნაკრების კაპიტანი ჯაბა კანკავა. იქ თამაშობს ვაისის გაწვრთნილი გუნდის კიდევ ერთი წამყვანი ფეხბურთელი ნიკა კვეკვესკირი.

ყაზახეთის ჩემპიონატი ნამდვილად ვერ არის იმ დონის, საქართველოს ნაკრების ფეხბურთელების იქ გადასვლით რომ უნდა ვიამაყოთ. ეს ერთია. მეორე კი ის არის, რომ პირადად მე ამ ამბავში გარკვეულ რისკს ვხედავ. რისკს და საფრთხეს, რომელიც ძალიან არ მინდა, რომ გამართლდეს.

ეშმაკს ცხოვრებაში არასოდეს სძინავს და, მით უმეტეს, არ სძინავს ფეხბურთში. ის, რისი შიშიც ახლა უნდა გამოვთქვა, მომხდარა არაერთ წამყვან საფეხბურთო ქვეყანაში და სულაც არ გამოვრიცხავ, ასე მოხდეს ყაზახეთშიც.

მით უმეტეს, იქაური კლუბები და ფეხბურთის ფედერაცია ძალიან ცენტრალიზებულად მუშაობენ. სათამაშო ოსტატობის თვალსაზრისით, ეჭვი ნამდვილად არ მეპარება, რომ ფეხბურთელებს, რომლებიც ზემოთ ჩამოვთვალე, იმ კლუბების ლიდერობა შეუძლიათ, სადაც გადავიდნენ, მაგრამ ერთიც ვნახოთ და, ვიღაცამ იქ, "ზემოთ" სხვანაირად განსაჯა და ჩვენს მოთამაშეებს ამა თუ იმ მიზეზით სათამაშო პრაქტიკა მოაკლდათ.

ძალიან ბედნიერი ვიქნები, თუ ჩემი შიში არ გამართლდება. არც იმას ვამტკიცებ, რომ ეს უეჭველად ასე იქნება, მაგრამ შიშს მართლაც დიდი თვალები აქვს და, მით უმეტეს, დიდი თვალები აქვს მაშინ, როცა საქმე სანაკრებო ინტერესებს ეხება.

არადა, საქართველოს ნაკრებს სჭირდება ისეთი კანკავა, კვეკვესკირი და ჯიღაური, რომელთაც ექნებათ სისტემატური სათამაშო პრაქტიკა და რომლებიც ლიდერებად იგრძნობენ თავს თავიანთ კლუბებში. იმედია, ეს სწორედ ასე იქნება.

არადა, კანკავა-კვეკვესკირის დუეტი საქართველოს ნაკრების საყრდენ ზონაში წამყვანად მოიაზრება, ეროვნულ გუნდში თავისი ფუნქცია და ადგილი აქვს ჯიღაურსაც...

დაველოდოთ. იმედია, შიში არ გამართლდება. ეს მხოლოდ გაგვახარებს...

ყოველდღიური სპორტული გაზეთი "ლელო"
1918
მკითხველის კომენტარები / 2 /
Qomagi
0
Zedmet shishebs nu igonebt , kankavas saertod ar konda satamasho praktika magram tamashobda cina cels
Tengizs
0
Andora da ara Gibraltari
მსგავსი ამბები
რუბრიკის სხვა სიახლეები
;