ერთა ლიგის წილისყრა: უნდა შევძლოთ, ეს ჩვენია ვალია! ...მეტოქეები, რეგლამენტი

აგერ, რა ხანია ველოდით ერთა ლიგის წილისყრას. როგორც იქნა, ეს დღეც დადგა. შვეიცარიულ ლოზანაში ევროპული ფეხბურთის ბომონდი შეიკრიბა. თავდაპირველად, ცერემონიალი დაიწყო ჩვენთვის ყველაზე საინტერესოთი, D ლიგის წილისყრით.

წამყვანმა წილისყრის წარმართვაში დახმარება სთხოვა ბოლო წლების ბელარუსული ფეხბურთის ერთ-ერთ თვალსაჩინო სახეს, ალექსანდრ ჰლებს. სცენაზე გამოჩნდა ასევე უეფას მეორე მდივანი ჯორჯო მარკეტი, ვინც ამ პროექტის ერთ-ერთი შემომქმედი, ლობისტი და ორგანიზატორი გახლავთ.

მალევე შევიტყვეთ D ლიგის იმ ჯგუფის შემადგენლობა, რომელშიც საქართველოს ნაკრები ითამაშებს. ლატვია, ყაზახეთი და ანდორა - ამ ნაკრებებთან მოგვიწევს საქმის დაჭერა ერთა ლიგის პირველ გათამაშებაში.

ფაქტია, ჯგუფი არ არის იოლი და, მით უმეტეს, იოლი არ იქნება ამ ჯგუფში პირველი ადგილის დაკავება, მაგრამ ამის გაკეთება ნამდვილად გვმართებს. მეტიც - თუ ვინმე შეიძლება ჩაითვალოს პირველი ჯგუფის ფავორიტად, ეს სწორედაც საქართველოს ნაკრებია.

რა თქმა უნდა, როცა საქმე ეხება წილისყრას, მოწინააღმდეგეებს არ ირჩევენ, მაგრამ ვიმეორებთ - ფორტუნას მაინც შეეძლო, ჩვენთვის უფრო მოწყალე თვალით გადმოეხედა და ადგილი მიეჩინა მეორე ან მესამე ჯგუფში, რომელიც, ჩვენი მოკრძალებული აზრით, გაცილებით ადვილია. ამ სიტუაციაში კი საქართველოს ჯგუფს ნამდვილად შეგვიძლია ვუწოდოთ "სიკვდილის ჯგუფი".

და მაინც, თუ რაიმეზე პრეტენზია გვაქვს, წუწუნი ახლა უადგილოა - საქართველოს ნაკრებმა ამ ჯგუფში უნდა დაიკავოს პირველი ადგილი და მოხვდეს იმ ოთხ საუკეთესო ნაკრებს შორის, რომელიც პლეი ოფის სისტემით გააგრძელებს ბრძოლას ევროპის ჩემპიონატის ფინალურ ეტაპზე მოსახვედრად.

ქართული ფეხბურთი დღეს ისეთ დღეშია, ხელაღებით ვერაფერს დაგეგმავ. 10 წლის წინ ამ ჯგუფში ალბათ გავისეირნებდით, ახლა კი... რა თქმა უნდა, არის პირველობის ამბიცია, მაგრამ ფაქტია ისიც, რომ სიამოვნებით გავუცვლიდით ადგილს თუნდაც... ბელარუსის ნაკრებს. როგორც ჩანს, ალექსანდრ ჰლებმა თავისიანებისთვის, რაღაც ზებუნებრივი ძალით, იღბლიანი წილისყრა უზრუნველყო...

ეს, რა თქმა უნდა, ხუმრობით. ისე კი, სიამოვნებით გავუცვლიდით ადგილს ჩვენს მეზობელ აზერბაიჯანს, მაგრამ რას ვიზამთ - შედეგები უკვე სახეზეა და ვეღარაფერს შევცვლით. ამიტომ, ისღა დაგვრჩენია, ბოლომდე ვიყოთ მზად სექტემბრისთვის, როცა ერთა ლიგის შესარჩევი ციკლი დაიწყება.

და კიდევ ერთი - საქართველოს ნაკრები თავის ჯგუფში ყველაზე... ძვირად ღირებული ნაკრებია. ეს კიდევ ერთხელ მეტყველებს იმაზე, რომ ფავორიტები ჩვენ ვართ და ეს სტატუსი აუცილებლად უნდა დავამტკიცოთ.

მეტოქეები
რა თქმა უნდა, ერთა ლიგას ჩვენი იმედები უკავშირდება. შესაბამისად, საინტერესო უნდა იყოს, რა ძალის მოწინააღმდეგეებთან მოგვიწევს ურთიერთობის გარკვევა.

ყაზახეთი

ამ მომენტისთვის ყაზახეთის ნაკრები უმწვრთნელოდაა. ორიოდ დღის წინ თანამდებობა დატოვა რუსმა ალექსანდრ ბოროდიუკმა.

ნაკრებს ფიფას რეიტინგში 135-ე ადგილი უკავია. ყაზახებთან არაერთხელ გვითამაშია, თუმცა ამ შეხვედრების გახსენება სულ სხვა წერილის თემაა. გუნდს იქაური ფეხბურთის მთავარი ვარსკვლავი, ბაიურჟან ისლამხანი კაპიტნობს.

ყაზახებმა მსოფლიოს ჩემპიონატის შესარჩევი ციკლი ჩააგდეს. მათ ჯგუფში ბოლო ადგილი დაიკავეს. უნდა ითქვას, რომ ჯგუფი, რომელშიც ჩვენი მომავალი მოწინააღმდეგე თამაშობდა, ძლიერი და თანაბარი იყო.

ისინი ჩამორჩნენ პოლონეთს, დანიას, ჩერნოგორიას, რუმინეთსა და სომხეთს. ფაქტია, ერთა ლიგაში ყაზახებს სულ სხვა, უფრო დიდი ამბიციები ექნებათ, რასაც არც ყაზახური მედია უარყოფს და ეს ჩვენთან საუბარში ყაზახმა კოლეგებმაც დაგვიდასტურეს წილისყრის დასრულების შემდეგ.

ყაზახეთის ნაკრებს რამდენიმე ისეთი ფეხბურთელი ჰყავს, უთუოდ სათვალავში რომ უნდა ჩავაგდოთ. მათ შორის, 36 წლის მეკარე, წარმოშობით ქართველი დავით ლორია. ლიდერებიდან უნდა გამოვყოთ მცველი იური ლოგვინენკო, ნახევარმცველები - აზატ ნურგალიევი ზემოთ ხსენებულ ისლამხანთან ერთად, ასევე, თავდამსხმელი სერგეი ხიჟნიჩენკო.

უნდა აღინიშნოს, რომ ამ დროისთვის ყაზახეთის ეროვნული ნაკრების შემადგენლობაში არცერთი ლეგიონერი არ არის. ეს, რა თქმა უნდა, სამწვრთნელო შტაბს გარკვეულ უპირატესობას აძლევს თუნდაც საქართველოს ნაკრებთან შედარებით.

ლატვია

ლატვიის ნაკრების მთავარი მწვრთნელი 62 წლის ალეკსანდრ სტარკოვსია და ამ გუნდის შესახებ თხრობა სწორედ აქედან უნდა დავიწყოთ. სწორედ სტარკოვსის ხელმძღვანელობით ითამაშა ბალტიისპირულმა გუნდმა პირველად და უკანასკნელად დიდ ტურნირზე - ევროპის 2004 წლის ჩემპიონატზე.

აქტიური ფეხბურთელობის ჟამს სტარკოვსი თამაშობდა "მადონაში", "დაუგავასა" და მოსკოვის "დინამოში". არცთუ წარმატებული კარიერის შემდეგ, მან მწვრთნელობას მოჰკიდა ხელი და ეს ძალიან კარგადაც გამოუვიდა.

"დაუგავა", ლატვიის ახალგაზრდული ნაკრები, "სკონტო", "სპარტაკი" და "ბაქი" - ეს იმ გუნდების ჩამონათვალია, რომელთაც სხვადასხვა დროს სტარკოვსი ხელმძღვანელობდა. საინტერესოა, რომ გამოცდილი მწვრთნელი, ყველანაირ თანამდებობას თუ ჩავთვლით, მეხუთედ მივიდა ლატვიის ნაკრების სათავეებთან.

ამ მომენტისთვის ლატვიის ნაკრებს ფიფას რეიტინგში 120-ე ადგილი უჭირავს. კარგად გვახსოვს, ბოლო თბილისურ ამხანაგურ მატჩში მოწინააღმდეგისგან ქვა ქვაზე არ დავტოვეთ (5:0), მაგრამ ასეთი იოლი მატჩების მოლოდინი აღარ უნდა გვქონდეს. უნდა გვახსოვდეს ისიც, რომ ლატვიასთან წაგების სიმწარეც გამოგვიცდია, მათ შორის - შინაურ კედლებშიც.

სხვათა შორის, ბოლო შესარჩევ ციკლში ჩვენი მომავალი მეტოქეები, ლატვია და ანდორა, ერთ ჯგუფში იყვნენ. ლატვიამ ორივე მატჩი მოიგო - გასვლაზე 1:0, ხოლო შინ - 4:0. საბოლოოდ, ანდორელებმა უკანასკნელი საფეხური დაიკავეს, ლატვიელებმა კი - ბოლოსწინა. ამ ორ გუნდს აჯობეს პორტუგალიამ, შვედეთმა, უნგრეთმა და ფარერებმა.

ლატვიის ნაკრების ლიდერები ძირითადად ქვეყნის ფარგლებს გარეთ ასპარეზობენ. ასეთებად შეგვიძლია მივიჩნიოთ "ციურიხის" კარის დარაჯი ანდრის ვანინსი (კაპიტანი), "არკას" მეკარე პაველს შტეინბორნსი, "ტერმალიცას" მცველი ვიტალი მაქსიმენკო, "ვროცლავის" ნახევარმცველი იგორს ტარასოვსი, "იჰლავას" შუახაზელი დეივის იკაუნიეკსი, მისი მოგვარე "მეციდან" - იანისი, ფორვარდი ვალერის შაბალა "პოდბესკიძიედან" და მისი მეწყვილე დენის რაკელსი "კრაკოვიადან".

ამ დროის მონაცემებით, სანაკრებო კარიერა დასრულებული აქვს "კიოლნის" 30 წლის შემტევს, არტიომ რუდნევსს. თუ მან ნაკრებში დაბრუნების გადაწყვეტილება მიიღო, მაშინ ლატვიელთა შეტევითი პოტენციალი მნიშვნელოვნად გაიზრდება.

ანდორა

ანდორის ნაკრები ის მეტოქეა, რომელსაც საქართველომ ორივე შეხვედრა უნდა მოუგოს - როგორც საშინაო, ისე საგარეო. ეს გუნდი ფიფას რეიტინგში 136-ე ადგილზეა. მთავარი მწვრთნელია 47 წლის კოლდო ალვარესი. თამამად შეგვიძლია, მას ანდორული ფეხბურთის ლეგენდა ვუწოდოთ.

თავის ქვეყანაში გამორჩეულმა მეკარემ, რომელსაც ერთ დროს მადრიდის "ატლეტიკოს" მეორე გუნდშიც უთამაშია, ანდორის ნაკრების შემადგენლობაში (1998-2009 წლები) 78 შეხვედრა ჩაატარა. შემთხვევითი არ არის, რომ დაასრულა თუ არა საფეხბურთო კარიერა, კოლდო ალვარესს ეგრევე ანდეს ეროვნული გუნდის გაძღოლა.

2004 წელს ანდორამ მოიგო პირველი ოფიციალური მატჩი. მაშინ, ციდა ქვეყნის ეროვნულმა ნაკრებმა მაკედონია დაამარცხა. 2017 წლის 9 ივნისამდე ანდორელებმა ოფიციალურ მატჩში გამარჯვების გემო აღარ იცოდნენ. და ჰოი საოცრებავ, ამ დღეს მათ უნგრეთის ეროვნულ გუნდს მოუგეს, რაზეც უნგრელმა ჟურნალისტებმა დაწერეს - "უნგრული ფეხბურთის შავი დღე".

ანდორას ნაკრების რამდენიმე ფეხბურთელი დაბალი ესპანური დივიზიონების კლუბებში თამაშობს. რა თქმა უნდა, ისინი სერიოზულ ძალას არ წარმოადგენენ.

 D ლიგა

I ჯგუფი
ყაზახეთი
ანდორა
ლატვია
საქართველო

II ჯგუფი
ბელარუსი
მოლდოვა
ლუქსემბურგი
სან მარინო

III ჯგუფი
აზერბაიჯანი
ფარერები
მალტა
კოსოვო

IV ჯგუფი
მაკედონია
სომხეთი
ლიხტენშტაინი
გიბრალტარი

A ლიგა

I ჯგუფი
ჰოლანდია
საფრანგეთი
გერმანია

II ჯგუფი
ისლანდია
შვეიცარია
ბელგია

III ჯგუფი
პოლონეთი
იტალია
პორტუგალია

IV ჯგუფი
ხორვატია
ინგლისი
ესპანეთი

B ლიგა

I ჯგუფი
ჩეხეთი
უკრაინა
სლოვაკეთი

II ჯგუფი
თურქეთი
შვედეთი
რუსეთი

III ჯგუფი
ჩრ. ირლანდია
ბოსნია
ავსტრია

IV ჯგუფი
დანია
ირლანდია
უელსი

C ლიგა

I ჯგუფი
ისრაელი
ალბანეთი
შოტლანდია

II ჯგუფი
ესტონეთი
ფინეთი
საბერძნეთი
უნგრეთი

III ჯგუფი
კვიპროსი
ბულგარეთი
ნორვეგია
სლოვენია

IV ჯგუფი
ლიტვა
ჩერნოგორია
სერბეთი
რუმინეთი

რეგლამენტი

D ლიგის ჯგუფების გამარჯვებულები მომავალ ერთა ლიგაში ერთი რანგით მაღლა ითამაშებენ. 2020 წლის მარტში 4 ჯგუფის გამარჯვებული პლეი ოფის სისტემით გაარკვევენ ერთ ნაკრებს, რომელიც ევროპის ჩემპიონატზე ითამაშებს.

A ლიგაში ოთხი 3-3-გუნდიანი ჯგუფია. პირველ ადგილებზე გასული გუნდები 2019 წლის ივნისში უეფას ერთა ლიგის ფინალურ ეტაპზე იასპარეზებენ და გამოვლინდება ტურნირის საუკეთესო ნაკრები. ფინალური ეტაპის მასპინძელი ქვეყანა 2018 წლის დეკემბერში დასახელდება.

ის ნაკრებები, რომლებიც ჯგუფებში ბოლო ადგილებს დაიკავებენ, 2020 წლის ერთა ლიგაში ერთი რანგით დაქვეითდებიან და B ლიგაში გააგრძელებენ ასპარეზობას. ჯგუფური ეტაპის შემდეგ, 2020 წლის მარტში, 4 გამორჩეული ნაკრები საპლეიოფო ბატალიებში ევროპის ჩემპიონატის საგზურისთვის იბრძოლებს.

B ლიგაშიც ოთხი 3-3-გუნდიანი ჯგუფია. ჯგუფის გამარჯვებული 4 ნაკრები 2020 წლის ერთა ლიგაში ერთი ლიგით მაღლა აიწევს. 2020 წლის მარტში 4 საუკეთესო ნაკრები ევროპის ჩემპიონატზე გასასვლელად იბრძოლებს. ჯგუფების აუტსაიდერები B ლიგიდან გავარდებიან და მომავალ გათამაშებაში ჩ ლიგაში იასპარეზებენ.

C ლიგაში ერთი ჯგუფი 3-გუნდიანია, ხოლო სამი - ოთხგუნდიანი. ოთხი საუკეთესო ნაკრები მომავალ ერთა ლიგაში მაღალ დივიზიონში დაწინაურდება. გარდა ამისა, 2020 წლის მარტში ეს ოთხი ნაკრები ტრადიციული საპლეიოფო სისტემით გაითამაშებს ევროპის ჩემპიონატის საგზურს. ოთხი აუტსაიდერი კი D ლიგაში დაქვეითდება.

ყოველდღიური სპორტული გაზეთი "ლელო"
3214
მკითხველის კომენტარები / 0 /
მსგავსი ამბები
რუბრიკის სხვა სიახლეები
;