ერთი გვირგვინი და შვიდი მაძიებელი

სინგაპურში ქალთა შორის წლის შემაჯამებელი ტურნირი დაიწყო, რომელშიც 2017 წლის სეზონის რვა საუკეთესო ჩოგბურთელი მონაწილეობს. შაბათს გაიმართა წილისყრა, რომლის მიხედვითაც მოთამაშეები ორ ჯგუფში განაწილდნენ:

წითელი ჯგუფი
სიმონა ჰალეპი (რუმინეთი)
ელინა სვიტოლინა (უკრაინა)
კაროლინ ვოზნიაცკი (დანია)
კაროლინ გარსია (საფრანგეთი)

თეთრი ჯგუფი
გარბინ მუგურუსა (ესპანეთი)
კაროლინა პლიშკოვა (ჩეხეთი)
ვინუს უილიამსი (აშშ)
ელენა ოსტაპენკო (ლატვია)

წლევანდელ ტურნირს უცნაური შემადგენლობა ჰყავს. მონაწილეებს შორის ერთბაშად სამი დებიუტანტია. სინგაპურში არ თამაშობს "დიდი სლემის" წლევანდელი ტურნირების ორი გამარჯვებული (სერენა უილიამსი და სლოან სტივენსი), არ არის ორი ჩოგბურთელი, რომლებიც წელს რეიტინგს ედგნენ სათავეში (სერენა და ანჟელიკ კერბერი), არ არის შარშანდელი ჩემპიონი (დომინიკა ციბულკოვა), არ არის შარშანდელი ჩეპიონატის არც ერთი მეოთხედფინალისტი (ციბულკოვა, კერბერი, აგნიეშკა რადვანსკა და სვეტლანა კუზნეცოვა)...

წლევანდელი ჩემპიონატის ყველაზე დიდი ინტრიგა კი ის არის, რომ კაროლინ გარსიას გარდა, შვიდ (!) ჩოგბურთელს შეუძლია ტურნირის შემდეგ გახდეს მსოფლიოს პირველი ჩოგანი!

* * *

გუშინ, პირველი ტურის მატჩები ითამაშეს "თეთრი ჯგუფის" წევრებმა და ორივე შეხვედრა ორ სეტში დასრულდა.

გახსნის მატჩში ძალიან იოლად მოიგო ჩეხმა კაროლინა პლიშკოვამ - მან 73 წუთში გაანადგურა ამერიკელი ვეტერანი ვინუს უილიამსი - 6:2, 6:2. პლიშკოვა მთელი მატჩი დომინირებდა, რაზეც მისი 12 ბრეიკ-პოინტი მეტყველებს. აქედან, ჩეხმა ხუთი შანსის გამოყენება მოახერხა. უილიამსს კი მხოლოდ სამი ბრეიკ-პოინტი და ერთი ბრეიკი ჰქონდა. ამერიკელმა პირველ სეტში შეძლო დაკარგული გეიმის დაბრუნება, მაგრამ 2:3-დან ზედიზედ სამი გეიმი დათმო, მეორე სეტში კი, პრაქტიკულად, წინააღმდეგობა ვერ გაუწია მეტოქეს.

მეორე მატჩში უიმბლდონის ჩემპიონი გარბინ მუგურუსა როლან გაროსის ჩემპიონ ელენა ოსტაპენკოს ხვდებოდა. ესპანელს მეტი წინააღმდეგობა შეხვდა, განსაკუთრებით პირველ სეტში, როცა ორჯერ დაწინაურდა ბრეიკით და ლატვიელმა ორჯერ შეძლო ანგარიშის გათანაბრება, მაგრამ გადამწყვეტი ბრეიკი მაინც მუგურუსამ შეასრულა. მეორე სეტში პირენეელი თავიდანვე 5:1 დაწინაურდა, მართალია, ოსტაპენკომ შეძლო ზედიზედ სამი გეიმის მოგება და სხვაობის მინიმუმამდე შემცირება, მაგრამ მუგურუსამ მეათე გეიმში მატჩზე ჩააწოდა - 6:3, 6:4.

დღეს "წითელ ჯგუფში" გაიმართება პირველი ტურის მატჩები: სიმონა ჰალეპი-კაროლინ გარსია, ელინა სვიტოლინა-კაროლინ გარსია.

ყოველდღიური სპორტული გაზეთი "ლელო"

1826
მკითხველის კომენტარები / 0 /
რუბრიკის სხვა სიახლეები