ერთი კომენტარის გამო... როცა პატარა მაესტრო არ არის

ორიოდ დღის წინ მოსკოვის "სპარტაკმა" ჩემპიონთა ლიგის საშინაო მატჩი ვერ მოუგო სლოვენიურ "მარიბორს" და დიდი ეჭვის ქვეშ დააყენა პლეი ოფში გასვლის შანსი. თამაშს ერთ-ერთ რუსულ ტელეარხზე ვუყურე და კომენტატორმა რამდენჯერმე ახსენა ჯანო ანანიძე. ახსენა ძალიან დადებითი კუთხით და თქვა, რომ ამ ფინალის მსგავს, ძალიან მნიშვნელოვან თამაშში "ჟანო", შეიძლება, ერთგვარი "ჯოკერიც" კი ყოფილიყო მასიმო კარერას გაწვრთნილი გუნდისთვის...

...ჯანო ანანიძემ ვარჯიში უკვე დაიწყო და ფეხბურთელის არ იყოს, ჩვენც დიდი იმედი გვაქვს, რომ მალე დაუბრუნდება მინდორს. მანამდე კი, სანამ ჯანო არ არის, უფრო და უფრო მტკივნეულად ვგრძნობთ იმ დანაკლისს, რომელიც მოსდევს საქართველოს ნაკრების ერთ-ერთი ლიდერის არყოფნას.

მოდით, შევთანხმდეთ: ბოლო დროის ქართულ ფეხბურთში, თუ არ ჩავთვლით თორნიკე ოქრიაშვილს, არ გამოჩენილა ჯანოს გაქანების ფეხბურთელი. ეს ალბათ ისეთი თემაა, რომელსაც კამათი არც კი უხდება.

ეგაა, ანანიძის კარიერას დაღად აზის ტრავმები და უნდა დავწერო პირდაპირ, რომ მათ გარეშე ახლა ის, ალბათ, აღარ იქნებოდა მოსკოვის "სპარტაკში" და რომელიმე ევროპულ გრანდში თუ არა, საშუალოზე მაღალი დონის გუნდში ნაღდად ითამაშებდა.

და მე ახლა მახსენდება საქართველოს ახალგაზრდული ნაკრების ის შეხვედრები, რომლებშიც სრულიად ახალგაზრდა ჯანო ანანიძე, ამ სიტყვის პირდაპირი მნიშვნელობით, მართლაც რომ ბრწყინავდა. ასეთ რამეებს ბევრის მნახველი ქომაგები მიხეილ მესხზე ჰყვებიან. მე კი ასეთი რამ, უბრალოდ, არ მინახავს.

თუ არ ვცდები, საქართველოს ახალგაზრდული ნაკრები ეთამაშებოდა ირლანდიას. ჯანო იყო ფლანგზე და მართლაც სასწაულებს აკეთებდა, ატყუებდა ერთბაშად რამდენიმე მოწინააღმდეგეს...

ტაიმი რომ მორჩა, ჩემთვის ძალიან უცნაური სურათის მომსწრე გავხდი: ხალხი ადგა და იმ ტრიბუნისკენ დაიძრა, რომელთან ახლოსაც ჯანო თამაშობდა. გამახსენდა ძველი ხალხის მონაყოფილი და ძალიან გამიხარდა, რადგან მაშინაც, ისევე, როგორც ახლა, ქართული ფეხბურთი ჭეშმარიტ სახალხო ვარსკვლავს ელოდა...

მაშინ ჯანო ახალმოსული იყო ქართულ ფეხბურთში. რუსები ძალიან იყვნენ გაწბილებულნი იმ ტალანტის გამო, რომელშიც სამომავლოდ თავიანთი ნაკრების ერთ-ერთ ლიდერს ხედავდნენ და მისი ასეთი წარმატება განსაკუთრებით სასიხარულო იყო ჩვენთვის.

...გავიდა დრო. ჯანო დღეს შემდგარი და კარგი ფეხბურთელია. ის არის საქართველოს ნაკრების ერთ-ერთი ლიდერი, მაგრამ არ არის იმ ყალიბის ვარსკვლავი, როგორიც წლების წინ წარმოგვედგინა. ამას ერთბაშად რამდენიმე მიზეზი შეიძლება ჰქონდეს.

ადამიანის ფსიქოლოგია ინგრევა...

წლები გადის, ჯანო კი გამუდმებით ებრძვის ტრავმებს. ვიფიქრებთ, რომ მის კარიერაში უიღბლობის პერიოდი დასრულდა და... მორიგი ტრავმა გამოხტება. არახალია, რომ ფეხბურთელის ცხოვრება რთულია, მაგრამ ორმაგად რთულია იმ ფეხბურთელის ცხოვრება, რომელიც გამუდმებით ებრძვის ტრავმებს.

ასეთ შემთხვევაში, უპირველეს ყოვლისა, ადამიანის ფსიქოლოგია ინგრევა. ეს მძაფრად მოქმედებს მის განწყობაზე. გარდა ამისა, ფეხბურთელი ბოლომდე ვეღარ იხარჯება მინდორზე, რაკი სავსებით ბუნებრივად სდევს იმის შიში, რომ ისევ ტრავმა არ მიიღოს.

სალაპარაკოდ ადვილია, მაგრამ მოდი, წარმოვიდგინოთ: ვის სიამოვნებს საოპერაციო მაგიდაზე ხშირად წოლა? ჩვენ ბევრჯერ მოგვითხოვია სხვებისგან გმირობა. ეს მაშინ, როცა საკუთარ თავს ასეთ ამოცანას სულაც არ ვუსახავთ...

თუ შანსი ვერ გამოიყენე...

ჯანოსთან ჩემი ურთიერთობა ამოიწურება რამდენიმე სანაკრებო ვოიაჟით და უბრალო "გამარჯობით". მეტი არაფერი. ასეთ შემთხვევაში, ძალიან ძნელია მსჯელობა ადამიანის შინაგან სამყაროზე და ამას არც ვაპირებ. უბრალოდ, მგონია, რომ ის ზედმეტად დიდხანს შემორჩა "სპარტაკს".

კარგად ვიცი, რომ რუსეთში დიდებულად იხდიან. ისიც ვიცი, რომ "სპარტაკი" იქ ყველაზე პოპულარული კლუბია, მაგრამ ეს დალოცვილი ნამდვილი ფეხბურთი მაინც რუსეთიდან შორსაა და სულაც არ მგონია, რომ ამ "ნამდვილ ფეხბურთში" ანანიძე ბოლო კაცი იქნებოდა.

ფეხბურთი ასეთია: ის ერთ შანსს გაძლევს და თუ ვერ გამოიყენებ, საქმე სხვანაირად მიდის. მერე ბედისწერის ჩარხის შემობრუნება ჭირს, ძალიან ჭირს...

დაღდასმული

რა თქმა უნდა, ყველა ფეხბურთელის კარიერას მნიშვნელოვნად განსაზღვრავს, თუ როგორ თამაშობს ეროვნულ ნაკრებში და როგორ თამაშობს, ზოგადად, ნაკრები. ჯანოს შემთხვევაში, სასაყვედურო, ალბათ, ბევრი არაფერი გვაქვს. სამაგიეროდ, საქართველოს ნაკრები არ არის იმ დონის გუნდი, რომლის მოთამაშესაც დაუფიქრებლად მიაქცევენ ყურადღებას გრანდები.

რა თქმა უნდა, არც თავად ჯანოა ლიონელ მესი, მარტომ მოიგოს თამაშები. აქედან გამომდინარე, ნაკრების სუსტი ასპარეზობა, გვინდა თუ არა, დაღს ასვამს მისი ლიდერების კარიერას. დარწმუნებულნი ვართ, სულ პატარა სანაკრებო წარმატება და ჩვენი ეროვნული გუნდის ბევრი ფეხბურთელი გაცილებით უკეთეს სანაკრებო კარიერას აიწყობს, ვიდრე დღეს აქვს...

ყოველდღიური სპორტული გაზეთი "ლელო"
3190
მკითხველის კომენტარები / 1 /
ეეჰ!
0
რუსეთში სულ ტრავმები ექნება
მსგავსი ამბები
რუბრიკის სხვა სიახლეები
;