ერთხელაც დავამტკიცოთ: 15 ქართველი 15 რუსზე ძლიერია!

* ნაკრებს მერაბ კვირიკაშვილი (108 თამაში) უბრუნდება.
* 10 მარტს საქართველო რუსეთს 22-ედ ეთამაშება.
* 19 მოგება, 1 ფრე, 1 წაგება – ასეთია ბალანსი
"ბორჯღალოსანთა" სასარგებლოდ.

საქართველოს ნაკრები კრასნოდარში გაემგზავრა, სადაც 10 მარტს, 16:00 საათზე რუსეთის ეროვნულ ნაკრებს დაუპირისპირდება. იქამდე კი "ბორჯღალოსნებმა" ღია ვარჯიში გამართეს, რომლის დასრულების შემდეგაც გუნდის მთავარმა მწვრთნელმა მილტონ ჰეიგმა საბრძოლო რაზმი დაასახელა.

მილტონ ჰეიგმა ძირითად შემადგენლობაში სამი ცვლილება განახორციელა. უკანა ხაზში ბრუნდება ფულბეკი მერაბ კვირიკაშვილი (ლელო), რომელიც წლეულს ნაკრების კვართს პირველად მოირგებს და 109-ე კეპს მოიხვეჭს. სოსო მათიაშვილი (აკადემია), რომელმაც მანამდე სამივე თამაში ფულბეკის პოზიციაზე დაიწყო, ფრთაზე გადაინაცვლებს, სადაც ალექსანდრე თოდუას (ლელო) შეცვლის.

პირველ ხაზში ლევან ჩილაჩავას (ტულონი) ნაცვლად ანტონ ფეიქრიშვილი (კარდიფი) ითამაშებს. ის გერმანიასთან შეცვლაზე შევიდა, ძირითად შემადგენლობაში კი, ბოლოს შარშან ივნისში, კანადის წინააღმდეგ მატჩში იდგა.

ერთი ცვლილებაა მეორე ხაზში - შალვა სუთიაშვილის (ანგულემი) ნაცვლად გუნდის კაპიტან გიორგი ნემსაძეს (ბრისტოლი) ნოდარ ჭეიშვილი (შამბერი) შეუწყვილდება, რომელიც ძირითადში ბელგიასთან და გერმანიასთან იდგა. სუთიაშვილმა სათადარიგოთა შორის გადაინაცვლა, სადაც კიდევ ერთი სიახლეა - ზურაბ ჟვანიას (სტად ფრანსე) ნაცვლად თამაშში კარლენ ასიეშვილი (ბრივი) ჩაერთვება.

რუსებთან მატჩში მე-80 სანაკრებო კეპს მოიხვეჭს გუნდის კაპიტანი გიორგი ნემსაძე. 50-ედ ითამაშებს ეროვნულ გუნდში შერკინების ბურჯი მიხეილ ნარიაშვილი (მონპელიე). 40-ე კეპი ექნება კოლექციაში მესამეხაზელ ლაშა ლომიძეს (ლონდონ აირიში).

მილტონ ჰეიგი, საქართველოს ნაკრების მთავარი მწვრთნელი:

"ვემზადებით თამაშისთვის, რომელსაც ისტორიულად განსაკუთრებული მნიშვნელობა აქვს ქართველი ქომაგისთვის. ჩვენ მათი კარგად გვესმის, მათ განწყობას სრულად ვიზიარებთ და შესაბამისად მოვემზადეთ. რუსეთთან მატჩს მენტალურად და ფიზიკურად მომზადებულები ვხვდებით. ტრავმების გამო გვაქვს გარკვეული ცვლილებები, თუმცა ეს არაფერს ცვლის, კრასნოდარში მოსაგებად მივდივართ".

შალვა სუთიაშვილი, საქართველოს ნაკრების მეორეხაზელი:

"ესპანეთთან მოგებულ მატჩში გვქონდა ხარვეზები და ეს დღეები მათ გამოსწორებას დაეთმო. ჩვენი მიზანია, რომ ყველა თამაში მოვიგოთ. რუსეთს პროგრესი აქვს, კარგადაა მომზადებული და მათ ჩვენს პროგრესირებად თამაშს დავუპირისპირებთ. კარგად გვესმის, რომ რუსეთთან მატჩის წინ გულშემატკივრებში განსაკუთრებული მოლოდინია და ამ შეხვედრას ჩვენთვისაც ორმაგი დატვირთვა აქვს".

მიხეილ გაჩეჩილაძე, საქართველოს ნაკრების მესამეხაზელი:

"განვიხილეთ მეტოქის თამაში და ვეცდებით, რომ შაბათს მწვრთნელების დავალებები ზუსტად შევასრულოთ. მოუთმენლად ველი რუსეთთან თამაშს, რომლის ძირითადი ბირთვიც ჩემი გუნდელები არიან."

ფაქტები
* რუსეთს 1993 წლიდან მოყოლებული, ვეთამაშებით.
* პირველი თამაში კი მოგვიგეს, მაგრამ მას შემდეგ 19 მოვუგეთ და ერთი ფრედ ვეთამაშეთ.
* კრასნოდარის მატჩი 10 მარტს ჩვენი 22-ე დაპირისპირება იქნება.
* 21 მატჩში 59 ლელო გავუტანეთ და 16 მივიღეთ, ქულები - 528:245.
* 12-12 მოგება აქვთ რუსეთის ნაკრებზე მერაბ კვირიკაშვილსა და მამუკა გორგოძეს.
* ყველაზე მეტი ლელო რუსებს ბესო უდესიანმა და ირაკლი მაჩხანელმა გაუტანეს - 5-5.

საქართველო
საქართველო: 15. მერაბ კვირიკაშვილი, 14. ანზორ სიჭინავა, 13. დავით კაჭარავა, 12. გიორგი კვესელაძე, 11. სოსო მათიაშვილი, 10. ლაშა ხმალაძე, 9. ვასილ ლობჟანიძე. 1. მიხეილ ნარიაშვილი, 2. შალვა მამუკაშვილი, 3. ანტონ ფეიქრიშვილი, 4. გიორგი ნემსაძე, 5. ნოდარ ჭეიშვილი, 6. გიორგი თხილაიშვილი, 7. ვიქტორ კოლელიშვილი, 8. ლაშა ლომიძე.
16. ბადრი ალხაზაშვილი, 17. კარლენ ასიეშვილი, 18. გიორგი მელიქიძე, 19. შალვა სუთიაშვილი, 20. მიხეილ გაჩეჩილაძე, 21. გელა აფრასიძე, 22. ლაშა მალაღურაძე, 23. გიორგი კოშაძე.

IV ტური
10 მარტი
რუმინეთი-ბელგია
ესპანეთი-გერმანია

თ მ ფ წ ბ ქ(პ)
1. საქართველო 3 3 0 0 +124 14(2)
2. რუმინეთი 3 2 0 1 +77 9(1)
3. ესპანეთი 3 2 0 1 +6 8(0)
4. რუსეთი 3 1 0 2 +24 6(2)
5. ბელგია 3 1 0 2 -34 5(1)
6. გერმანია 3 0 0 3 -197 0(0)

4373
მკითხველის კომენტარები / 1 /
gogi
0
ვგონებ, ასეთმა რიტორიკამ, რომ 15 ქართველი სჯობია 15 რუსს და ა.შ. მიგვიყვანა დღევანდელ დღემდე. ჯობია ვთქვათ, რომ 15 კარგად მომზადებული და პროფესიონალი სჯობია 15 ნაკლებად მომზადებულ და ნაკლებადპროფესიონალს. მაშინ შეიძლება დავიძრეთ ადგილიდან.
მსგავსი ამბები
რუბრიკის სხვა სიახლეები
;