ეროვნული ლიგა. 'დილა' 1:0 'კოლხეთი': კოვტალიუკი, როგორც 'კოლხეთის' რისხვა

11.10. გორი. თენგიზ ბურჯანაძე
1:0 კოვტალიუკი (87)
გამოუყენებელი პენალტი: კოვტალიუკი (69. დილა)

დილა (4-1-2-3): გუგეშაშვილი - გრიგალაშვილი, ჩადუნელი, სანტოსი, სუხიაშვილი - ნონდი - ლემპტი (78. ჯოოფი), გოგუა - ნონიკაშვილი (61. კორიფაძე), კოვტალიუკი, რიბეირო (90+1. ბაბუ).
სათადარიგოები: ბეგაშვილი, რაჟამაშვილი, კობერიძე, გაგნიძე
მწვრთნელი: გიორგი შაშიაშვილი

კოლხეთი (3-4-2-1): კნიგა - აფხაზავა, ციკოლია, ხატიაშვილი - მთივლიშვილი, პრიჩინენკო, ტყემალაძე, კაბორე - ჭეჭელაშვილი (68. მახარაძე), იმნაძე - ფენდერავა (64. შალიკაშვილი)
სათადარიგოები: ნანავა, ძაძამია, დუმბაძე, კოკაია, ყანჩაშვილი
მწვრთნელი: ვიქტორ დემიდოვი

გაფრთხილება: ნონდი (23), პრიჩინენკო (24), ხატიაშვილი (53), ფენდერავა (59)
არბიტრი: გ. კიკაჩეიშვილი

გორის "დილას" ლეგიონერი მიკოლა კოვტალიუკი ფოთის "კოლხეთის" რისხვად იქცა. წლეულს მეოთხე შეხვედრა მოუგეს გორელებმა ამ გუნდს (სხვათა შორის, ოთხივე - "მშრალად") და უკრაინელმა ოთხივე მატჩში გაუტანა კოლხებს. ამასთან, მორიგი გოლით კოვტალიუკმა კიდევ ერთი ნაბიჯი გადადგა ბომბარდირთა დავაში შესაძლო გამარჯვებისთვის...

გამოუყენებელი შანსები

როგორც მოსალოდნელი იყო, მასპინძლებმა სათამაშო ინიციატივა თავიდანვე იგდეს ხელთ. შეტევებისას ისინი დასკვნით ფაზაში საჯარიმოში ჩამოწოდებებს ანიჭებდნენ უპირატესობას, სადაც, პირველ ყოვლისა, მიკოლა კოვტალიუკზე კეთდებოდა აქცენტი.

ფოთელთა მცველებისთვის მასპინძლების ეს განზრახვა სიურპრიზი არ ყოფილა და ვიქტორ დემიდოვის დამოძღვრილები "მეორე სართულზე" თამაშსაც მნიშვნელოვან ყურადღებას აქცევდნენ. ამიტომ იყო, რომ კარგა ხანს ამ კომპონენტში "დილას" ხეირი არ უნახავს. არც საწყის 10 წუთში დენის კნიგას კართან ჩაწოდებული 3 კუთხური ყოფილა ხიფათის მომტანი.

პირველი მწვავე მომენტი კოლხების კართან შეიქმნა - გოგიტა გოგუას მიერ საჯარიმოში ჩამოწოდებული ბურთი ახლო მანძილიდან კინაღამ კარში გაგზავნა მეკარისკენ ზურგით მდგომმა გია ჩადუნელმა. ეს უკანასკნელი მერეც ხშირად ერთვებოდა იერიშებში...

22-ე წუთზე ისიფუ ლემპტიმ კარიდან დაახლოებით 17 მეტრიდან ფოთელ მცველთა უკუგდებული ბურთი ლამის ბადეში გაახვია - ოდნავ უმტყუნა მიზანმა.
მალევე სახიფათო აღმოჩნდა ლევან ნონიკაშვილის და ერიკ სანტოსის დარტყმები ახლო და საშუალო დისტანციებიდან.

ხელებჩამოყრილი არც ფოთელები მდგარან. დროის სვლასთან ერთად ცოტა შეამცირეს "დილას" უპირატესობა და კონტრშეტევებზე მწვავე ჩხვლეტებსაც ახორციელებდნენ - ვალიკო ტყემალაძემ თავურით მცირედით ააცილა მიზანს.

რიბეირო-კოვტალიუკის დუეტმა, რომელიც სხვა მატჩებში ხშირად იყო თვალში საცემი, ამ შეხვედრაში მხოლოდ ერთხელ შეგვახსენა თავი, როცა პირველი ტაიმის ბოლოსკენ ერთმანეთში "კედელი" გაითამაშეს და რიბეირომ კარისკენ გაგზავნა ბურთი, მაგრამ ხარიხას გადააცილა.

ბურთი ცენტრში არ ჩერდებოდა...

მეორე ტაიმში "დილამ" ისევ სრულად იგდო ხელთ ინიციატივა. სახიფათოდ ურტყამდნენ რიბეირო, კოვტალიუკი, ნონიკაშვილი, სანტოსი... ამასთან სათამაშო ტემპმაც იმატა და სტუმართა მცველებს უწინდელზე მეტად გაუჭირდათ გორელი ფეხბურთელების შეტევათა შეკავება.

გოლი არ გადიოდა, რადგან ფოთელთა დაცვის ხაზი კონცენტრირებული იყო და ყურადღებით მოქმედებდა. თუმცა რაღა მხოლოდ დაცვა - "კოლხეთი" თითქმის მთელი გუნდით საკუთარ ნახევარზე იდგა.

...68-ე წუთზე გორელთა გოლეადორი კოვტალიუკი წააქციეს სტუმრებმა. მსაჯმა დანიშნა პენალტი, რომელიც თავად დაზარალებულმა დაარტყა, მაგრამ კნიგას ვერ აჯობა.

პენალტის ვერგატანამ სტუმრებს შემართება შემატა და ერთხანს კონტრშეტევებსაც მოუხშირეს. ოღონდ, არც "დილას" შეუმცირებია მუხტი და შედეგად ისეთი თამაში წავიდა, ბურთი მოედნის ცენტრში აღარ ჩერდებოდა...

კიდევ ერთი თავდამსხმელი

გორული კლუბის სამწვრთნელო შტაბმა თამაშის ბოლოს თავდამსხმელის დამატება ჩათვალა საჭიროდ და შეცვლაზე გაირა ჯოოფი შეუშვა. გამბიელ ლეგიონერს ხელსაყრელი მომენტი მოედანზე შესვლისთანავე შეექმნა, თუმცა კარგ სიტუაციაში მყოფმა დარტყმა ვერ მოახერხა.

მასპინძელთა საგოლე მცდელობებმა შედეგი მატჩის მიწურულს მაინც გამოიღო. პენალტის გაფუჭების შემდეგ, კოვტალიუკმა, გაშმაგებული რომ დასტრიალებდა მეტოქის ნახევარს, 87-ე წუთზე მაინც აისრულა წადილი და გამარჯვების გოლი გაიტანა - 1:0!

ყოველდღიური სპორტული გაზეთი "ლელო"
676
მკითხველის კომენტარები / 0 /
მსგავსი ამბები
რუბრიკის სხვა სიახლეები
;