ეროვნული ლიგა. 'კოლხეთი' 0:2 'დინამო' (თბ) 'დინამომ' ვიცეჩემპიონობა დაიბევა [VIDEO]

04.12. ფოთი. პარკი არენა
0:1 შენგელია (19), 0:2 ზივზივაძე (78. შულაიას პასით)

კოლხეთი (3-4-3): მიქავა - აფხაზავა, ტყემალაძე, კაბორე - კერელეიშვილი, პრიჩინენკო (38. ციკოლია), დოროშენკო, ძაძამია - აშორტია (66. ლ. მახარაძე), შალიკაშვილი (46. კოკაია), იმნაძე
სათადარიგოები: ნანავა, გოგიძე, ჭეჭელაშვილი, ფენდერავა
მწვრთნელი: ვიქტორ დემიდოვი

დინამო (3-4-3): სიკაჩი - თოთაძე, კობოური, ძოწენიძე - რუხაია (79. ივანიშვილი), ივანისენია, ზარია (73. ქარდავა), ხარაბაძე - შულაია, ზივზივაძე, შენგელია (85. კუცია)
სათადარიგოები: მამარდაშვილი, ლოჩოშვილი, ქოჩლაძე, ერგემლიძე
მწვრთნელი: ზაურ სვანაძე
არბიტრი: პ. მაჭარაძე

ფოთის "პარკი არენაზე" თბილისის "დინამო" "კოლხეთს" ესტუმრა, დამაჯერებლად დაამარცხა და ქვეყნის ვიცეჩემპიონობა გაინაღდა...

მე-12 წუთზე პირველი სახიფათო მომენტი მასპინძლებმა შექმნეს: ლუკა იმნაძის დარტყმული ძელმა მოიგერია. ამან "დინამო" გამოაფხიზლა, შეტევები გააძლიერა და მე-17 წუთზე ზედიზედ სამი სახიფათო მომენტი შექმნა. ანგარიშის გახსნას ცდილობდა ბუდუ ზივზივაძე, რომლის დარტყმული მცველმა მოიგერია, დამატებაზე აკაკი შულაიას მეკარემ აუღო, ხოლო შემდეგ ლევან შენგელიას "ნასროლი" მიზანს ოდნავ ასცდა.

ორიოდე წუთში შენგელიამ "დინამო" მაინც დააწინაურა: კუთხურიდან მოწოდებული ბურთი იმნაძემ მოიგერია, მაგრამ საჯარიმოსთან მდგომ შენგელიას მიუგორდა, რომელმაც ძლიერად დაარტყა დაბალ კუთხეში - 1:0.

შესვენებამდე მასპინძელთა კარის აღება ზივზივაძეს შეეძლო, მაგრამ მისი დარტყმის შემდეგ ფოთელები ძელმა იხსნა.

მეორე ნახევარიც პირველის მსგავსი სცენარით დაიწყო. რეალური მომენტი ფოთელებმა შექმნეს - ვალიკო ტყემალაძის დარტყმის შემდეგ სტუმრები მეკარე სტეპან სიკაჩმა იხსნა. საპასუხოდ კი შენგელიას თავური მეკარე ბაჩო მიქავამ მოიგერია.

ზივზივაძე მთელი თამაშის განმავლობაში ეძებდა საკუთარ შანსს და 78-ე წუთზე იპოვა კიდეც - შულაიას ფლანგური გადაცემის შემდეგ მან მცველებს დაასწრო და ახლო მანძილიდან თავით გაიტანა - 2:0.

მე-80 წუთზე სხვაობის შემცირება თემურ ძაძამიას შეეძლო, მაგრამ სიკაჩმა ახლო მანძილიდან მისი დარტყმული აიღო, ოთხ წუთში კი კარის აღება ისევ იმნაძემ სცადა, მაგრამ ამჯერადაც - უშედეგოდ. ხოლო 88-ე წუთზე, იმნაძის გადაცემის შემდეგ, კარის წინ გახსნილ ლუკა მახარაძეს სხვაობის შემცირება შეეძლო, თუმცა მეკარე ფეხებში ჩაუწვა და ბურთი კუთხურზე გადაუშვა.

საბოლოოდ, "დინამომ" 2:0 მოიგო, 35 ტურის შემდეგ 69 ქულა დააგროვა და ქუთაისის "ტორპედოსთვის" მიუწვდომელი გახდა, რადგან თანაბარი ქულების შემთხვევაში თბილისელები წინ იქნებიან ურთიერთშეხვედრებში უპირატესობის გამო.

ზივზივაძემ 22 გოლით ბომბარდირთა დავაში ლიდერობა განიმტკიცა. ის ორ-ორი გოლით უსწრებს "ჩიხურას" ფორვარდ გიორგი გაბედავასა და "დილას" უკრაინელ შემტევ მიკოლა კოვტალიუკს.

ლაშა ნიშნიანიძე

თ მ ფ წ ბ ქ
1. საბურთალო 35 23 7 5 60:28 76
2. დინამო (თბ) 35 21 6 8 72:36 69
3. ტორპედო 35 19 9 7 62:25 66
4. ჩიხურა 35 18 7 10 52:32 61
5. დილა 35 16 12 7 58:39 60
6. ლოკომოტივი 35 11 8 16 42:55 41
7. რუსთავი 35 8 13 14 33:43 37
8. სიონი 35 8 7 20 38:63 31
9. სამტრედია 35 4 9 22 27:77 21
10. კოლხეთი* 35 4 8 23 26:72 14
შენიშვნა: * - კოლხეთს დაკლებული აქვს 6 ქულა

ბომბარდირები
ბ. ზივზივაძე (დინამო) 22
გ. გაბედავა (ჩიხურა) 20
მ. კოვტალიუკი (დილა) 20
ბოლო ტური
შაბათი, 8 დეკემბერი
სამტრედია-საბურთალო 15:00
დინამო (თბ)-დილა 15:00
ლოკომოტივი-რუსთავი 15:00
ჩიხურა-სიონი 15:00
ტორპედო-კოლხეთი 15:00

ყოველდღიური სპორტული გაზეთი "ლელო"
509
მკითხველის კომენტარები / 0 /
მსგავსი ამბები
რუბრიკის სხვა სიახლეები
;