ეროვნული ლიგა. 'ლოკომოტივი' 1:1 'საბურთალო: ბოლო წუთზე დაკარგული...

10.11. თბილისი. მიხეილ მესხი (სათ)
0:1 ცნობილაძე (41. ვაგნერის პასით), 1:1 შონია (89-პენ)

ლოკომოტივი (4-2-3-1): რ. თევდორაძე - გაბაძე, ლ. ქურდაძე, ნ. ჭანტურია, უბილავა - შონია, გვალია (56. ინჯგია) - დავითაშვილი (75. ჯიქია), სამურკასოვი, არდაზიშვილი (83. კიკაბიძე) - გავაშელიშვილი.
სათადარიგოები: შეროზია, ძებნიაური, კომახიძე, ჯონი
მწვრთნელი: ლაშა ჭაღიაშვილი

საბურთალო (4-1-2-3): ლ. კუპატაძე - ჩაბრაძე, მარგველაშვილი, რეხვიაშვილი, ლაკვეხელიანი - ცნობილაძე - დიასამიძე (81. ალთუნაშვილი), გორგიაშვილი - ვაგნერი, გოშთელიანი (64. ვოლკოვი), კოხრეიძე (75. დვალიშვილი).
სათადარიგოები: ბ. ქურდაძე, იაშვილი, ტატანაშვილი, გვარაძე
მწვრთნელი: გიორგი ჭიაბრიშვილი

გაფრთხილება: ლ. ქურდაძე (21), უბილავა (90)
არბიტრი: ბ. ნინუა

"საბურთალო" ახლოს იყო გამარჯვებასთან იმ შეხვედრაში, რომელიც ჩემპიონის ტიტულს აახლოვებდა. "მიხეილ მესხის" სახელობის სათადარიგო მოედანზე "ლოკომოტივთან" გამართულ მატჩში გიორგი ჭიაბრიშვილის გუნდი მთელი მატჩის განმავლობაში სათამაშო და ტერიტორიულ უპირატესობას ფლობდა. პირველ ტაიმში დაწინაურდა კიდეც, მაგრამ 89-ე წუთზე "რკინიგზელებმა" წონასწორობა აღადგინეს და ესოდენ საჭირო 3 ქულა არ დაანებეს...

საბურთალოს ტაიმი

პირველი ნახევარი "საბურთალომ" ძალიან მაღალ დონეზე ჩაატარა. ნომინალურმა სტუმრებმა ინიციატივა თავიდანვე ხელთ იგდეს და რამდენიმე სახიფათო მომენტიც შექმნეს. კარგი მატჩი ჩაატარა დაჩი ცნობილაძემ, რომელმაც გოლის გატანის გარდა, ძალიან ბევრი იშრომა.

ასევე ბევრი იბრძოლა და პროდუქტიული იყო გურამ გოშთელიანი. ერთ-ერთ ეპიზოდში მას თავით გატანა შეეძლო. საიმედო იყო "საბურთალოს" მეკარე და მთლიანად დაცვის ხაზი, ნახევარმცველები სწრაფ შეტევებს ახორციელებდნენ - გეგა დიასამიძისა და თორნიკე გორგიაშვილის წყვილი მეტოქეს ბევრ პრობლემებს უქმნიდა.

ლოკომოტიველებმა პირველ ნახევარში ერთადერთი დასამახსოვრებელი ეპიზოდი ტაიმის შუაში შექმნეს, მაგრამ მამია გავაშელიშვილის შეტევის შემდეგ ბურთი "საბურთალოს" კარს მცირედ ასცდა. 41-ე წუთზე კი გოლი სტანდარტული მდგომარეობიდან გავიდა - ვაგნერ გონსალვეშმა ბურთი საჯარიმოში ჩააწოდა, მცველები შემტევების განეიტრალებით იყვნენ გართულები და შეტევაში ჩართული ცნობილაძე გამოეპარათ, რომელიც კარის წინ კარგად გაიხსნა და თავურით "ლოკომოტივის" კარის ბადე შეარხია - 0:1.

კინაღამ ბადე შეიწირა...

მეორე ნახევარი ორმხრივ იერიშებში წარიმართა. ორ ეპიზოდში "რკინიგზელებმა" დამამთავრებელ ფაზაში ვერ ივარგეს. 86-ე წუთზე გოლის გატანის რეალური შესაძლებლობა ლადო დვალიშვილსაც ჰქონდა, მაგრამ მის მიერ დარტყმული ბურთი მცველმა კარის ხაზიდან გამოიტანა.

მასპინძლებმა ამის შემდეგ განახორციელეს საგოლე შეტევა, რომელიც "საბურთალოს" კარში 11-მეტრიანით დასრულდა. ლუკა ლაკვეხელიანმა საჯარიმოში რევაზ ინჯგია წააქცია, რომელიც "ლოკომოტივში" წლის ერთ-ერთი აღმოჩენაა და სულ უფრო თამამად თამაშობს. თემურ შონია დარტყმამდე კონცენტრირებას ცდილობდა და ისე ძლიერად დაარტყა, ლამის კარის ბადე შეიწირა - საბოლოოდ 1:1.

"საბურთალომ" კონკურენტ თბილისის "დინამოსთან" უპირატესობა 10 ქულამდე ვერ გაზარდა, ჭიაბრიშვილმა კი შედეგს "ალოგიკური" უწოდა.
შემდეგი მატჩი საბურთალოელებს სანაკრებო პაუზის შემდეგ, 26 ნოემბერს ელით - მორიგ დედაქალაქურ დერბიში ეროვნული ლიგის ერთ-ერთ მთავარ და, შეიძლება ითქვას, გადამწყვეტ მატჩში თბილისის "დინამოსთან".

მატჩის შემდეგ
"საბურთალოს" მთავარმა მწვრთნელმა გიორგი ჭიაბრიშვილმა თბილისური დერბი ასე შეაფასა:
"მართალია, "ლოკომოტივთან" შეხვედრაში დიდ უპირატესობას ვფლობდით, თუმცა მატჩი ალოგიკური შედეგით დასრულდა. ხანდახან ასეც ხდება ფეხბურთში, როცა მოსაგებ თამაშს აგებ ან წასაგებს - იგებ. ფეხბურთი ამიტომაცაა საინტერესო. ჩვენი თამაშიდან გამომდინარე, დღეს 3 ქულას ვიმსახურებდით, მეტოქესთან შედარებით ერთი თავით ძლიერები ვიყავით. რაც შეეხება თბილისის "დინამოსთან" მომავალ შეხვედრას, ვეცდებით, ჩვენი თამაში ვითამაშოთ და გავიმარჯვოთ", - ამბობს ჭიაბრიშვილი.

თ მ ფ წ ბ ქ
1. საბურთალო 32 22 5 5 58:27 71
2. დინამო (თბ) 32 19 6 7 64:32 63
3. ტორპედო 32 17 8 7 57:25 59
4. ჩიხურა 32 17 6 9 50:29 57
5. დილა 32 14 11 7 51:39 53
6. ლოკომოტივი 32 9 8 15 35:49 35
7. სიონი 32 8 7 17 35:53 31
8. რუსთავი 32 6 12 14 29:43 30
9. სამტრედია 32 4 9 19 26:69 21
10. კოლხეთი* 32 4 8 20 25:64 14
* - კოლხეთს დაკლებული აქვს 6 ქულა

ბომბარდირები
გ. გაბედავა (ჩიხურა) 20
მ. კოვტალიუკი (დილა) 17
ბ. ზივზივაძე (დინამო) 16
ლ. რიბეირო (დილა) 13
თ. კაპანაძე (ტორპედო) 13

ყოველდღიური სპორტული გაზეთი "ლელო"
1284
მკითხველის კომენტარები / 0 /
მსგავსი ამბები
რუბრიკის სხვა სიახლეები
;