ეროვნული ლიგა. 'ლოკომოტივი' 5:1 'კოლხეთი': 'ლოკომოტივი' დარჩა, კოლხეთი ვერ გადარჩა

30.11. თბილისი. მიხეილ მესხი (სათ)
1:0 დავითაშვილი (8), 2:0 გავაშელიშვილი (14), 2:1 დოროშენკო (21. ჭეჭელაშვილის პასით), 3:1 არდაზიშვილი (59. ძებნიაურის პასით), 4:1 კობახიძე (69), 5:1 ჯიქია (82)

ლოკომოტივი (3-3-3-1): რ. თევდორაძე - გაბაძე, ლ. ქურდაძე, უბილავა - ძებნიაური (79. კიკაბიძე), შონია, გვალია - დავითაშვილი (73. კომახიძე), არდაზიშვილი, ო. კობახიძე - გავაშელიშვილი (68. ჯიქია)
სათადარიგოები: ლ. შეროზია, ანდრონიკაშვილი, ინჯგია, უილიამ ჯონი
მწვრთნელი: ლაშა ჭაღიაშვილი
კოლხეთი (4-3-3): მიქავა - კერელეიშვილი, აფხაზავა, ძაძამია, ციკოლია - პრიჩინენკო, ტყემალაძე, ჭეჭელაშვილი - დოროშენკო (57. აშორტია), კაკულია (76. ლ.

მახარაძე), იმნაძე (88. ფენდერავა)
სათადარიგოები: ნანავა, მჭედლიშვილი, დუმბაძე, ყანჩაშვილი
მწვრთნელ: ვიქტორ დემიდოვი
გაფრთხილებები: დოროშჩენკო (53), იმნაძე (61)

არბიტრი: გ. ავაზაშვილი

ფოთის "კოლხეთმა" 34-ე ტურის შეხვედრა წააგო და ეროვნული ლიგიდან მესამედ გავარდა. "მიხეილ მესხის" სათადარიგო მოედანზე უძველესი ქართული კლუბი "ლოკომოტივს" ესტუმრა. ფოთელები "სამტრედიას" 7 ქულით ჩამორჩებოდნენ და ლიგაში ადგილის შესანარჩუნებლად (თუმცა ამის შანსი ისედაც მცირე იყო) მხოლოდ მოგება აძლევდათ ხელს. მასპინძლებმა სტუმრებს ეს მცირე შანსიც მოუსპეს...

ფეხბურთი, ბილიარდი და კარატე

ატალახებული მოედანი ბურთის გაგორებას შეუძლებელს ხდიდა. თუმცა, თავიდან თამაში მეტ-ნაკლებად კიდევ შესაძლებელი იყო. გოლები ინდივიდუალური გარღვევის შედეგად გავიდა. ზურიკო დავითაშვილი ორ მცველს შორის გაძვრა და მახვილი კუთხიდან ზუსტად დაარტყა - 1:0.

მასპინძლებმა უპირატესობა მალე გაზარდეს. მამია გავაშელიშვილმა ორ მცველს შორის ბილიარდისტის სიზუსტით დაარტყა და ანგარიში 2:0 გახდა.
მე-15 წუთზე მშობლიური ქალაქის გუნდის კარს ლაშა გვალიაც დაემუქრა და მიზანს ოდნავ ააცილა.

ფოთელებმა გაიბრძოლეს და მალე კირილო დოროშენკომ საჯარიმოს სიახლოვიდან ძლიერი და ეფექტური ("მოჭრილი") დარტყმით სხვაობა შეამცირა - 2:1.
29-ე წუთზე თბილისელებს ორბურთიანი სხვაობის აღდგენა შეეძლოთ: ლუკა იმნაძემ ფლანგზე ქუსლით სცადა ბურთის მოედანზე დაბრუნება, მაგრამ ლოკომოტიველ ოთარ კობახიძეს მიუგორა, რომელმაც ასევე ქუსლით მეკარესთან პირისპირ გავაშელიშვილი დატოვა - "კოლხეთი" მეკარე ბაქო მიქავამ გადაარჩინა. შეტევა გაგრძელდა და გავაშელიშვილმა უკვე თავად კობახიძეს უპასა, რომელსაც მეკარემ ისევ აჯობა.

34-ე წუთზე, კუთხური დავითაშვილმა მოაწოდა, გიორგი გაბაძემ ბურთი კარატისტივით დაარტყა, მიქავამ კი კარის ხაზზე დაამიწა.

ტალახი და... ჭკუა

შესვენების მოახლოებასთან ერთად მოედანი კიდევ უფრო ატალახდა და თამაში უფრო გართულდა. გუნდები ბურთის გაგორებას ვეღარ ახერხებდნენ. ამიტომ, ჭკუა იხმარეს და შეტევების ორგანიზებას მაღალი გადაცემებით ცდილობდნენ.

მეორე ტაიმში პირველი სახიფათო მომენტი 55-ე წუთზე ოთარ კობახიძემ შექმნა, რომელიც საჯარიმოში შეიჭრა და ძლიერად, მაგრამ არაზუსტად დაარტყა. ლოკომოტიველებმა შედეგს ოთხ წუთში მიაღწიეს. თორნიკე ძებნიაურმა საჯარიმოს სიახლოვეს რატი არდაზიშვილს უპასა და ულამაზესი გოლით მიქავას შანსი არ დაუტოვა 3:1.

69-ე წუთზე ფოთელთა მცველმა დავით უბილავას მიერ ჩაწოდებული ბურთი მოიგერია, ამ დროს მეკარე წინ გამოვარდა, ბურთი კი კობახიძეს მიუგორდა, რომელმაც ცარიელ კარში გაიტანა - 4:1.

გავიდა ორიოდ წუთი და არდაზიშვილის მშვენიერი გადაცემით მეკარესთან პირისპირ დარჩა დავით ჯიქია, რომელმაც მეკარეს ვერ აჯობა, დამატებაზე კი უბილავას მცველი გადაეფარა.

მალე ჯიქიამ შანსი მაინც გამოიყენა. კოლხთა მეკარემ და მცველმა შეუთანხმებლად იმოქმედეს და ბურთი მიუგორდა ჯიქიას, რომელმაც ცარიელი კარი აიღო - 5:1.

როდემდე უნდა გაგრძელდეს?!.

"ლოკომოტივმა" 41 ქულა დააგროვა, პლეი აუტის ზონაში მყოფ "სიონს" მთელი 10 ქულით გაუსწრო და ეროვნულ ლიგაში ადგილი შეინარჩუნა. "კოლხეთი" კი მომავალ სეზონს ლიგა 2-ში გაატარებს - გუნდი, რომელიც ორჯერ იყო ქვეყნის ვიცე-ჩემპიონი და სამჯერ - ბრინჯაოს მედალოსანი.

კითხვა კითხვად რჩება - როდემდე უნდა გაგრძელდეს უძველესი კლუბისადმი ასეთი აგდებული დამოკიდებულება ფოთში, საიდანაც საქართველოში ფეხბურთი შემოვიდა?

ყოველდღიური სპორტული გაზეთი "ლელო"
639
მკითხველის კომენტარები / 0 /
მსგავსი ამბები
რუბრიკის სხვა სიახლეები
;