ეროვნული ლიგა. მესამე 0:0, ამჯერად 'საბურთალო' და 'დილა'

19.08. თბილისი. მიხეილ მესხი
საბურთალო-დილა 0:0
საბურთალო (4-2-3-1): ლ. კუპატაძე - ჩაბრაძე, მარგველაშვილი, რეხვიაშვილი, ლაკვეხელიანი - ტერა, გორგიაშვილი - კოხრეიძე (75. თარგამაძე), დიასამიძე (76. ვოლკოვი), ვაგნერი - დვალიშვილი (82. ტატანაშვილი)
სათადარიგოები: ბ. ქურდაძე, ნადარაია, გოშთელიანი, ცნობილაძე
მწვრთნელი: გიორგი ჭიაბრიშვილი
დილა (4-2-3-1): გუგეშაშვილი - თორ. გრიგალაშვილი, ჩადუნელი, გადრანი, კორიფაძე - რაზმაძე (90+2. ნონდი), გოგუა - ბაბუ (61. გ. სამუშია), ნონიკაშვილი, რიბეირო - ჯოოფი (80. ლემპტი)
სათადარიგოები: ბეგაშვილი, მამულაშვილი, სანტოსი, სუხიაშვილი
მწვრთნელი: რამაზ სოლოღაშვილი
გაფრთხილებები: გოგუა (12), რეხვიაშვილი (38), გონსალვესი (72), ნონიკაშვილი (79), ჩადუნელი (84)
არბიტრი: ი. კვირიკაშვილი

XXI ნაკლულ ტურში უცნაური ამბავი მოხდა - 4 მატჩში მხოლოდ... 2 გოლი გავიდა და სამ თამაშში 0:0 დაფიქსირდა. ტური უიღბლო გამოდგა ლიდერებისთვისაც...

სიხისტე და გოგუა

პირველ სამეულში მყოფი თბილისის "დინამო" და "ჩიხურა" თითო ქულას დასჯერდნენ. მეტოქე გუნდებისთვის არასასურველი შედეგები "საბურთალოს" ძალიანაც აწყობდა (ლიდერსა და მდევარს შორის დისტანცია უცვლელი დარჩა) და "დილასთან" სათამაშოდ დიდი სტიმულითაც გავიდა, მით უმეტეს, სეზონის პირველ ნახევარში ლიდერმა ყველაზე მტკივნეული მარცხი (1:4) სწორედ გორელებისგან იგემა...

მაგრამ მას შემდეგ "დილაში" რაღაც ბოლომდე ვერ აეწყო, მთავარი მწვრთნელი გიორგი დარასელია მოხსნეს, მის ნაცვლად კი გორელები მოედანზე რამაზ სოლოღაშვილმა გაიყვანა. თუმცა, ეს ოფიციალურად, თორემ გუნდს დავალებებს გიორგი შაშიაშვილი აძლევდა. როგორც გვითხრეს, ფაქტობრივად, ის უკვე დანიშნულია...

შაშიაშვილმა გორელები მკაცრად ათამაშა, მაღალი პრესინგითა და, რაც მთავარია, ძალიან ხისტად. თავიდან "საბურთალოს" ამასთან შეგუება გაუჭირდა და ფეხბურთელები მოედანზე ერთმანეთის მიყოლებით ეცემოდნენ. მერე კი მასპინძლები მეტოქის სიხისტეს ალღო აუღეს...

სახიფათო იყო ვაგნერ გონსალვესის შეტევა, ლადო დვალიშვილის დარტყმა, მაგრამ "დილას" კართან ნაღდი საგოლე მომენტი ვერა და ვერ შექმნეს. გორელებმა კი მე-15 წუთზე კინაღამ კურიოზული გოლი გაიტანეს: გორელთა მეკარე ლუკა გუგეშაშვილმა ბურთი თამაშში შეიყვანა და კინაღამ ლაზარე კუპატაძეს თავზე გადაევლო და ბოლო მომენტში ხაზზე დაამიწა.

მე-17 წუთზე კი კარში სახიფათოდ დაარტყა ლევან ნონიკაშვილმა და "საბურთალო" კუპატაძემ გადაარჩინა. 24-ე წუთზე კი არბიტრმა დაინდო გოგიტა გოგუამ (მანამდე ყვითელი ბარათი ჰქონდა მიღებული), რომელმაც ვაგნერი უკნიდან მოცელა...

27-ე წუთზე "საბურთალომ" რეალური საგოლე მომენტი შექმნა - ელვინ ტერას გადაცემის შემდეგ კართან გეგა დიასამიძე გაიხსნა, მაგრამ მის თავურ გუგეშაშვილმა ივაჟკაცა და გუნდი გადაარჩინა.

მეორე ნახევარი

"საბურთალო" მეორე ნახევარში მოედანზე უფრო მობილიზებულად გავიდა და კიდევ რამდენიმე რეალური საგოლე მომენტი შექმნა. მაგრამ გორელები მეტოქეს არაფერს უთმობდნენ და შეძლებისდაგვარად, მწვავედ უტევდნენ, თუმცა ასეთივე შანსი ნაკლებად ჰქონდათ.

59-ე წუთზე, გია ჩაბრაძის ფლანგური გადაცემის შემდეგ, საჯარიმოში დვალიშვილი მცველს გაექცა და დაარტყა, მაგრამ რეალური საგოლე მომენტით ვერ ისარგებლა. "საბურთალომ" ზედიზედ სამჯერ მოიპოვა ხელსაყრელი პოზიციიდან ჯარიმის შესრულების უფლება, მაგრამ ამითიც ვერ ისარგებლა.

გორელთა მჭიდრო დაცვის გარღვევა კი სხვაგვარად ძალიან ჭირდა. 70-ე წუთზე თბილისელებმა ეს მაინც მოახერხეს, თუმცა გიორგი კოხრეიძის თავური პასით კარის წინ მყოფმა დვალიშვილმა ვერ ისარგებლა...

74-ე წუთზე იმავე კოხრეიძემ თავად შეუტია და გუგეშაშვილმა კვლავ საიმედოდ ითამაშა. ცოტა ხანში ასევე თავით სცადა ბედი გაგი მარგველაშვილმა, მაგრამ ესეც უშედეგოდ. მერე სახიფათო გამოდგა გორელთა მცველის, გიორგი გადრანის დარტყმა და ამჯერად კუპატაძემ ივარგა.

87-ე წუთზე თამაში ვაგნერმა გაამწვავა, დრიბლინგით მეტოქეებს გაცდა და დაარტყა, გუგეშაშვილის მიერ მოგერიებული ბურთი მეკარის საჯარიმოში ლუკა ლაკვეხელიანმა დააბრუნა, მაგრამ გორელებმა ვითარება განმუხტეს.

სამნი ნაკრებიდან და ერთი ახალგაზრდა

მოედანზე ეროვნულ ლიგაში ახლახან დაბრუნებული საქართველოს ნაკრების სამი ყოფილი მოთამაშე ვიხილეთ. გოგუა მხოლოდ ზემოთ ნახსენები უხეშობის ეპიზოდით არ გამოირჩეოდა - სანამ ძალა ეყო, "დილაში" გამორჩეული გახლდათ, კარგად იბრძოდა და თამაშიც კარგად მიჰყავდა. 35 წლისაც გოგუა იმ თვისებებით დაგვამახსოვრდა, რითიც - ადრეულ წლებში.

ხანგრძლივი პაუზის შემდეგ, ოფიციალურ მატჩში პირველად გამოჩნდა მოედანზე დავით თარგამაძე. მას სიფრთხილე ეტყობოდა, ჯერ თავდაჯერებული ვერ არის, მაგრამ ორიოდე ეპიზოდში თავი მაინც გამოიჩინა...

"საბურთალოში" დვალიშვილმა ითამაშა და როგორც მისთვის არის დამახასიათებელი, იბრძოლა და ბოლომდე დაიხარჯა.

კარგი იყო ახალგაზრდული ნაკრების მეკარე ლუკა გუგეშაშვილიც. ის პოლონეთში აშკარად გაიზარდა, დაღვინდა და თავდაჯერებული გახდა. "დილაში" პრაქტიკისთვის ჩამოსული - ლიდერთან მატჩში ისე კარგად გამოიყურებოდა, შეუძლებელია, მისი სანაკრებო პერსპექტივის გათვალიწინებით, არ გაგვხარებოდა.

1366
მკითხველის კომენტარები / 0 /
მსგავსი ამბები
რუბრიკის სხვა სიახლეები
;