ეროვნული ლიგა. 'საბურთალო' 1:0 'სამტრედია': ლიდერი ერთი დღით, თუ?.. [VIDEO]

01.05. თბილისი. მიხეილ მესხი
1:0 დიასამიძე (69)

საბურთალო (4-2-3-1): კუპატაძე - იაშვილი, მარგველაშვილი, რეხვიაშვილი, ნადარაია (62. ლაკვეხელიანი) - თარხნიშვილი (65. ალთუნაშვილი), გორგიაშვილი - ვაგნერი, დიასამიძე, გვარაძე - ტატანაშვილი (80. გოშთელიანი)

სათადარიგოები: ქურდაძე, მამუჩაშვილი, ჩაბრაძე, ტერა
მწვრთნელი: გიორგი ჭიაბრიშვილი

სამტრედია (4-2-3-1): მიგინეიშვილი - ჩაჩუა, შ. კერძევაძე, ქარქუზაშვილი, ბაჩიაშვილი - დაუშვილი, სანია - კირკიტაძე, გიი, მესიაჩენკო (73. ერისთავი) - ხაბეიშვილი (76. ქაშიბაძე)

სათადარიგოები: ი. სტურუა, ხაჩიძე, ერისთავი, ა. ნინუა, ოლხოვი, მანჯგალაძე
მწვრთნელი: ბადრი კვარაცხელია

გაფრთხილებები: ნადარაია (57), თარხნიშვილი (61)

არბიტრი: გ. ვადაჭკორია

წინა ტურში საჩხერის "ჩიხურასთან" დამარცხებულ "საბურთალოს" თბილისის "დინამო" წამოეწია. სატურნირო ცხრილში ორხელისუფლებიანობის შესაცვლელად გიორგი ჭიაბრიშვილის გუნდს აუცილებლად მოგება სჭირდებოდა...

მოტივაცია და პრობლემები

...თავის მხრივ, ბადრი კვარაცხელიას დანიშვნის შემდეგ, "სამტრედიას" ბოლო სამ მატჩში ბურთი არ გაუშვია და არც წაუგია. მაგრამ მის მომთხოვნ გულშემატკივარს მხოლოდ ეს არ აკმაყოფილებს - გუნდს თავადაც არ გაუტანია და, შესაბამისად, ვერც იგებს, წარმატებას მიჩვეული ფანები კი "სამტრედიასგან" მხოლოდ მოგებას ელიან...

გუნდის განაცხადში კვლავ არ იყო ცენტრალური მცველი ანრი ნდონგი, ივან ფატიჩს კი ტრავმა აწუხებს. იმერული გუნდისთვის განსაკუთრებით პრობლემური თავდასხმის ხაზია, რადგან მეორე ტურში მაიკლ ოლაიტანის დაშავების შემდეგ ამ პოზიციაზე გამოცდილი თავდამსხმელი აღარ დარჩათ. ამის გამო კვარაცხელიამ ძირითად შემადგენლობაში ანატოლი მესიაჩენკო და ზაურ ხაბეიშვილი დააყენა...

იშვიათი გამოხდომა

თამაში "საბურთალოს" უპირატესობით დაიწყო, მაგრამ მასპინძლებს მეტოქის საჯარიმოში შეღწევა უჭირდათ. პირველად ომარ მიგინეიშვილის კარს ბექა გვარაძე დაემუქრა, რომლის "გასროლის" შემდეგ ბურთი ძელს მოხვდა, მეკარეს შეეხო და კუთხურზე გადავიდა.

"სტანდარტიც" სახიფათო გამოდგა - მცველებს შეტევაში ჩართული გიორგი რეხვიაშვილი გამოეპარათ, თუმცა თბილისელთა მცველი ბურთს ვერ შესწვდა და სამტრედიელები გადარჩნენ.

ასევე სახიფათო იყო ვაგნერ გონსალვესის კუთხური - დიმიტრი ტატანაშვილი ბურთს კართან ჩაუსაფრდა, მაგრამ მისი თავური მიზანს ასცდა.

სამტრედიელები დაცვაში ისხდნენ და შეტევას იშვიათად ახორციელებდნენ. ერთ-ერთი ასეთი გამონაკლისი 50-ე წუთზე ინტერს გიის შეტევა იყო, რომელიც "საბურთალოს" საჯარიმოში შეიჭრა, მაგრამ არაზუსტად დაარტყა.

მოულოდნელი ჩხვლეტა

ანგარიშის გახსნის რეალური შანსი 58-ე წუთზე დიმიტრი ტატანაშვილს ჰქონდა, რომელიც ვაგნერმა დასარტყმელ პოზიციაზე გაიყვანა, მაგრამ მიგინეიშვილმა ბურთი კუთხურზე მოიგერია და გუნდი აშკარა გოლისგან იხსნა. "სტანდარტი" გეგა დიასამიძემ შეასრულა, გაგი მარგველაშვილმა მცველებს დაასწრო და ბურთი თავით კარში გაგზავნა, სამტრედიელთა მეკარე გამოსვლაზე შეცდა, მაგრამ ბურთმა სტუმართა კარს სანტიმეტრებში ჩაუქროლა და "სამტრედია" კიდევ ერთხელ გადარჩა.

69-ე წუთზე "საბურთალომ" მაინც მიაღწია მიზანს. გოლი, რომ იტყვიან, არაფრისგან გავიდა - დიასამიძემ ბურთი საჯარიმოსთან მიიღო და მოულოდნელად დაარტყა, რასაც მიგინეიშვილი არ ელოდა და, შესაბამისად, რეაქცია დაუგვიანდა, ბურთმა კი ბადე შეარხია.

დარჩენილ დროში ანგარიში აღარ შეცვლილა და "საბურთალომ" 1:0 გაიმარჯვა. თბილისელებმა 21 ქულა დააგროვეს, სატურნირო ცხრილს ისევ სათავეში მოექცნენ და აქვთ შანსი, პირველი წრე ერთპიროვნული ლიდერის სტატუსით დაასრულონ. გააჩნია, როგორ დასრულდება დღევანდელი მატჩი გორში, სადაც თბილისის "დინამო" სტუმრობს...

ყოველდღიური სპორტული გაზეთი "ლელო"
960
მკითხველის კომენტარები / 0 /
მსგავსი ამბები
რუბრიკის სხვა სიახლეები
;