ეროვნული ლიგა. 'საბურთალო' 4:1 'კოლხეთი': გარანტირებული არაფერია

'საბურთალო' 4:1 'კოლხეთი'

21.10. თბილისი. მიხეილ მესხი
1:0 ტერა (12. დიასამიძის პასით), 2:0 დიასამიძე (23. ვაგნერის პასით), 3:0 დიასამიძე (50. ვაგნერის პასით), 3:1 იმნაძე (53. იმედა აშორტიას პასით), 4:1 დვალიშვილი (74. ლ. კუპატაძის პასით)

საბურთალო (4-2-3-1): ლ. კუპატაძე - ჩაბრაძე, მარგველაშვილი, რეხვიაშვილი, ლაკვეხელიანი - ტერა, გორგიაშვილი - ვაგნერი (62. დვალიშვილი), გოშთელიანი (54. ტატანაშვილი), დიასამიძე - კოხრეიძე (46. თარგამაძე)
სათადარიგოები: ბ. ქურდაძე, იაშვილი, ვოლკოვი, ცნობილაძე
მწვრთნელი: გიორგი ჭიაბრიშვილი

კოლხეთი (4-2-3-1): კნიგა - კერელეიშვილი, ციკოლია, ხატიაშვილი (28. კაბორე), აფხაზავა - ჭეჭელაშვილი (59. კაკულია), ტყემალაძე - აშორტია (80. პრიჩინენკო), დოროშჩენკო, მთივლიშვილი - იმნაძე
სათადარიგოები: მიქავა, ძაძამია, მჭედლიშვილი, ფენდერავა
მწვრთნელი: ვიქტორ დემიდოვი
გაფრთხილებები: ჭეჭელაშვილი (19)

არბიტრი: ბ. ნინუა

"საბურთალომ" იოლად დაამარცხა ფოთის "კოლხეთი" და ჩემპიონობას მიუახლოვდა...

ზედიზედ მეორედ...

ჩემპიონატის დასრულებამდე რვა ტურით ადრე, ყოველ მატჩსა და ქულას დიდი მნიშვნელობა ენიჭება. ცხადია, შეხვედრა მნიშვნელოვანი იყო ფოთელებისთვისაც. პირველი ქართული კლუბი, სამწუხაროდ, ბოლო ადგილზეა და ეროვნული ლიგიდან გავარდნის რეალური კანდიდატია...

ლიდერმა ანგარიში მე-12 წუთზე გახსნა. ელვინ ტერამ მისივე წამოწყებული შეტევა დააგვირგვინა, რომელიც გურამ გოშთელიანმა სწრაფად გაუგრძელა გეგა დიასამიძეს, რომელმაც კენიელი ნახევარმცველი ჩინებული გადაცემით მეკარესთან პირისპირ დატოვა და - 1:0.

გიორგი ჭიაბრიშვილის გუნდმა უპირატესობა მალევე გაზარდა და გმირი ისევ დიასამიძე გახლდათ: ვაგნერ გონსალვეშმა მეკარესთან პირისპირ გაიყვანა თბილისელთა ნახევარმცველი, რომელსაც ახლოდან გატანა არ გასჭირვებია - 2:0.

"საბურთალოს" მესამე გოლიც იმავე მოთამაშეებმა შექმნეს. ვაგნერმა შეტევა დიასამიძეს გაუგრძელა, რომელიც ორ მცველს შორის გაძვრა, მესამე ცრუ მოძრაობით ჩამოიშორა და მეკარეს შორეულ კუთხეში აუღებელი დაურტყა - 3:0. ეს დიასამიძის ზედიზედ მეორე დუბლი და საგოლე პასია!

სამიოდე წუთში ფოთელთა ფლანგის შემტევმა იმედა აშორტიამ გუნდის კაპიტანი ლუკა იმნაძე საჯარიმოსთან მოძებნა, რომელმაც ძლიერი "გასროლით" "ცხრიანი" შეარხია - 3:1.

წლისა და ხუთი თვის შემდეგ...

"საბურთალოს", ფაქტობრივად, მოგება განაღდებული ჰქონდა, მოედანზე ლადო დვალიშვილი რომ გამოჩნდა - თავდამსხმელი, რომელსაც ვლადიმირ ვაისი დღემდე საქართველოს ნაკრების კანდიდატებში მოიაზრებს...

დვალიშვილი მოედანზე 62-ე წუთზე შევიდა, 74-ე წუთზე კი "საბურთალოს" მაისურით თავისი პირველი გოლი გაიტანა - "კოლხეთის" მცველი მურად აფხაზავა შორეული გადაცემის მოგერიებას ცდილობდა, როცა 32 წლის გამოცდილმა თავდამსხმელმა ბურთი აართვა და მეკარეს შორეულ კუთხეში მოჭრილი, ლამაზი დარტყმით გაუტანა.

აღსანიშნავია, რომ დვალიშვილმა ბოლოს თავი ყაზახეთის ჩემპიონატში, 2017 წლის 28 მაისს გამოიჩინა, როცა "ატირაუში" თამაშობდა და "აკჟაიკთან" მატჩში დუბლი შეასრულა. მას მერე წელიწადი და 5 თვე გავიდა. იმედია, ეს გოლი დვალიშვილს დანავსული პერიოდის გადალახვაში დაეხმარება და ნაკრებსაც გამოადგება.

ამ გოლში კიდევ ერთი რამაა აღსანიშნავი - რეალურად, საგოლე გადაცემის ავტორი საქართველოს ნაკრების მეკარე ლაზარე კუპატაძე აღმოჩნდა - საკუთარიდან მეტოქის საჯარიმოში ბურთი სწორედ მან გადააგდო...

სცილასა და ქარიბდას შორის...

29-ე ტურში, "საბურთალოს" უშუალო კონკურენტმა თბილისის "დინამომ" ფრედ (0:0) ითამაშა "ლოკომოტივთან" დედაქალაქურ დერბიში და ლიდერს 7 ქულით ჩამორჩა. თუმცა "დინამოს" ერთი მატჩით ნაკლები აქვს ჩატარებული - XXII ტურის გამოტოვებულ მატჩს დინამოელები 31 ოქტომბერს, თბილისში ქუთაისის "ტორპედოს" წინააღმდეგ ჩაატარებენ.

...რა თქმა უნდა, "საბურთალოს" ჩემპიონობა გარანტირებული ნამდვილად არ აქვს და დარჩენილი 7 მატჩი ჭიაბრიშვილის გუნდისთვის სცილასა და ქარიბდას შორის გავლის ტოლფასი იქნება


თ მ ფ წ ბ ქ
1. საბურთალო 29 21 3 5 55:25 66
2. დინამო (თბ) 28 18 5 5 53:24 59
3. ჩიხურა 29 15 5 9 44:27 50
4. ტორპედო 28 14 7 7 45:23 49
5. დილა 29 13 10 6 49:36 49
6. ლოკომოტივი 29 9 6 14 34:47 33
7. რუსთავი 29 6 12 11 27:36 30
8. სიონი 29 6 6 17 28:51 24
9. სამტრედია 29 3 9 17 24:53 18
10. კოლხეთი* 29 4 7 18 24:61 13
* - კოლხეთს დაკლებული აქვს 6 ქულა

ბომბარდირები
გ. გაბედავა (ჩიხურა) 16
მ. კოვტალიუკი (დილა) 15
ბ. ზივზივაძე (დინამო) 14
ლ. რიბეირო (დილა) 13

მომდევნო ტური

პარასკევი, 26 ოქტომბერი,
რუსთავი-ჩიხურა 15:00

შაბათი, 27 ოქტომბერი
კოლხეთი-სიონი 15:00
სამტრედია-დინამო (თბ) 18:00
დილა-საბურთალო 20:00

კვირა, 28 ოქტომბერი
ლოკომოტივი-ტორპედო 15:00

ყოველდღიური სპორტული გაზეთი "ლელო"
720
მკითხველის კომენტარები / 0 /
მსგავსი ამბები
რუბრიკის სხვა სიახლეები
;