ეროვნული ლიგა. "სამტრედიამ" ჩემპიონატი მოგებით გახსნა [VIDEO]

"სამტრედიამ" ეროვნული ლიგა მოგებით გახსნა. "მიხეილ მესხი 2-ზე" გამართულ შეხვედრაში განახლებული შემადგენლობით მოთამაშე ორი გუნდი ვიხილეთ.

სამი შვიდის წინააღმდეგ

სეზონის სასტარტო მატჩში "ლოკომოტივის" ძირითადში სამი ახალწვეული იყო - თემურ შონია, დავით ჯიქია და ზურაბ დავითაშვილი, ხოლო "სამტრედიას" ძირითადში ასეთი 7 მოთამაშე დავთვალეთ - უჩა ლობჟანიძე, ივან ფატიჩი, რომან ჩაჩუა, ბუბა დაუშვილი, გიორგი განუგრავა, გიორგი ერისთავი და ვაკო ბაჩიაშვილი.

სამტრედიელთა შენაძენი იმითაა აღსანიშნავი, რომ ეროვნული ნაკრების ორი მოთამაშე, დაუშვილი და ლობჟანიძე დაიმატეს. ჰოდა, გამოჩნდა კიდეც, რომ ისინი ჩვენს ჩემპიონატში პატარა ძალას არ წარმოადგენენ. სხვათა შორის, ახალი იყო "სამტრედიას" სათამაშო სქემაც - გუნდი მოედანზე 3-4-3 განლაგებით გავიდა.

დასაწყისი

განახლებულმა და კიდევ უფრო გაახალგაზრდავებულმა  "ლოკომოტივმა"  მატჩი აქტიურად დაიწყო. ფეხბურთელები ხშირი მოძრაობით ცდილობდნენ თავისუფალი სივრცეების ათვისებას და მეტოქის კართან მისვლას.

განსაკუთრებით აქტიური ზურაბ დავითაშვილი გახლდათ, რომელმაც პირველად სცადა მეტოქის კარის აღება და მიზანს ოდნავ ააცილა.

საერთოდ, პირველი წუთები სწრაფად წარიმართა და ბურთი მოედნის ცენტრში არ ჩერდებოდა. მაგრამ სამტრედიელებმა მეტოქე მალე შეაჩერეს, ცენტრის გაკონტროლება მოახერხეს და ანგარიშიც გახსნეს: მასპინძელთა საჯარიმო ხაზთან ვასიკო ბაჩაშვილის წაქცევისთვის დანიშნული ჯარიმა გიორგი ერისთავმა შეასრულა და ბურთი "ცხრიანში" გაახვია - 0:1.

სამტრედიელები საკმაოდ გამართულად და პრაგმატულად ამოქმედდნენ და 29-ე წუთზე მეორე გოლის შანსიც მიეცათ. მაგრამ ერისთავის კუთხურის შემდეგ კარში ვერც ბაჩიაშვილმა დაარტყა და ვერც - ანრი ნდონგმა.

გამოცდილმა სამტრედიელებმა მეტოქის შეტევების ჩაკვლა და შეჩერება მოახერხეს - თუკი დასაწყისში "ლოკომოტივს" კართან მიახლოება უჭირდა, ახლა წინა ხაზში არაფერი გამოსდიოდა.

თუმცა სწრაფი შეტევების განხორციელებას "სამტრედიაც" ვერ ახერხებდა და ძირითადად ბურთი "ლოკომოტივის" საჯარიმოსა და მოედნის ცენტრს შუა ტრიალებდა. მაგრამ ფაქტია, ასეთი თამაში დაწინაურებულ სტუმარს უფრო აწყობდა, ვიდრე - მასპინძლებს."სამტრედია" ტემპსაც აკონტროლებდა, თამაშსაც და შანსსაც მოთმინებით ელოდა.

დროებით გამოფხიზლდნენ

მეორე ნახევარი მასპინძლებმა აქტიურად დაიწყეს, რამდენიმე რეალური საგოლე მომენტიც შექმნეს და მიზანსაც მიაღწიეს: 46-ე წუთზე გიორგი განუგრავასთან შეჯახების შემდეგ საჯარიმოში დავით ჯიქია წაიქცა და მასპინძლები პენალტს ითხოვდნენ.

47-ე წუთზე დავითაშვილმა სახიფათოდ დაარტყა, 49-ე წუთზე კი კარს უკვე ჯიქია დაემუქრა, რომელმაც საჯარიმოსთან დაუშვილის გადაცემა ჩაჭრა და ძლიერად "გაისროლა" - ორივე შემთხვევაში ომარ მიგინეიშვილმა საიმედოდ ითამაშა და გუნდი გადაარჩინა.

მაგრამ 50-ე წუთზე სტუმრებს გამოცდილმა მეკარემაც ვეღარ უშველა: საჯარიმოში შეჭრილი ვატო არველაძე რომან ჩაჩუამ წააქცია და დაინიშნა პენალტი, რომელიც თემურ შონიამ გოლად აქცია - 1:1.

57-ე წუთზე სტუმრები ისევ მიგინეიშვილმა გადაარჩინა: გიორგი გაბაძის ფლანგურ გადაცემას არველაძე თავით აგვირგვინებდა და სამტრედიელთა მეკარის ნახტომი დროული იყო...

გამოცდილების ფასი და კლასი

"ლოკომოტივი" დიდ უპირატესობას დაეუფლა და სტუმრები ვერაფერს ახერხებდნენ. ამ ვითარებიდან ამოვარდნილი ჩანდა სამტრედიელთა ჯარიმა, რომელიც ივან ფატიჩმა შეასრულა - ამჯერად, გუნდი რევაზ თევდორაძემ გადაარჩინა, რომელმაც ბურთი "ცხრიანიდან მოხსნა".

ნელ-ნელა სტუმრებმა მდგომარეობა გამოასწორეს და მთელი ძალებით შეუტიეს. 65-ე წუთზე თევდორაძემ გუნდი უკვე ინტერს გიის ტექნიკური დარტყმის შემდეგ იხსნა.

სტუმართა მთავარმა მწვრთნელმა უჩა სოსიაშვილმა, შეტევების გასაძლიერებლად, 67-ე წუთზე ორი დასვენებული ფეხბურთელი შეიყვანა: ჩაჩუა გიორგი ახალაძემ შეცვალა, ხოლო გიორგი განუგრავა - ლუკას ვეილმა. ამ სვლამ მალევე გაამართლა. მოედანზე ორიოდე წუთის შესული ახალაძის გადაცემით მაიკლ ოლაიტანმა "სამტრედია" ისევ დააწინაურა - 1:2.

ბოლო წუთებზე, "ლოკომოტივმა" შეტევების გაძლიერება სცადა, კარსაც რამდენჯერმე დაემუქრა. თუმცა ვერაფერს გახდა გუნდთან, რომელიც მთლიანობაში უფრო გამოცდილი და შედარებით მაღალი კლასის მოთამაშეებითაა დაკომპლექტებული. ეს კი ფეხბურთში თითქმის ყოველთვის გადამწყვეტ როლს თამაშობს.




05.03. თბილისი. მიხეილ მესხი (სათ)

0:1 ერისთავი (13), 1:1 შონია (50-პენ), 1:2 ოლაიტანი (69. ახალაძის პასით)

ლოკომოტივი (4-2-3-1): თევდორაძე - გაბაძე, ჭანტურია, ხიდეშელი, უბილავა - შონია, სამურკასოვი - კიკნაძე (66. გავაშელიშვილი), ჯიქია (75. კობახიძე), დავითაშვილი - არველაძე (84. კიკაბიძე)

სათადარიგოები: შეროზია, ლ. ქურდაძე, გვალია, კომახიძე
მწვრთნელი: ლაშა ჭაღიაშვილი

სამტრედია (3-4-3): მიგინეიშვილი - ლობჟანიძე, ნდონგი, ფატიჩი - ჩაჩუა (67. ახალაძე), დაუშვილი, განუგრავა (67. ვეილი), ბაჩიაშვილი - ერისთავი (73. კირკიტაძე), ოლაიტანი, გიი.
სათადარიგოები: ი. სტურუა, ხაჩიძე, ქარქუზაშვილი, მესიაჩენკო

მწვრთნელი: უჩა სოსიაშვილი
გაფრთხილება: დაუშვილი (30), ხიდეშელი (60), კობახიძე (90)

არბიტრი: გ. ვადაჭკორია

ყოველდღიური სპორტული გაზეთი "ლელო"
1070
მკითხველის კომენტარები / 0 /
მსგავსი ამბები
რუბრიკის სხვა სიახლეები
;