ეროვნული ლიგა. სიონთან გასეირნება არ გამოვა

ტორპედო-სიონი 3:2
02.02. ქუთაისი. რამაზ შენგელია
1:0 წიქარიძე (13. ჭიჭინაძის პასით), 1:1 ისიანი (22. რაჟამაშვილის პასით), 2:1 . ქავთარაძე (34. ზივზივაძის პასით), 2:2 უგულავა (62. . კირკიტაძის პასით), 3:2 კაპანაძე (76. დოლიძის პასით)
ტორპედო (4-2-3-1): ქვილითაია - გეგეჭკორი, კობახიძე, აზაცკი, სტიეპოვიჩი - ჭიჭინაძე (74. ლუკა), ცინცაძე - . ქავთარაძე, წიქარიძე, ქიმაძე (46. დოლიძე) - ზივზივაძე (64. კაპანაძე)
სათადარიგოები: მიქაია, ნებიერიძე, ხურცილავა
მწვრთნელი: კახაბერ ჩხეტიანი
სიონი (4-2-3-1): ზარქუა - სუხიაშვილი, აფაქიძე, თომაშვილი, ტვილდიანი - ხმალაძე (86. მესხი), თარხნიშვილი - . ისიანი (89. მანაგაძე), რაჟამაშვილი (59. სიხარულია), . კირკიტაძე - უგულავა
სათადარიგოები: . ისიანი, უგრეხელიძე, ქიქავა, ხეცურიანი
მწვრთნელი: თეიმურაზ შალამბერიძე
გაფრთხილება: წიქარიძე (56), თარხნიშვილი (69), სიხარულია (70)
არბიტრი: . ხორავა

საქართველოს თასისა და სუპერთასის მოქმედი მფლობელის ქუთაისის "ტორპედოსა" ბოლნისის "სიონის" დაპირისპირება საინტერესო, სანახაობრივი და უხვგოლიანი გამოდგა. სასტარტო შეხვედრებს ხშირად ახლავს დაძაბულობა, გუნდები ბოლომდე არ იხსნებიან და "მძიმე" მატჩები გამოდის ხოლმე, მაგრამ ქუთაისური მატჩის შემთხვევაში ყველაფერი პირიქით მოხდა...

კარგი სანახაობა კოკისპირულ წვიმაში

კოკისპირული წვიმისა და რთული მეტეოროლოგიური პირობების მიუხედავად, გუნდებმა ლაღი, შემტევი ფეხბურთი ითამაშეს და  გულშემატკივრებმა 5 გატანილი გოლიც იხილეს.

ტორპედოელები გულშემატკივრების წინაშე საქართველოს თასითა და სუპერთასით წარსდგნენ. მატჩის დაწყებამდე გუნდებმა წუთიერი დუმილით პატივი მიაგეს ახლახან გარდაცვლილი ვეტერანი ფეხბურთელის, მამუკა ფანცულაიას ხსოვნას.

როცა დანაკლისიც არ გაშინებს...

ქუთაისელები მატჩს საკმაოდ დიდი დანაკლისით შეხვდნენ. ჯანმრთელობის პრობლემების გამო "ტორპედოს" ვერ ეხმარებოდა მეკარე როინ კვასხვაძე. მცირე ტრავმის გამო მატჩი გამოტოვა საყრდენმა ნახევარმცველმა მერაბ გიგაურმა. ამას, ისიც დაემატა ისიც, რომ მატჩისწინა მოთელვაზე ტრავმა მიიღო ამბროსი ჩაჩუამ და თამაში ვეღარ შეძლო. მის ნაცვლად, კახა ჩხეტიანმა ცენტრალურ ზონაში ამპლუით მცველი ანრი ჭიჭინაძე დააყენა, რომელიც ამ პოზიციაზე თურქული შეკრებისას გამოსცადა...

დანაკლისის მიუხედავად, "ტორპედოს" შემადგენლობა მაინც შთამბეჭდავად გამოიყურებოდა. ქუთაისელები თავიდანვე დაეუფლნენ სათამაშო უპირატესობას და ბუდუ ზივზივაძეს (ერთადერთი გამოკვეთილი ფორვარდი) დებიუტშივე შეეძლო მასპინძლების დაწინაურება, მაგრამ მისი დარტმის შემდეგ ბურთი ბოლნისელთა მეკარე თორნიკე ზარქუამ მოიგერია.

ჩხეტიანის გუნდი ბურთს, ფაქტობრივად, არ თმობდა და შეტევები, დროის გასვლასთან ერთად, სულ უფრო მწვავე ხდებოდა. შედეგმაც არ დაახანა - ჭიჭინაძის კარგი გადაცემის შემდეგ თენგიზ წიქარიძემ დაბალი, ზუსტი დარტყმით "ტორპედო" დააწინაურა.

კერკეტი კაკალი

ბოლნისური გუნდი "კერკეტი კაკალი" აღმოჩნდა. გაშვებული გოლის შემდეგ "სიონი" გაცილებით აქტიურად და თამამად ათამაშდა. ბოლნისელთა გააქტიურებას ქუთაისელთა შეცდომები მოჰყვა: 22-ე წუთზე, მას შემდეგ რაც მასპინძლებმა მოედნის ცენტრში დაკარგეს ბურთი, "სიონმა" კარგი შეტევა განახორციელა, ანზორ სუხიაშვილისა და დავით კირკიტაძის კარგი თამაშის შემდეგ, დავით რაჟამაშვილმა ბურთი ქუსლით შეაგორა კარშისკენ, რომელსაც ზედ ხაზთან, ყოველი შემთხვევისთვის, ვილი ისიანი შესწვდა და ანგარიში გაათანაბრა - 1:1

ბუნებრივია, "ტორპედო" მოვლენების ასეთ განვითარებას არ შეეგუა, მთელი ძალები შეტევებისკენ მიმართა და ლამაზი კომბინაციური თამაშით მეტოქე კვლავ საკუთარ კართან მიაჯაჭვა.

რამდენიმე გაცუდებული მომენტის შემდეგ, ქუთაისელებმა მიზანს მაინც მიაღწიეს - ლევან გეგეჭკორის ჩაწოდების შემდეგ ზივზივაძემ ერთი შეხებით ულამაზესი გადაცემა გაუკეთა ნოდარ ქავთარაძეს, რომელმაც ზარქუას ახლო მანძილიდან შანსი არ დაუტოვა და "ტორპედოს" მაისურით ოფიციალურ შეხვედრაში სადებიუტო გოლი გაიტანა.

ქუთაისელებს პირველივე მართებდათ ტაიმში ანგარიშის გაზრდაც, საგოლე შანსები ჰქონდათ, წიქარიძეს, ზივზივაძეს და ქავთარაძეს, მაგრამ დამაგვირგვინებელი დარტყმები არ გამოუვიდათ.

შესვენების შემდეგ სცენარი არ შეცვლილა. გიორგი ქიმაძის ნაცვლად შეცვლაზე შესული გრიგოლ დოლიძე მოედანზე გამოჩენისთანავე შეუდგა საქმეს და ქუთაისელთა შეტევებს უფრო მეტი სიმწვავე შესძინა. მისი იდეალური გადაცემის შემდეგ წიქარიძემ სულ მცირედით ააცილა კარს. შემდეგ კი ზარქუამ გასაოცარი "სეივით" მოიგერია ზივზივაძის თავური დარტყმა.

"სიონის" მთავარმა მწვრთნელმა მდგომარეობის გამოსასწორებლად შეცვლას მიმართა - დავით რაჟამაშვილის ნაცვლად ზვიად სიხარულია ჩაერთო თამაშში, "სიონი" გააქტიურდა, ბოლნისელებს ერთი კარგი მომენტი კი გაუცუდდათ, მაგრამ მალევე იხეირეს. სიხარულიას კარგი თამაშის წყალობითა და კირკიტაძის გადაცემით 62-ე წუთზე ჯაბა უგულავამ კიდევ ერთხელ გაათანაბრა ანგარიში.

წვიმას, ელვაც დაემატა

მალევე კახა ჩხეტიანმა შეცვლას მიმართა და ზივზივაძის ნაცვლად ცენტრფორვარდის პოზიციაზე თორნიკე კაპანაძე გაამწესა. გადამწყვეტი სწორედ ეს ცვლილება აღმოჩნდა. სწორედ "ელვას" გოლმა მოუტანა გამარჯვება "ტორპედოს".

გადამწყვეტ გოლამდე  ქუთაისელებმა არაერთი მომენტი შექმნეს და სტუმართა კარის ხარიხაც შეაზანზარეს, მაგრამ ზარქუას კარს ბურთი არა და არ "ეკარებოდა". მასპინძლების შეტევებმა შედეგი კიდევ ერთხელ გამოიღეს, დოლიძის კუთხურის შემდეგ კაპანაძემ ბურთი მკერდით გაისწორა და უძლიერესი დარტყმით ეფექტური გოლი გაიტანა.

 აქტიურად ჩაერთო თამაშში შეცვლაზე შესული რიჩარდ ლუკა, რომელმაც პუბლიკაც აიყოლია. ქუთაისელებს ანგარიშის გაზრდაც შეეძლოთ, კვლავ შექმნეს მომენტები, მაგრამ ხან ზარქუა ყოჩაღობდა და ხან თავად ქუთაისელები ვერ ურტყამდნენ კარში ზუსტად.

საბოლოოდ, ანგარიში აღარ შეცვლილა. "ტორპედომ" ჩემპიონატი მოგებით დაიწყო და გულშემატკივრებს იმედიც ჩაუსახა, რომ ჩხეტიანის გუნდი კიდევ უფრო მოუმატებს. "სიონმა" კი საკმაოდ ბრძოლისუნარიანი გუნდის შთაბეჭდილება დატოვა, რომელთანაც იოლი გასეირნება არავის ელოდება.

ყოველდღიური სპორტული გაზეთი "ლელო"
785
მკითხველის კომენტარები / 0 /
მსგავსი ამბები
რუბრიკის სხვა სიახლეები
;