ეროვნული ლიგის მიმოხილვა და სიმბოლური. 5 მატჩში 22 გოლი!

საიუბილეო XXX ჩემპიონატის სასტარტო ტურმა ნათლად დაგვანახვა, რომ ისევე, როგორც წინა სეზონში, ეროვნულ ლიგაში მოასპარეზე გუნდების საერთო დონე გათანაბრებულია და ლამის არის, "სენსაციის" ცნებამ აზრი და აქტუალობა დაკარგოს...

ამას გარდა, პირველი ტური სასტარტო მატჩებისთვის არადამახასიათებელი მაღალი შედეგიანობითაც გამოირჩა - 5 მატჩში 22 გოლი გავიდა! ანუ, საშუალოდ 4,4 გოლი თითოეულ თამაშში...

ეფექტიანობის მაღალი ხარისხი

I ტურის გახსნის მატჩი, ბევრის აზრით, მოულოდნელი შედეგით დასრულდა, თუმცა შესავალშიც მიგანიშნეთ სენსაციების არააქტუალობაზე და აქაც გავიმეორებთ - "დილას" გამარჯვება სენსაციური ნამდვილად არ ყოფილა!

ამ შემთხვევაში კი, უპირველეს ყოვლისა, ორ ფაქტორს ვგულისხმობთ: გორელთა გუნდის მთავარი მწვრთნელის, გიორგი დარასელიას სწორად არჩეულ ტაქტიკა-სტრატეგიას და ამავდროულად, მასპინძელთა მართლაც სერიოზულ საკადრო პრობლემებს. რა თქმა უნდა, "ტორპედოს" ნამდვილად არა აქვს მოკლე სათადარიგოთა სკამი, მაგრამ იმავე დაცვის ხაზში ორი საკვანძო ფეხბურთელის სრულფასოვნად ჩანაცვლება ნამდვილად ვერ მოხერხდა.

არადა, "დილა" წინა სეზონთან შედარებით საგრძნობლად გადახალისებული შემადგენლობით გამოვიდა ჩემპიონის წინააღმდეგ მატჩში, მაგრამ გორელთა გუნდმა ეფექტიანობის მაღალი ხარისხიც უჩვენა: მასპინძელთა კარში ოთხჯერ დაარტყეს და აქედან, სამი ზუსტი იყო! განსაკუთრებით ეფექტური, რაღა თქმა უნდა, ამ მატჩის ბოლო და გადამწყვეტი გოლი იყო, "დილას" 23 წლის ჰოლანდიელმა ლეგიონერმა ალვინ ფორტესმა რომ გაიტანა მართლაც ეფექტური დარტყმით.

აი, ასე: ფორტესის სადებიუტო მატჩი საქართველოს ჩემპიონატში და პირველი გოლიც! აღარაფერს ვამბობთ, გიორგი ფანცულაიაზე, - "დილას" 24 წლის ცენტრფორვარდმა ხომ "დუბლი" შეასრულა და მნიშვნელოვნად განაპირობა თავისი გუნდის გამარჯვება. სხვათა შორის, ფანცულაიას არც ერთი გოლი არ აღუნიშნავს: უმაღლეს ლიგაში დებიუტი ხომ სწორედ "ტორპედოში" ჰქონდა...

...სასტარტო ტურში წაგების მიუხედავად, მიმდინარე სეზონის ერთ-ერთ უმთავრეს ფავორიტად მაინც მოქმედი ჩემპიონი მიგვაჩნია; მით უფრო, რომ "ტორპედოს" მთავარი მწვრთნელი კახა ჩხეტიანი ნელ-ნელა "აშინაურებს" შემადგენლობაში ახალწვეულებს.

აი, ახლაც, საქართველოს ჩემპიონატში სადებიუტო მატჩი ჩაატარეს 25 წლის შემტევმა ევგენი ბოხაშვილმა და, რაც მთავარია, მეგრელაძეების საფეხბურთო დინასტიის გამგრძელებელმა, 18 წლის ფორვარდმა მერაბ მეგრელაძემ; თუმცა, "ტორპედოში" გამოცდილი ფეხბურთელებიც მრავლად არიან და ამათგან, რაღა თქმა უნდა, გუნდის ერთ-ერთი ლიდერი, გრიგოლ დოლიძე უნდა ვახსენოთ: 35 წლის მარჯვენა გარემარბმა ახალი სეზონი "დუბლით" დაიწყო!

ესეც პირველი ჰეთ-თრიკი!

...პირველსავე ტურში დაფიქსირდა დიდი ანგარიშით მოგება და ასევე პირველსავე ტურში დაფიქსირდა ჰეთ-თრიკი: "ჩიხურამ" არ დაინდო გადახალისებული და ლეგიონერებით დახუნძლული "კოლხეთი", ხოლო საჩხერელთა გუნდის 28 წლის შემტევმა გიორგი გაბედავამ 3 გოლი გაუტანა აშკარად შეუთამაშებელ ფოთელთა გუნდს.

გაბედავასათვის ნამდვილად არ არის უცხო ერთ მატჩში 3 გოლის გატანა. ეგ კი არა, ისიც კარგად გვახსოვს, თითქმის 9 წლის წინ "გაგრას" მაისურით "პოკერიც" რომ შეასრულა...

..."ჩიხურას" შემადგენლობაში ამ სეზონის დაწყების წინ გარკვეული ცვლილებები მოხდა და ამ გუნდის გამოცდილი თავკაცი სოსო ფრუიძე, ალბათ, კმაყოფილი დარჩებოდა ახალწვეულების შედეგიანი თამაშით:

შეცვლაზე შემოსულმა 21 წლის დემურ ჩიხლაძემ ეფექტური გოლით წერტილი დაუსვა "კოლხეთის" განადგურებას, 20 წლის შემტევმა ნახევარმცველმა ირაკლი ბუღრიძემ კი საჩხერელთა გუნდის მაისურით ზედიზედ მეორე ოფიციალურ მატჩში გაიტანა გოლი.

ამათ გარდა, "ჩიხურას" შემადგენლობაში კიდევ ორი ახალწვეული გამოჩნდა და ორივე მათგანმა სადებიუტო მატჩი ჩაატარა ეროვნულ ლიგაში: 24 წლის პედრო გუგამ (ბრაზილია) და საქართველოს ჩემპიონატების ისტორიაში აბსოლუტური რეკორდსმენის (ჩატარებული მატჩების რაოდენობით და გოლებით), ზურაბ იონანიძის ვაჟმა, 19 წლის შემტევმა დავით იონანიძემ.

აი, "კოლხეთში" კი, ლაშა გოგონაიასა და ლევან კაკულიას გარდა, ძირითად შემადგენლობაში ყველა ახალწვეული იყო (თანაც, მათგან უმრავლესობა - ლეგიონერები) და ვერც ერთმა მათგანმა თავი ვერაფრით ვერ გამოიჩინა:

30 წლის ალექსეი სოლოსინმა, 28 წლის სერგეი დანილოვმა, 30 წლის ვლადიმირ პონომარიოვმა, 30 წლის ვლადიმირ გოგბერაშვილმა (ყველა - რუსეთი) და 27 წლის ილია მიხაილოვმა (უკრაინა); ისე როგორც წარუმატებელი აღმოჩნდა საქართველოს ჩემპიონატში სადებიუტო მატჩი "კოლხეთის" ახალი მწვრთნელის, რუსი სპეციალისტის, კონსტანტინ გალკინისათვის...

საინტერესო სამტრედია

ერთი მატჩით (მით უფრო - სასტარტო) ძალიან ძნელია გარკვეული დასკვნების გამოტანა, მაგრამ ისიც ფაქტია, რომ "სამტრედიას" ამ საიუბილეო ჩემპიონატში ერთობ საინტერესო გუნდი ეყოლება! და არამხოლოდ საინტერესო:

ამ გუნდის მთავარი მწვრთნელი უჩა სოსიაშვილიც ამბიციური (კარგი გაგებით) სპეციალისტი გახლავთ და საერთოდ, "სამტრედიასაც" სერიოზული ამბიციები უნდა ჰქონდეს ახალ სეზონში.

ამის დასტურად I ტურის მატჩიც გამოდგება, როცა წინა სეზონთან შედარებით საგრძნობლად გადახალისებულმა "სამტრედიამ" სტუმრად შეძლო "ლოკომოტივის" დამარცხება.

იმერულმა გუნდმა შეინარჩუნა სამივე "ხარისხიანი" ლეგიონერი (ანრი ნდონგი, ინტერს გიი, მაიკლ ოლაიტანი) და ამათგან ერთ-ერთმა, 25 წლის ნიგერიელმა შემტევმა მაიკლ ოლაიტანმა სულაც გამარჯვების მომტანი გოლი გაიტანა.

ლეგიონერთა ეს "ტრიო" შარშან ზაფხულს ჩაირიცხა "სამტრედიაში", აი, 29 წლის ცენტრალურ მცველს ივან ფატიჩს (ჩერნოგორია) და 27 წლის ნახევარმცველს ვინსენტ ვეილს (ჰოლანდია) დებიუტი ჰქონდათ საქართველოს ჩემპიონატში.

თუმცა, "სამტრედიას" ბევრად უფრო ცნობადი ახალწვეულებიც ჰყავს: საქართველოს ნაკრების წევრები, 31 წლის უჩა ლობჟანიძე ჩვენს ჩემპიონატს წელიწადნახევრიანი პაუზის მერე დაუბრუნდა, 28 წლის ბუბა დაუშვილი კი - თითქმის 7-წლიანი პაუზის შემდეგ!

ასევე გარკვეული პაუზის მერე დაბრუნდა საქართველოს ჩემპიონატში უჩა სოსიაშვილის ერთ-ერთი ყველაზე საყვარელი შეგირდი გიორგი ერისთავი: 26 წლის ამ სწრაფმა და ტექნიკურმა გარემარბმა "ლოკომოტივის" კარში "სტანდარტულიდან" ისეთი ეფექტური გოლი გაიტანა, თქვენი მოწონებული!

აქვე "ლოკომოტივის" ახალწვეულიც უნდა ვახსენოთ: 27 წლის თეიმურაზ შონია ბოლო წლებში ჩვენი ჩემპიონატის ერთ-ერთი ყველაზე შედეგიანი ნახევარმცველია და თავის ახალ გუნდში პირველივე ოფიციალურ მატჩში მორიგი გოლიც გაიტანა.

რევიშვილის ბენეფისი

...შარშან, 13 სექტემბერს რუსთავში ჩატარებულ საქართველოს თასის მეოთხედფინალურ მატჩს ერთი გმირი ჰყავდა: თბილისის "დინამოს" გამოცდილმა მეკარემ ნუკრი რევიშვილმა ჯერ ძირითად დროში ითამაშა უშეცდომოდ, მერე კი, პენალტების სერიაში სულაც სამი თერთმეტმეტრიანი დარტყმა მოიგერია და თავის იმჟამინდელ გუნდს ნახევარფინალის საგზური მოუტანა!

დამოუკიდებელი ქართული ფეხბურთის ერთ-ერთი გამორჩეული მეკარე საიუბილეო ჩემპიონატის პირველ ტურშიც მოექცა ყურადღების ცენტრში და ამჯერადაც, "რუსთავისა" და "დინამოს" დაპირისპირების დროს; ოღონდ, ნუკრი რევიშვილმა (სულ ახლახან რომ შეუსრულდა 31 წელი) ამჯერად უკვე რუსთაველი გულშემატკივრები გაახარა თავისი მართლაც შთამბეჭდავი (და, რაც მთავარია, უშეცდომო) თამაშით:

თბილისის "დინამომ" თავისი, ფაქტობრივად, ტაიმნახევრიანი (განსაკუთრებით კი - შესვენებამდე) რომ გოლ(ებ)ში ვერ ასახა, სწორედ "რუსთავის" ჩინებული მეკარის უდიდესი დამსახურებაც იყო!

აი, მატჩის ბოლო ნახევარი საათის განმავლობაში კი მოედანზე არსებული სიტუაცია რომ შეიცვალა, ეს უკვე ვლადიმირ გაზაევის დამსახურებაა: "რუსთავის" ახალმა მწვრთნელმა სწორი შეცვლებითა და განსაკუთრებით, ეფექტიანი გადაადგილებებით, თამაშის "სურათი" შეცვალა!

ბექა მიქელთაძის თავდასხმაში "აწევით" და მათე კვირკვიას (ამ მატჩის ერთ-ერთი გამორჩეული მოთამაშის) მარცხენა ფლაგზე გადმოყვანით, "რუსთავის" თამაში აშკარად გამოცოცხლდა, არადა, მთელი პირველი ტაიმის განმავლობაში გუნდს ასევე აშკარად ეტყობოდა შეუთამაშებლობა, რითაც მასპინძლებმა ვერ ისარგებლეს...

ეროვნული ლიგის დებიუტანტის "რუსთავის" ძირითადში ყველა ... ახალწვეული იყო, 18-კაციან განაცხადში კი მხოლოდ ერთადერთი დათა სიჭინავა (წინა სეზონის ეროვნული ლიგა 2-ის საუკეთესო ფეხბურთელი და ბომბარდირი) იყო გუნდის შარშანდელი შემადგენლობიდან;

ამ ახალწვეულთაგან, ორი ძირითადში იყო: ცენტრალურ მცველს ალბერტ ცხოვრებოვს ადრეც უთამაშია საქართველოს ჩემპიონატში ("შუქურაში"), 29 წლის გიორგი გაბულოვმა კი სადებიუტო მატჩში სულაც გოლი გაიტანა და საერთოდაც, ეტყობოდა, რომ რუსული პრემიერლიგის გუნდებში "შემთხვევით" არ თამაშობდა.

საკმაოდ გამოცდილია 29 წლის ტარას ცარიკაევიც და ბარემ ისიც ვთქვათ, რომ სხვადასხვა მიზეზის გამო, "რუსთავს" კიდევ 4-5 "ცნობადი სახე" აკლდა. თუმცა, ისიც სათქმელია, რომ, ასეთი სოლიდური შემადგენლობის მიუხედავად, ვლადიმირ გაზაევის გუნდში, სულ მცირე, 2-3 ისეთი პოზიციაა, აშკარად რომ საჭიროებს გაძლიერებას.

აი, "დინამოში" კი ბევრად უფრო მეტი "პრობლემური" პოზიციაც არის და, ჩვენი აზრით, "დინამოს" მთავარ მწვრთნელს კახა კაჭარავას, თავისი კოლეგისაგან განსხვავებით, ნამდვილად არა აქვს იმის ფუფუნება, ძირითად შემადგენლობაში როტაცია მოახდინოს.

სამაგიეროდ, მისასალმებელია, "დინამოს" უცვლელი კურსი რომ გრძელდება - ნიჭიერი ახალგაზრდა ფეხბურთელების დაწინაურებას ვგულისხმობთ: ახლაც, ეროვნულ ლიგაში სადებიუტო მატჩი ჩაატარეს 18 წლის მეკარემ დემეტრე ბულისკერიამ და ასევე 18 წლის ლევან ხარაბაძემ. თუმცა, ისიც სათქმელია, რომ "დინამო" გაძლიერებას აშკარად საჭიროებს...

დაბოლოს, კიდევ ერთ დაბრუნებულზეც: 2016 წლის საქართველოს ჩემპიონატის გარდამავალი ჩემპიონატის საუკეთესო ფეხბურთელმა და ბომბარდირმა, 21 წლის ბუდუ ზივზივაძემ პენალტის ნიშნულიდან მაინც შეძლო ნუკრი რევიშვილის კარში გოლის გატანა, მაგრამ ეს თუნდაც ერთი ქულისთვის არ აღმოჩნდა საკმარისი...

საბურთალო და შემოტრიალება

...წინა სეზონში ყველაზე მეტი მატჩი "საბურთალომ" "შემოატრიალა": გიორგი ჭიაბრიშვილის გუნდმა ისეთი სამი შეხვედრა მოიგო, პირველი ტაიმის მერე რომ მარცხდებოდა;

და აი, საიუბილეო ჩემპიონატის პირველსავე ტურში, ამ სეზონის კიდევ ერთმა ფავორიტმა კვლავაც გამოავლინა ბრძოლისუნარიანობა: უძლიერესთა შორის ერთწლიანი პაუზის შემდეგ აღზევებულ "სიონთან" წაგებული პირველი ტაიმის შემდეგ, "საბურთალომ" შესვენების მერე 3 უპასუხო გოლი გაიტანა და სეზონი გამარჯვებით დაიწყო!

ანგარიში კი ამ მატჩში "სიონის" 25 წლის ნახევარმცველმა ზვიად სიხარულიამ გახსნა, რასაც მეორე ტაიმში მასპინძელთა 24 წლის მცველმა თედორე გრიგალაშვილმა ზუსტი თავური დარტყმით უპასუხა.

ამის მერე კი, დავით ვოლკოვის ბენეფისიც დაიწყო: შეცვლაზე შემოსულმა 22 წლის შემტევმა "დუბლი" შეასრულა და კიდევ ერთხელ დაამტკიცა, რომ მის შესაძლებლობებს სხვა გუნდ(ებ)ში ჯეროვნად არ აფასებდნენ...

ეს იყო ამ ტურის ბოლო მატჩი და სწორედ ამ შეხვედრაში ვიხილეთ კიდეც XXX ჩემპიონატის პირველი წითელი ბარათიც: თორნიკე ზარქუას მიერ წესების დარღვევა იმდენად აშკარა იყო, რომ "სიონის" 27 წლის მეკარეს არც კი უცდია არბიტრის, ირაკლი კვირიკაშვილის, ამ გადაწყვეტილების გაპროტესტება...

ყოველდღიური სპორტული გაზეთი "ლელო"
1849
მკითხველის კომენტარები / 0 /
მსგავსი ამბები
რუბრიკის სხვა სიახლეები
;