ეროვნული ლიგა. 'ტორპედო' 0:0 'საბურთალო': ორი კორიდორი ქარიშხალში

30.12. ქუთაისი. რამაზ შენგელია
ტორპედო (4-1-4-1): კვასხვაძე - გეგეჭკორი, მ. კობახიძე, აზაცკი, მარინი - გიგაური - დაფე (66. კუტალია), კუხიანიძე, წიქარიძე (80. ჰლინკა), ქიმაძე (76. ჰასელბენკი) - ლაჩნი
სათადარიგოები: ქვილითაია, ბურჯანაძე, ჭიჭინაძე, ფურცხვანიძე

საბურთალო (4-2-1-3): კუპატაძე - ნადარაია, რეხვიაშვილი, მარგველაშვილი, ჩაბრაძე - ტერა, ცნობილაძე - დიასამიძე (60. გვარაძე) - კოხრეიძე, დვალიშვილი (73. ალთუნაშვილი), ვოლკოვი (67. გოშთელიანი)
სათადარიგოები: ქურდაძე, შინდაგორიძე, ლაკვეხელიანი, გორგიაშვილი
გაფრთხილება: კუხიანიძე (61), რეხვიაშვილი (90), მარგველაშვილი (90+1)

არბიტრი: პაპუნა მაჭარაძე

"საბურთალო" ქუთაისს ჩემპიონის რანგში ესტუმრა. თბილისელებმა ტიტული ეროვნული ლიგის დასრულებამდე სამი ტურით ადრე გაინაღდეს. თავის მხრივ, "ტორპედო" რამდენიმე დღის წინ დავით ყიფიანის სახელობის თასს დაეუფლა.

შეხვედრის დაწყებამდე გუნდებმა ერთმანეთს ლამაზი ჟესტით მიულოცეს ცოტა ხნის მოპოვებული ტიტულები. "ტორპედომ" "საბურთალოს" საჩემპიონო კორიდორი მოუწყო. თავის მხრივ, საჩემპიონო კორიდორი სტუმრებმაც მოაწყვეს და "ტორპედოს" თასის მოგება მიულოცეს...

სტიქია ქუთაისში

ჩემპიონებისა და თასის მფლობელების ასეთ დახვედრას, ბუნებრივია, სავსე ტრიბუნები მოუხდებოდა, მაგრამ მატჩის დღეს ქუთაისში ისეთი ქარიშხალი მძვინვარებდა, სტადიონზე წასვლას ვინ დაეძებს, სახლიდან გარეთ გასვლაც კი გმირობის ტოლფასი იყო.

ფესვებიანად მოგლეჯილი ხეები, გადახდილი სახურავები, ჩამოვარდნილი ელექტროხაზები... რა გასაკვირია, რომ ასეთ ვითარებაში ბევრმა სტადიონზე მისვლა ვერ მოახერხა.

თუმცა, კვლავ მოწოდების სიმაღლეზე იყო "ტორპედოს" ფანკლუბი, რომლის წევრებიც მთელი მატჩის განმავლობაში მხურვალედ ქომაგობდნენ საყვარელ გუნდს, ტორპედოელებს კიდევ ერთხელ მიულოცეს თასის მოპოვება და ფეხბურთელებთან ერთად პრესტიჟული ჯილდო ტრიბუნებზეც აღმართეს. ერთგული გულშემატკივრები "საბურთალოსაც" ახლდნენ. ისინი სტიქიას არ შეუშინდნენ და ამ, ერთი შეხედვით, არცთუ ისე მნიშვნელოვან დაპირისპირებაში ჩემპიონს ბოლომდე გვერდში ედგნენ.

ქარმა მატჩზეც იმოქმედა

გუნდები შესუსტებული შემადგენლობებით შეხვდნენ ერთმანეთს. "ტორპედოს" რიგებში არ იყვნენ თორნიკე კაპანაძე, მათე ცინცაძე, დავით ხურცილავა და გრიგოლ დოლიძე. "საბურთალოს" კი ვაგნერ გონსალვეში და დიმიტრი ტატანაშვილი აკლდნენ, ხოლო სათადარიგოთა სკამზე დარჩნენ ლუკა ლაკვეხელიანი და თორნიკე გორგიაშვილი.

რა თქმა უნდა, ქარიშხალმა თამაშსაც დაასვა დაღი. ფეხბურთელებს ბურთის დამორჩილება და სწრაფად თამაში უჭირდათ. "საბურთალოსთვის" ამ შეხვედრას სატურნირო თვალსაზრისით აღარავითარი მნიშვნელობა აღარ ჰქონდა, "ტორპედო" კი მე-2 ადგილისთვის იბრძვის და მოგება სჭირდებოდა.

შეხვედრა მათი მწვავე შეტევებით დაიწყო. დებიუტშივე გიორგი ქიმაძეს ჰქონდა გატანის შანსი, მაგრამ ლაზარე კუპატაძესთან ერთი-ერთზე გასულს მეკარემ აჯობა. საპასუხოდ, დვალიშვილი ცდილობდა კარში დარტყმას, მაგრამ მცველებმა დაუფარეს და ბურთი კარს ასცდა. მომდევნო წუთებში "საბურთალო" გაცილებით აქტიური იყო, მაგრამ სახიფათო მომენტამდე საქმე არ მისულა.

ტაიმის ბოლოს ისევ ქუთაისელები გააქტიურდნენ და ცოტა რომ გამართლებოდათ, ანგარიშსაც გახსნიდნენ - მილოშ ლაჩნი ერთი შეტევის ფარგლებში ორჯერ ურტყამდა კარში, მაგრამ კუპატაძემ ორივე დარტყმა მოიგერია, გადმოვარდნილ ბურთს კი ქიმაძე ამატებდა, მაგრამ მცველებმა კარის ხაზიდან გამოიტანეს.

დებიუტანტი

მეორე ტაიმის დასაწყისში ქუთაისელებმა კიდევ ერთხელ სცადეს შეტევების გამწვავება. ისინი ბევრ დროს ატარებდნენ მეტოქის საჯარიმოსთან, მაგრამ კარში დარტყმებამდე საქმე არ მიდიოდა.

76-ე წუთზე ქიმაძის ნაცვლად თამაშში გლეოფილო ჰასელბენკი ჩაერთო. სურინამელი ლეგიონერისთვის მატჩი სადებიუტო იყო. ჰასელბენკმა თამაში გაამწვავა. 83-ე წუთზე მან სახიფათო საჯარიმო შეასრულა, თუმცა ზუსტად ვერ დაარტყა. ბოლოს ქუთაისელებს მაინც შეეძლოთ მოგება - ლევან კუტალიას ჩაწოდებულზე ლაჩნიმ ხელსაყრელი პოზიციიდან თავით ხეირიანად ვერ დაარტყა და "ტორპედომ" გოლის გატანის ბოლო შანსიც გაუშვა ხელიდან.

თ მ ფ წ ბ ქ
1. საბურთალო 34 23 6 5 60:28 75
2. დინამო (თბ) 34 20 6 8 70:36 66
3. ტორპედო 34 18 9 7 59:25 63
4. ჩიხურა 34 18 6 10 52:32 60
5. დილა 34 15 12 7 54:39 57
6. ლოკომოტივი 34 11 8 15 42:51 41
7. რუსთავი 34 7 13 14 30:43 34
8. სიონი 34 8 7 19 38:60 31
9. სამტრედია 34 4 9 21 27:74 21
10. კოლხეთი* 34 4 8 22 26:70 14
შენიშვნა: * - კოლხეთს დაკლებული აქვს 6 ქულა

ბომბარდირები
ბ. ზივზივაძე (დინამო) 21
გ. გაბედავა (ჩიხურა) 20
მ. კოვტალიუკი (დილა) 18
თ. კაპანაძე (ტორპედო) 14
ლ. რიბეირო (დილა) 14

XXXV ტური

რუსთავი-სამტრედია 16:00
03.12. თბილისი. მიხეილ მესხი (სათ)
3: +1 =2 -0, 3-2
I-II-III წრე: 0:0, 2:1, 1:1
კოლხეთი-დინამო (თბ) 13:00

04.12. ფოთი. პარკი არენა
62: +7 =12 -43, 47-148
I-II-III წრე: 1:4, 3:6, 1:2

სიონი-ტორპედო 15:00
04.12. თბილისი. მიხეილ მესხი (სათ)
45 : +9 =6 -30, 43-92
I-II-III წრე: 0:3, 1:2, 0:3

დილა-ლოკომოტივი 17:00
04.12. გორი. თენგიზ ბურჯანაძე
32: +7 =8 -17, 28-49
I-II-III წრე: 3:1, 3:2, 1:2

დისკვალიფიკაცია: ანზორ სუხიაშვილი, ამოს ნონდი (ორივე - დილა)

საბურთალო-ჩიხურა 19:00
04.11. თბილისი. მიხელ მესხი
8: +3 =1 -5, 7-13
I-II-III წრე: 2:1, 1:0, 1:0

დისკვალიფიკაცია: თეიმურაზ მარკოზაშვილი (ჩიხურა)

ყოველდღიური სპორტული გაზეთი "ლელო"
770
მკითხველის კომენტარები / 0 /
მსგავსი ამბები
რუბრიკის სხვა სიახლეები
;