ეროვნული ლიგა. ქართული სტარტი ბალკანური გოლით

საბურთალო-დინამო (ბთ)        1:0
01.03. თბილისი. მიხეილ მესხი
1:0 როლოვიჩი (80)
საბურთალო (4-4-2): მიგინეიშვილი - ჩაბრაძე, მარგველაშვილი, კაკუბავა, თევზაძე (64. მალი) - შინდაგორიძე (73. გი), ცნობილაძე, ალთუნაშვილი დიასამიძე - გოშთელიანი (58. როლოვიჩი), გვარაძე
სათადარიგოები: შელიხოვი, დვალიშვილი, ტერა, გორგიაშვილი
მწვრთნელი: გიორგი ჭიაბრიშვილი
დინამო (4-4-2): ალავიძე - მელიავა, გადრანი, . ფაცაცია, ჩალაძე - ტეიდი (61. ილურიძე), მამუჩაშვილი, მანჯგალაძე - . თევდორაძე (73. ცაცკრიალაშვილი), საბანაძე, რამოსი (85. ჭანტურია)
სათადარიგოები: გოშაძე, . გაფრინდაშვილი, ჯანელიძე, გაგოშიძე
მწვრთნელი: გია გეგუჩაძე
გაფრთხილებები: ცნობილაძე (34), ილურიძე (73), ფაცაცია (89)
არბიტრი: . კვირიკაშვილი

ჩერნოგორიელი ოგნიენ როლოვიჩი ახალი ეროვნული ლიგის პირველი გოლის ავტორი გახდა, გოლისა, რომელმაც მოქმედ ჩემპიონს პირველი 3 ქულა მოუტანა. საინტერესო ფაქტია - 2015 წლის შემდეგ, რაც "საბურთალო" ელიტაში აღზევდა, სეზონის პირველ მატჩს მუდამ იგებდა...

ცვლილებები

ქუთაისის "ტორპედოსთან" სუპერთასზე დამარცხების შემდეგ გუნდის მთავარმა მწვრთნელმა გიორგი ჭიაბრიშვილმა შემადგენლობა საგრძნობლად განაახლა და განაცხადში არ შეიყვანა ლუკა ლაკვეხელიანი, გიორგი კოხრეიძე და ვაგნერ გონსალვესი, რომლებმაც სუპერთასზე ძირითადში ითამაშეს, ხოლო ინტერს გი სათდარიგოებში დასვა. ბათუმელებს კი ტრავმირებული ჯოვინო ფლამარიონი ვერც შეკრებაზე ეხმარებოდა და ვერც გუშინ შეეშველა.

თუმცა, "საბურთალომ" მოახერხა და ოგნიენ როლოვიჩი დაიმატა - 25 წლის ჩერნოგორიელი თავდამსხმელი გუნდს თურქულ შეკრებაზეც ახლდა, თუმცა, მისი ტრანსფერის იურიდიული დეტალები ბოლო მომენტში მოგვარდა და როლოვიჩი განაცხადში შეიყვანეს. როგორც ლიგის პირველ შეხვედრაში გამოჩნდა, ბალკანელის სახით საქართველოს ჩემპიონმა საინტერესო მოთამაშე დაიმატა.

მატჩს ინტრიგას მწვრთნელთა უშუალო დაპირისპირებაც ჰმატებდა: გიორგი ჭიაბრიშვილი გია გეგუჩაძის გაზრდილია - ასწავლა თუ არა ხეზე ასვლა? როგორც გამოჩნდა, ასწავლა. მთავარი ისაა, რომ ორივე გუნდის თამაში კარგი სანახავი გამოდგა...

ბათუმური ტიკი-ტაკა

საწყის წუთებში საბურთალო" უპირატესობას ფლობდა, მაგრამ მერე სტუმრებმა მდგომარეობა გამოასწორეს და მაღალი პრესინგით მასპინძლები შეაჩერეს.

პირველ ნახევარში ბათუმელებმა თბილისელებს ბურთის კონტროლით და გაგორებით აჯობეს (რაც თავად "საბურთალოს" ერთ-ერთ კოზირად ითვლება). ამაში დიდი როლი გია მანჯგალაძემ ითამაშა - სტუმართა საყრდენი ნახევარმცველი ბევრს მუშაობდა, ეფექტურიც იყო, თამაშიც დაალაგა და გუნდი შეტევების ორგანიზებასაც კარგად ახერხებდა. თუ ფორმაში შევა, შეუძლია, გამორჩეული გახდეს ეროვნულ ლიგაში.

პირველი ხიფათი სწორედ მანჯგალაძის ჯარიმას მოჰყვა: კარის წინ გაბრიელ რამოსმა ყველას დააასწრო, მაგრამ მისი თავურის შემდეგ "საბურთალო" მეკარე ომარ მიგინეიშვილის რეაქციამ გადაარჩინა.

საერთოდ, პირველ ტაიმში მიგინეიშვილი მოედანზე მთავარი ფიგურა იყო: მე-17 წუთზე ისევ რამოსმა შეუტია - ამჯერად, ბრაზილიელი შემტევი საჯარიმოს სიახლოვიდან ურტყამდა და ჩემპიონს კვლავ მიგინეიშვილმა უშველა.

24-ე წუთზე მომენტი უკვე მასპინძლებს ჰქონდათ: მიხიელ ალავიძეს ბურთი გაუვარდა და დამატებაზე გატანას სანდრო ალთუნაშვილი შეეცადა, მაგრამ მიზანს ააცილა.

36-ე წუთზე, ვაკო თევდორაძის კუთხურის შემდეგ კარში თავით ნიკა საბანაძემ გაისროლა და ოდნავ აააცილა.

მე-40 წუთზე კუთხური ისევ თევდორაძემ შეასრულა, რამოსმა მცველებს დაასწრო და ახლოდან თავით ამჯერადაც ვერ გაიტანა.

საბურთალომ სახე დაიბრუნა

მეორე ნახევარი "საბურთალომ" უკეთ დაიწყო და მეტოქეს უფრო აგრესიულად შეუტია. ჭიაბრიშვლის გუნდმა მეტოქე მაღალი პრესინგით შეავიწროვა და, როგორც იქნა, საჩემპიონო თამაშიც აჩვენა.

მასპინძლებმა რამდენიმე სახიფათო მომეტი შექმნეს. მე-60 წუთზე ლაშა შინდაგორიძე საჯარიმოში შეიჭრა და კარგად გაამწვავა იერიში, მაგრამ ვითარება გიორგი გადრანმა განმუხტა.

მერე რამოსი შეძვრა საჯარიმოში და მეკარესთან პირისპირ დარჩენილს ანგარიშის გახსნა შეეძლო, მაგრამ... მიზანს აააცილა. ამდენი უიღბლობის მიუხედავად, უნდა ვთქვათ - მის სახით ბათუმელებს საინტერესო მოთამაშე ჰყავთ. საერთოდაც, გეგუჩაძის გუნდმა კარგი შთაბეჭდილება დატოვა...

მაგრამ სეზონის პირველი გოლის გატანა ბრაზილიელმა ვერ მოახერხა, თუმცა ლეგიონერის ანგარიშზე კი ჩაიწერა - როლოვიჩმა ბურთი გეგა დიასამიძეს დაუგდო, რომელიც საჯარიმოში შევარდა და, მართალია, მეკარეს ვერ აჯობა, სამაგიეროდ, დამატებაზე როლოვიჩმა ივარგა - 1:0.

მასვე ბოლო წუთზე დუბლის შესრულებაც შეეძლო, მაგრამ დიასამიძის გადაცემის შემდეგ კარის წინ მარტო დარჩენილმა მიზანს ააცილა.

551
მკითხველის კომენტარები / 0 /
მსგავსი ამბები
რუბრიკის სხვა სიახლეები
;