ეროვნული ლიგა. შთამბეჭდავი ლოკომოტივი

ლოკომოტივი-რუსთავი            4:1
02.03. თბილისი. მიხეილ მესხი (სათ)
0:1 ციცქიშვილი (18. სილაგაძის პასით), 1:1 ჯიქია (34. უბილავას პასით), 2:1 არდაზიშვილი (45), 3:1 სიხარულიძე (84. სამურკასოვის პასით), 4:1 ინჯგია (88. სიხარულიძის პასით)
ლოკომოტივი (3-5-2): ბულისკერია - ძებნიაური, . ჭანტურია, გურეშიძე - . კირკიტაძე (89. . კობახიძე), შონია, გვალია (59. სამურკასოვი), არდაზიშვილი, უბილავა - ჯიქია (77. ინჯგია), სიხარულიძე
სათადარიგოები: კიკაბიძე, კომახიძე, ბუიღლიშვილი, . შეროზია
მწვრთნელი: ლაშა ჭაღიაშვილი
რუსთავი (4-2-3-1): მამარდაშვილი - . კაპანაძე (52. იმნაძე), ხუბუტია, . გადრანი, ჯაფიაშვილი - ფონიავა, ქოჩლაძე (79. ზვიადაძე) - სილაგაძე, ციცქიშვილი, ჩოგაძე (84. კიტეიშვილი) - . ქავთარაძე
სათადარიგოები: კვირკველია, ზვიადაძე, . ქარდავა
მწვრთნელი: ბადრი კვარაცხელია
გაფრთხილება: შონია (36), გვალია (45), ხუბუტია (81), ინჯგია (89)
არბიტრი: . კიკაჩეიშვილი

ახალი სეზონი "ლოკომოტივმა" აბსოლუტურად დამსახურებული გამარჯვებით დაიწყო! ეგ კი არა, ლაშა ჭაღიაშვილის დამოძღვრილმა გუნდმა მართლაც რომ ყველა კომპონენტში დაჩაგრა მეტოქე და დიდი იყო იმის ალბათობაც, რომ ანგარიშში სხვაობა ბევრად უფრო შთამბეჭდავი ყოფილიყო...

აბსოლუტურად ლოგიკური...

...ყველაფერს თავი რომ დავანებოთ,  საქართველოს ჩემპიონატში ერთწლიანი პაუზის მერე დაბრუნებულ ირაკლი სიხარულიძეს, სულ მცირე, 4 (ოთხი!) ჩინებული შანსი ჰქონდა მეორე ტაიმში, მაგრამ ეროვნული ლიგის 2017 წლის გათამაშების საუკეთესო ბომბარდირს ფატალურად არ უმართლებდა...

თუმცა ეს გამოცდილი ფორვარდი ამ მატჩში გოლს ნამდვილად იმსახურებდა და ასეც მოხდა - სიხარულიძემ მეხუთე ცდაზე შეძლო ბურთის კარში ზუსტად გადაგზავნა და თავისი გუნდის უპირატესობა კიდევ უფრო თვალსაჩინო გახადა, თან გოლსაც ხომ გააჩნია - "ლოკომოტივმა" ჩინებული კომბინაცია გაითამაშა, რომელშიც, სიხარულიძის გარდა, თეიმურაზ შონია და დავით სამურკასოვიც აქტიურად მონაწილეოდნენ, ბოლოს კი, ყველაფერი ბომბარდირის უზუსტესი "გასროლით" დასრულდა.

ეს მასპინძელთა მესამე გოლი იყო, თუმცა "ლოკომოტივი" მაინც არ დაკმაყოფილდა მიღწეულით - შეცვლაზე შესულმა 18 წლის რევაზ ინჯგიამ მეტოქის უკანახაზელთა ვინ მოთვლის მერამდენე პოზიციური შეცდომა არანაკლებ ეფექტური დარტყმით დაამთავრა და საბოლოო, აბსოლუტურად ლოგიკური ანგარიშიც დააფიქსირა.

ზემოთქმულიდან გამომდინარე, ადვილი მისახვედრია, თუ რამხელა უპირატესობას ფლობდა მეორე ტაიმში "ლოკომოტივი". აი, "რუსთავის" თამაში კი ვერანაირ კრიტიკას ვერ უძლებდა და სტუმართა გუნდს ვერც ის ფაქტი გაამართლებს, რომ არაოპტიმალური შემადგენლობით ასპარეზობდა, მით უფრო, რომ "ლოკომოტივსაც" აკლდა რამდენიმე წამყვანი ფეხბურთელი...

საკადრო პრობლემები და ტაქტიკური დუელი

"ლოკომოტივს" დიდი ხნით გამოაკლდა მამია გავაშელიშვილი (ამაზე ცალკე წერილში წაიკითხავთ). ვისარგებლებთ შემთხვევით და ნიჭიერ ფორვარდს პრობლემების დროულად გადალახვასა და გამოჯანმრთელებას ვუსურვებთ...

ამას გარდა, მასპინძლებს პრობლემა შეექმნათ დაცვის მარჯვენა ფლანგზეც: გიორგი გაბაძე ტრავმირებული გახლავთ, ახალგაზრდა და, უდავოდ, პერსპექტიული უკანახაზელი, 19 წლის ალექსანდრე ანდრონიკაშვილი კი, სინჯებზე იმყოფება... მადრიდის "ატლეტიკოში".

ჰოდა, ალბათ, ამის გამოც იყო, რომ მასპინძელთა თავკაცმა ლაშა ჭაღიაშვილმა 3 ცენტრალური მცველით ამჯობინა თამაში და მარჯვენა ფრთა მთლიანად ჩააბარა გუნდის ახალწვეულს, 22 წლის თორნიკე კირკიტაძეს.

სხვათა შორის, ეს უკანასკნელი ბოლო 2 სეზონის განმავლობაში "რუსთავში" გამოდიოდა, ახლა კი პირწმინდა დაჩაგრა თავისი მეურვეები (ისევე, როგორც საპირისპირო ფლანგზე მოასპარეზე დავით უბილავამ) და ლომის წილიც შეიტანა თავისი ახალი გუნდის გამარჯვებაში.

კირკიტაძის მსგავსად, დამაჯერებლად ითამაშა "ლოკომოტივის" კიდევ ერთმა ახალწვეულმა, 23 წლის ცენტრალურმა მცველმა სანდრო გურეშიძე. აი, "რუსთავის" ახალწვეულებს (და საერთოდ მთელ გუნდს) აშკარად ეტყობოდათ შეუთამაშებლობა.

ისე, სტუმართა საკადრო პრობლემებიც უნდა ვახსენოთ: ამ მატჩამდე ვერ მოესწრო ახალწვეულთა (ნიკა ყიფიანი, გიორგი ნარიმანიძე, სოსლან ტაკულოვი) განაცხადში შეყვანა.

ტრავმის გამო, მხოლოდ მატჩის მიწურულს გამოჩნდა მოედანზე "რუსთავის" ახალწვეული 20 წლის პაატა კიტეიშვილი. თუმცა ეს ყველაფერი ვერაფრით გაამართლებს "რუსთავის" ყოვლად უშინაარსო თამაშს: იმის მიუხედავად, რომ ამ მატჩში პირველი გოლი გაიტანეს, სტუმრებმა უპირატესობის შენარჩუნებაც ვერ შეძლეს და საერთოდაც, თამაშის ბოლომდე მხოლოდ ორჯერ დაემუქრნენ "ლოკომოტივის" ახალწვეული მეკარის, 19 წლის დემეტრე ბულისკერიას კარს...

ვითომ თანაბარი ტაიმი

ზემოთაც აღვნიშნეთ, თუ როგორ პირწმინდად დაჩაგრა "ლოკომოტივმა" შესვენების შემდეგ ქაოტურად მოასპარეზე მეტოქე. არადა, პირველი 30 წუთის განმავლობაში, მოედანზე მეტ-ნაკლებად თანაბარი თამაში მიმდინარეობდა. თანაც, მასპინძლებმა მკაცრი პრესინგი შესთავაზეს მეტოქეს, თუმცა პირველი გოლი მაინც "რუსთავმა" გაიტანა: 19 წლის ლუკა სილაგაძის ფლანგური პასიც მშვენიერი იყო და 23 წლის ზაზა ციცქიშვილმაც არანაკლებ ეფექტური დარტყმით ბურთი ზუსტად გაგზავნა მეტოქის კარში.

აი, ამის შემდეგ კი, "ლოკომოტივმა" კიდევ უფრო მოუმატა სისწრაფეებს და მანამდეც აქტიურობით გამორჩეულმა დავით ჯიქიამ მშვენივრად ისარგებლა მეტოქის მცველთა პოზიციური შეცდომით.

"რუსთავის" ფეხბურთელების შეცდომები ამით არ ამოწურულა: ტაიმის დასრულებას ცოტაღა აკლდა, როცა რატი არდაზიშვილმა მშვენივრად შეირგო მოწინააღმდეგის საჩუქარი, "რუსთავის" ახალწვეულ  მეკარესთან, 18 წლის გიორგი მამარდაშვილთან პირისპირ გავიდა და თავისიანები ოსტატური დარტყმით დააწინაურა.

სხვათა შორის, რატი არდაზიშვილი ამ მატჩის ერთ-ერთი გამორჩეული პერსონა გახლდათ და მართლაც სასიამოვნოა, რომ 21 წლის ნიჭიერი ფეხბურთელი, უმძიმესი ტრავმის შემდეგ, თანდათან იბრუნებს ოპტიმალურ ფორმას.

871
მკითხველის კომენტარები / 0 /
მსგავსი ამბები
რუბრიკის სხვა სიახლეები
;