ეროვნული ლიგა 2. ორი ფავორიტი, მრისხანე სამგურალი და ახალი ერის დასაწყისი

მეორე წელია, ერონული ლიგის მსგავსად, რანგით მეორე ლიგის გათამაშებაც ახლებური სისტემით ტარდება.

შარშანდელის მსგავსად, ამჯერადაც ათგუნდიანი ჩემპიონატია ოთხ წრედ: პირველ ადგილზე გასული გუნდი, ავტომატურად აღზევდება ეროვნულ ლიგაში, მეორე და მესამე ადგილებზე გასული გუნდები კი პლეი ოფში დაუპირისპირდებიან ეროვნულ ლიგაში VIII და IX ადგილებზე გასულ გუნდებს.

არაფერი შეცვლილა "ქვემოთაც": ბოლო ადგილზე გასული გუნდი მომავალ სეზონში ლიგა 3-ში დაიწყებს, ხოლო მერვე და მეცხრე ადგილებზე გასულ გუნდებს პლეი ოფის მატჩები მოუწევთ ლიგა 3-ში II და III ადგილებზე გასულ გუნდებთან.

ეს ყველაფერი, რაც შეეხებოდა რეგლამენტს, ახლა კი მიმდინარე გათამაშებაზეც ვისაუბროთ, მით უფრო, რომ შარშანდელის მსგავსად, ეროვნული ლიგა 2-ის გათამაშება ამჯერადაც დიდ ინტრიგას გვპირდება. თანაც, ისეთი დასაწყისი ჰქონდა ეროვნული ლიგა 2-ის წლევანდელ გათამაშებას, სენსაციურზე მეტი რომ ჰქვია: აბა, ვინ იფიქრებდა, რომ სეზონის უპირველესი ფავორიტი ბათუმის "დინამო" ორივე სასტარტო მატჩს წააგებდა?!. თუმცა, ეს ჯერ მხოლოდ დასაწყისია...

ორი ფავორიტი

წინა სეზონის დაწყების წინ ვივარაუდეთ, რომ ეროვნულ ლიგაში აღზევების რეალური კანდიდატები "მერანი", "სიონი", "რუსთავი" და "გაგრა" უნდა ყოფილიყვნენ; საბოლოოდ კი ისე მოხდა, რომ "რუსთავმა" ავტომატურად მოიპოვა ეროვნული ლიგის საგზური, "სიონმა" პლეი ოფში იყოჩაღა, "გაგრამ" V ადგილზე დაასრულა სეზონი, აი, უპირველესი ფავორიტი "მერანი" კი, ბევრისთვის მოულოდნელად, პლეი ოფში დამარცხდა ფოთის "კოლხეთთან"...

აი, წლეულს კი ასე ხელაღებით გაგვიჭირდება ეროვნული ლიგა 2-ის გამოკვეთილი ფავორიტების დასახელება; თუმცა, ჩვენი სუბიექტური აზრით, ეროვნულ ლიგაში აღზევების ყველაზე მეტი შანსი ისევ და ისევ "მერანსა" და ბათუმის "დინამოს" უნდა ჰქონდეს, _ ორივე გუნდს ისეთი შემადგენლობა ჰყავს, ეროვნული ლიგის ბევრ გუნდს რომ სჯობნის...

წინა სეზონთან შედარებით, "მერანში" გარკვეული ცვლილებები მოხდა და გუნდიდან რამდენიმე საკვანძო ფეხბურთელიც (რევაზ ბარაბაძე, დავით მაისაშვილი, ლაშა ჩალაძე, რევაზ გეწაძე, რაფაელ ჩუკვურა) წავიდა, გუნდის კაპიტანმა სერგი ორბელაძემ კი კარიერა დაასრულა.

თუმცა მარტვილელთა გუნდში მატებაც სერიოზულია: გარკვეული პაუზის მერე, "მერანში" დაბრუნდნენ 37 წლის დავით ბოლქვაძე და 34 წლის გიორგი ციმაკურიძე, ახალწვეულთაგან კი გამოცდილი მცველი ნიკა მგელაძე და ორი ფორვარდი, ნიკოლოზ ხინთიბიძე და ვაჟა მათიაშვილი უნდა გამოვარჩიოთ.

რაც მთავარია, "მერანის" მთავარმა მწვრთნელმა მიხეილ მახვილაძემ გუნდის ძირითადი ბირთვი შეინარჩუნა: გოგი კულუას, კიჭი მელიავას, ვაჟა ლომაშვილის, გიორგი გეგიასა და ვანო კურდღელაშვილის სტაბილურად ასპარეზობაზე ხომ ბევრი რამ იქნება დამოკიდებული.

ცალკე უნდა აღვნიშნოთ "მერანის" მართლაც "ხარისხიანი" ლეგიონერები: 23 წლის საყრდენი ნახევარმცველი ბენჯამინ ტეიდი (ნიგერია) და 33 წლის შემტევი სერგეი ტრეტიაკი (უკრაინა), ჩვენი აზრით, ეროვნულ ლიგაშიც გამორჩეულნი იქნებოდნენ...

...შარშანდელი ფიასკოს მერე, ბათუმის "დინამოს" შემადგენლობაში გვარიანი ცვლილებები რომ მოხდებოდა, ეს, წესით, არავის უნდა გაჰკვირვებოდა.

ასეც მოხდა: ახალი ფეხბურთელების მსგავსად, გუნდში ახალი სამწვრთნელო შტაბი მოვიდა გია გეგუჩაძის ხელმძღვანელობით; გია გეგუჩაძეს ყველა არსებული ქართული საკლუბო ტიტული (ჩემპიონობა, თასი, სუპერთასი) აქვს მოგებული, მერე საქართველოს ახალგაზრდულ ნაკრებში მუშაობდა და აი, მცირეხნიანი პაუზის შემდეგ, კვლავაც, საკლუბო ფეხბურთში დაბრუნდა.

"დინამოს" ახალმა თავკაცმა უამრავი ისეთი ახალწვეული მიიწვია გუნდში, სხვადასხვა დროს არაერთი სეზონი რომ უთამაშიათ უმაღლეს ლიგაში: მეკარე - მიხეილ ალავიძე, მცველები - გურამ ადამაძე, ზაზა ჭელიძე, ლაშა ჩალაძე, ნახევარმცველები - გიორგი ჯანელიძე, ლევან შარიქაძე, გიორგი ჭანკოტაძე, ბესიკ დეკანოიძე, თავდამსხმელი - ვახტანგ კვარაცხელია.

თუმცა, ბათუმის "დინამოს" და საერთოდ, ეროვნული ლიგა 2-ის ყველაზე "ხმაურიან" ტრანსფერად, რაღა თქმა უნდა, გიორგი ილურიძის კვიპროსული "ეთნიკოსიდან" გადმოყვანა იყო...

აქ ყოფნა გაუგრძელდათ...

ეროვნული ლიგა 2-ის ყველაზე ტიტულოვან კლუბ "ვიტ ჯორჯიას" (საქართველოს ორგზის ჩემპიონს, თასისა და სუპერთასის მფლობელს) ნამდვილად "გაუგრძელდა" რანგით ქვედა ლიგაში ყოფნა! თუმცა, ვინ იცის, იქნებ სწორედ ამ სეზონში მოახერხონ "ვეტერინარებმა" ეროვნულ ლიგაში აღზევება...

"ვიტ ჯორჯია" კვლავაც არ ღალატობს ტრადიციას და გუნდის ძირითად ბირთვს, ამჯერადაც პერსპექტიული ახალგაზრდები შეადგენენ, რომელთაგანაც აუცილებლად უნდა აღვნიშნოთ ნიჭიერი ფორვარდი, 20 წლის პაატა ღუდუშაური.

"ვეტერინართა" ახალგაზრდა თავკაცის, ლაშა ფირცხალაიშვილის გუნდში რამდენიმე ახალწვეულიც არის: საყრდენი ნახევარმცველი გიორგი ვასაძე ხუთწლიანი პაუზის მერე დაუბრუნდა თავის პირველ გუნდს, ცენტრალური მცველი გიორგი გეთიაშვილი კი - სამი წლის შემდეგ დაბრუნდა "ვიტ ჯორჯიაში".

და მთავარიც: ამ კლუბის დაარსებიდან (1998 წელი) დღემდე, "ვიტ ჯორჯიას" პრეზიდენტი კვლავაც გურამ რუხაძე გახლავთ!..

ასევე "გაუგრძელდა" ამ ლიგაში ყოფნა კიდევ ერთ კერძო კლუბს "გაგრას", ასევე წლების განმავლობაში რომ პატრონობს ერთი და იგივე პიროვნება - ბესო ჩიხრაძე.

თუმცა, "ვიტ ჯორჯიასაგან" განსხვავებით, "გაგრაში", ფაქტობრივად, მთლიანად შეიცვალა შარშანდელი შემადგენლობა (ლევან პაპავა დარჩა მხოლოდ) და გუნდის უკრაინელ მწვრთნელს დენის ხომუტოვს (შარშან, სეზონის მსვლელობაში რომ ჩაიბარა გუნდი), ფაქტობრივად, ახალი გუნდის ჩამოყალიბება მოუწევს.

აღსანიშნავია, რომ "გაგრაში" ერთდროულად 4 ფეხბურთელი გამოვიდა "რუსთავიდან" და თითოეულმა მათგანმაც (ავთანდილ ბრაჭული, ერეკლე კილაძე, გიგა სამხარაძე, რატი ცაცკრიალაშვილი) დიდი წვლილი შეიტანა "რუსთავის" შარშანდელ ტრიუმფში...

ამ გუნდებისაგან განსხვავებით, უფრო მოკრძალებული მიზნები უნდა ჰქონდეს უმაღლესი ლიგის კიდევ ერთ ყოფილ ბინადარს "ცხინვალს"; თუმცა, ამას ობიექტური მიზეზებიც აქვს: გამოცდილი სპეციალისტის, მალხაზ ლაცაბიძის დამოძღვრილი გუნდი ხომ ამჯერადაც "დაიცალა" წამყვანი ფეხბურთელებისაგან!

რაც შეეხება მატებას, "ცხინვალს" ლოკალური მიზნების განხორციელებაში დახმარება უნდა გაუწიონ გამოცდილმა ახალწვეულებმა: 33 წლის გარემარბმა კობა შალამბერიძემ და 32 წლის ცენტრფორვარდმა ზვიად მეტრეველმა.

და კიდევ: კვლავაც "ცხინვალში" აგრძელებს ამჯერად უკვე ფუნქციონერის კარიერას კლუბის ტექნიკური დირექტორი დავით ცაბაძე...

ახალი შუქურა

2014 წელს "შუქურა" ოცწლიანი პაუზის მერე დაუბრუნდა უმაღლეს ლიგას; მას შემდეგ ქობულეთელთა გუნდმა 4 სეზონი გაატარა უძლიერესთა რიგებში და აი, ამჯერად რანგით მეორე ლიგაში მოუწია დაბრუნებამ.

ძალიან ძნელია ახალ სეზონში "შუქურას" შანსებზე საუბარი: გუნდს მთავარი მწვრთნელიც ახალი ჰყავს (ახალგაზრდა სპეციალისტი გიორგი ჭელიძე) და შარშანდელთან შედარებით, შემადგენლობაც, ფაქტობრივად, მთლიანად გადახალისებულია. უამრავ ახალწვეულთა შორის, 25 წლის ცენტრფორვარდი, ელგუჯა ლობჯანიძე უნდა გამოვყოთ, რომელიც საქართველოს ჩემპიონატში რუსული "ორენბურგიდან" დაბრუნდა.

აგრეთვე, 23 წლის ბრაზილიელი მცველი რაი, რომელმაც ახალ სეზონში ჩატარებულ ორ მატჩში 2 გოლის გატანა მოასწრო! ცალკე უნდა აღინიშნოს "შუქურას" ბოლო წლების ლიდერის, გიორგი ჩელებაძის დაბრუნებაც: ქობულეთელთა გუნდის კაპიტანს, მძიმე ტრავმის გამო ხომ, ფაქტობრივად, წელიწად-ნახევარი გაუცდა...

სამგურალი, ფავორიტების რისხვა

წინა სეზონის ერთ-ერთი გამორჩეული გუნდი, უდავოდ, "სამგურალი" იყო: წყალტუბოელებს ფავორიტად არავინ მიიჩნევდა და ბევრის აზრით, მხოლოდ ლიგაში ადგილის შენარჩუნებისათვის უნდა ებრძოლათ; თუმცა, გამოცდილი სპეცილისტის, გია გიგატაძის ხელმძღვანელობით მოასპარეზე გუნდმა ყველა ეს პროგნოზი თავდაყირა დააყენა: "სამგურალი" მთელი ჩემპიონატის განმავლობაში ლიდერთა სამეულის სიახლოვეს ტრიალებდა და საბოლოოდ, IV ადგილზე დაასრულა სეზონი.

"სამგურალი" აშკარად ხარისხიან ფეხბურთს უჩვენებდა და იმის მიუხედავად, რომ საშინაო თამაშებს სხვაგან (მარტვილში) ატარებდა, ფავორიტებსაც არაფერს უთმობდა: "სიონსაც" ორი მატჩი მოუგო და რაც მთავარია, ერთადერთი გუნდი იყო შარშანდელ სეზონში, ეროვნული ლიგა 2-ის გამარჯვებული "რუსთავი" ორჯერ რომ დაამარცხა!

ახალი სეზონისათვის "სამგურალმა" ძირითადი ბირთვი შეინარჩუნა და რამდენიმე ახალწვეულიც დაიმატა, რომელთა შორისაც აუცილებლად უნდა ვახსენოთ 32 წლის ფორვარდი მამუკა ღონღაძე და 19 წლის შემტევი გაბრიელ საღრიშვილი.

აღსანიშნავია, რომ ქუთაისის "ტორპედოდან" იჯარით გადმოყვანილმა საღრიშვილმა ახალი სეზონის პირველ ტურში "შევარდენთან" გასვლით მატჩში "დუბლი" შეასრულა. და კიდევ "სამგურალზე": კვლავაც ამ გუნდის მაისურით აგრძელებენ კარიერას წყალტუბოელთა ცნობადი ვეტერანები, 35 წლის გიორგი ნერგაძე და 34 წლის გაგა ჩხეტიანი!

P.S. რაც შეეხება ეროვნულ ლიგა 2-ში აღზევებულ "თელავს", "შევარდენი 1906"-სა და "ნორჩი დინამოს", ამ სამ გუნდზე სხვა დროს ვისაუბროთ...

1431
მკითხველის კომენტარები / 1 /
Zura
0
სამგურალი არავისთვის იქნება ხელ წამოსაკრავი მეტოქე
მსგავსი ამბები
რუბრიკის სხვა სიახლეები
;