ეროვნული ლიგა 2. საუკეთესო დეისაძეა, ბათუმის 'დინამო' ფავორიტია

ეროვნული ლიგა 2-ის პირველი წრის საუკეთესო ფეხბურთელად იაგო დეისაძე აღიარეს. "ნორჩი დინამოს" 30 წლის თავდამსხმელმა ეს 9 მატჩში 6 გოლითა და 2 საგოლე გადაცემით დაიმსახურა.

საკმაოდ დიდია გამოცდილი თავდამსხმელის წვლილი იმაში, რომ ეროვნულ ლიგა 2-ში წელს გადასული "ნორჩი დინამო" უმალ ლიდერთა ჯგუფში დამკვიდრდა.

"ლიგა 2-ში ბევრი კარგი მოთამაშე იყო და მათ შორის პრიზი მე რომ მომცეს, ძალიან გამიხარდა. ზოგადად, პრიზი ყოველთვის სასიამოვნოა, მით უფრო, საუკეთესო რომ ხდები და გამოგარჩევენ. ამავე დროს, ეს ჩემთვის დიდი მოტივაცია და დიდი პასუხიმგებლობაა", - ამბობს დეისაძე.

მისივე თქმით, არის ფაქტორები, რამაც 30 წლის ასაკში თავის გამოჩენაში შეუწყო ხელი: "ძლიერ შემადგენლობაში მოვხვდი, საკმაოდ საინტერესო ჩემპიონატია და ეს დიდი მოტივაცია აღმოჩნდა.

ისტორიას რომ გადავხედოთ, "ნორჩი დინამო" საქართველოში ერთ-ერთი ყველაზე ტრადიციული საფეხბურთო სკოლა იყო, რომელიც დიდი ხანია, პროფესიულ ფეხბურთში თავის სიტყვას ამბობს. აქ თავს კარგად ვგრძნობ და ეს შედეგებზე აისახა".

დეისაძის აზრით, "ნორჩი დინამო" ეროვნულ ლიგაში გადასვლის რეალური კანდიდატია: "ძნელი სათქმელია, ეროვნულ ლიგაში გადავალთ თუ არა, მაგრამ, ჩემი აზრით, დღესდღეობით საკმაოდ ძლიერი შემადგენლობაც გვყავს და ლიგა 2-ში ერთ-ერთ ყველაზე კონკურენტუნარიან გუნდად ჩამოვყალიბდით. ამავე დროს, ყველა გუნდს შევხვდით და ვნახეთ, რომელს რა შესაძლებლობები აქვს. ყოველივე ეს მაიმედებს, რომ ეროვნულ ლიგაში გადასვლა შეგვიძლია".

პირველი წრის საუკეთესო მოთამაშემ კონკურენტებზეც ილაპარაკა: "კონკურენტი? ზოგადად, წელს საკმაოდ კარგი გუნდები არიან ლიგა 2-ში და რამდენიმე მათგანის გამოყოფა შეიძლება.

მაგრამ მაინც ბათუმის "დინამოს" გამოვარჩევდი. მიმაჩნია, რომ აჭარელთა ფინანსური შესაძლებლობიდან გამომდინარე, ყველაზე უკეთ შეუძლიათ დაკომპლექტება, ახლა ბაზა აუშენეს და მშვენიერ პირობებში ემზადებიან.

ამ ყველაფრის გარდა, ტრადიციული კლუბია, კარგი მწვრთნელი ჰყავს და ეროვნულ ლიგაში აღზევების მთავარ კანდიდატად ამიტომაც მიმაჩნია. ყველა დანარჩენი მეტ-ნაკლებად თანაბარი ძალის გუნდია".

ყოველდღიური სპორტული გაზეთი "ლელო"
698
მკითხველის კომენტარები / 0 /
მსგავსი ამბები
რუბრიკის სხვა სიახლეები