[ეროვნული ლიგა 2] უიღბლობა, უდისციპლინობა თუ სხვა?.. ბოლნისის სიონი მოლოდინის რეჟიმშია

მოგეხსენებათ, ბოლნისის "სიონმა" გასული სეზონის შედეგების მიხედვით უმაღლესი ლიგა დატოვა. გუნდიდან წავიდა მთავარი მწვრთნელი თემურ შალამბერიძე. ჩვენი ინფორმაციით, კლუბს რამდენიმე ფეხბურთელიც დატოვებს. რა ხდება "სიონში"? ამ კითხვით "ლელომ" კლუბის დირექტორ გია გიორბელიძეს მიმართა:

"ჯერჯერობით, მოლოდინის რეჟიმში ვართ. წესითა და რიგით, ყველაფერი უნდა გაირკვეს უახლოეს მომავალში, როცა კლუბის სპონსორებს შევხვდებით. რა თქმა უნდა, ვიცით, რა დახმარება გვექნება ფეხბურთის განვითარების ფონდიდან. ასევე უნდა ვიცოდეთ ისიც, თუ რისი მოლოდინი უნდა გვქონდეს ჩვენი სპონსორებისგან. სწორედ ამის მიხედვით გადაწყდება, რა დონის გუნდი გვეყოლება მომავალ სეზონში...

ყველას ძალიან დიდი იმედი გვაქვს, რომ "სიონი" ამბიციური კლუბ იქნება და იბრძოლებს უმაღლეს ლიგაში დასაბრუნებლად. ჩვენი მიზანი სწორედ ეს არის. ყველას ძალიან დაგვწყდა გული, რომ გავვარდით... რას ვიზამთ, ასეთი შედეგი მოგვიტანა წინა სეზონმა. ჩემი მხრივ, შემიძლია ვთქვა, რომ ფეხბურთელებს ჰქონდათ ყველანაირი პირობა. თუნდაც ხელფასები რომ ავიღოთ, ყველაფერი დროულად ხდებოდა, სავარჯიშო პირობებიც იყო, მაგრამ...

თემურ შალამბერიძემ ჩემპიონატის დასრულებამდე ცოტა ხნით ადრე გამოთქვა გუნდიდან წასვლის სურვილი, მაგრამ რა უნდა გვექნა? მაშინ ვითარება ისეთი იყო და ჩემპიონატის ბოლომდე იმდენი იყო დარჩენილი, ახალ მწვრთნელს ვერ მოვიყვანდით. ბოლოს და ბოლოს, ვერცერთი სპეციალისტი ვერ აიღებდა საკუთარ თავზე პასუხისმგებლობას, რომ გადაერჩინა გუნდი...

საბოლოოდ მოხდა ის, რაც მოხდა. ფაქტია, რაღაც არ გამოგვივიდა, რაღაც "გაგვეპარა", თუ "გაგვეცქა"... არ ვიცი, კონკრეტულად რა იყო ეს, შესაძლოა, უიღბლობაც... შეიძლება, დისციპლინასთან დაკავშირებული პრობლემაც... რაც უნდა კარგი ფეხბურთელი იყოს გუნდში, მთავარი მაინც დისციპლინაა...

რაც შეეხება ახალ მთავარ მწვრთნელს. ჩვენ მის ვინაობას უახლოეს მომავალში გამოვაცხადებთ. ჯერ ზუსტად უნდა ვიცოდეთ ჩვენი ფინანსური შესაძლებლობები. სპონსორებთან შეხვედრა შეიძლება ყოველ წამს შედგეს. ნებისმიერ შემთხვევაში, ჩემს დარჩენას და მუშაობას მაშინ ექნება აზრი, თუ უმაღლეს ლიგაში დასაბრუნებლად ვიბრძოლებთ. ამ დროისთვის სამ მწვრთნელთან გვქონდა წინასწარი მოლაპარაკება. სწორად გამიგეთ, მათ ვინაობას ვერ დავასახელებ მანამ, სანამ მეტი კონკრეტიკა არ გვექნება...

რაც შეეხება ფეხბურთელებს, გათავისუფლების ფურცლის მისაღებად ჯერ ოფიციალურად არავის მოუმართავს, მაგრამ, რა თქმა უნდა, იქნებიან წამსვლელები. ჩვენ ასეთი მონახაზი გვაქვს: გვინდა, გასული სეზონის შემადგენლობიდან 3-4 ფეხბურთელი დავიტოვოთ. იყო კიდეც გარკვეული მოლაპარაკება და ზოგიერთი მათგანი არ არის დარჩენის წინააღმდეგი, მაგრამ ხომ გესმით, სიტუაციის ბოლომდე გარკვევას ველით", - გვითხრა გიორბელიძემ.

1372
მკითხველის კომენტარები / 0 /
მსგავსი ამბები
რუბრიკის სხვა სიახლეები
;