ეროვნული ლიგა. II ტური: ლოკომოტივი-დინამო და ალალი ტაში კაპიტანს [VIDEO]

11.03. თბილისი. მიხეილ მესხი (სათ)

1:0 შონია (21), 1:1 ო. კიტეიშვილი (40. შულაიას პასით), 1:2 ივანიშვილი (44. ო. კიტეიშვილის პასით), 1:3 შულაია (54. ზივზივაძის პასით), 1:4 ო. კიტეიშვილი (83. კუციას პასით)

ლოკომოტივი (4-2-3-1): თევდორაძე - გაბაძე, ნ. ჭანტურია, ლ. ქურდაძე, უბილავა (77. ო. კობახიძე) - გვალია (63. კომახიძე), შონია - დავითაშვილი, სამურკასოვი, გავაშელიშვილი -არველაძე (71. ჯიქია)

სათადარიგოები: კიკნაძე, ღონღაძე, ძებნიაური, შეროზია
მწვრთნელი: ლაშა ჭაღიაშვილი

დინამო (4-2-3-1): ბულისკერია - რუხაია, თოთაძე, კობოური, ხარაბაძე - ქარდავა, ივანისენია (30. კუცია) - შულაია, ო. კიტეიშვილი (86. ნინუა), ივანიშვილი - ზივზივაძე (77. ერგემლიძე).

სათადარიგოები: ქოჩლაძე, დარცმელია, ბაბუნაძე, გოშაძე
მწვრთნელი: კახა კაჭარავა
გაფრთხილება: რუხაია (28)

არბიტრი: ი. კვირიკაშვილი

გადამწყვეტი ცვლილება

ამ ტურში ერთადერთი გუნდი თბილისის "დინამო" იყო, ზუსტად იმავე შემადგენლობით რომ გამოვიდა, რაც პირველ ტურში ჰყავდა. ეგ კი არა, ამ დედაქალაქურ დერბიშიც პირველი ცვლილება წინა ტურის იდენტური იყო: გუნდის უკრაინელი ახალწვეულის, დმიტრო ივანისენიას ნაცვლად, შეცვლაზე ამჯერადაც გიორგი კუცია შევიდა...

სწორედ ამ ცვლილების მერეც მოხდა, "დინამოს" თამაში ძირფესვიანად რომ შეიცვალა და კახა კაჭარავას გუნდსაც სათამაშო თუ ტერიტორიული უპირატესობა მატჩის ბოლომდე აღარ დაუთმია. ანდა, რა ან, ვისთვის იყო დასათმობი - დარჩენილი ტაიმ-ნახევრის განმავლობაში. "ლოკომოტივს" ხომ, ფაქტობრივად, არც ერთი სახიფათო მომენტი არ შეუქმნია!..

არადა, აბსოლუტურად საპირისპირო სცენარით მიმდინარეობდა ამ უხვგოლიანი მატჩის პირველი ნახევარი საათი: "დინამოს" არც შეტევაში გამოსდიოდა, შუახაზიც "გაწყვეტილი" ჰქონდა და უკანახაზელების პოზიციური შეცდომებიც ხომ აშკარად თვალში საცემი იყო! ეგ კი არა, მასპინძელთა მეკარე რევაზ თევდორაძე საქმეში პირველად 35-ე წუთზე ჩაერთო, როცა ლაშა თოთაძის საფირმო საჯარიმო დარტყმა მოიგერია!

აი, მანამდე კი, "ლოკომოტივი", სულ მცირე, ოთხჯერ დაემუქრა სახიფათოდ მეტოქის კარს: ვატო არველაძესა (ორჯერ) და მამია გავაშელიშვილის დარტყმებს სიზუსტე თუ მცირეოდენ დააკლდათ, აი, თემურ შონიამ მართლაც უნაკლოდ "გაისროლა" თავისი საყვარელი პოზიციიდან (საჯარიმოს გარედან) და ზედიზედ მეორე მატჩში შეძლო გოლის გატანა თავისი ახალი გუნდის მაისურით.

თუმცა, ისე, როგორც წინა ტურში, შონიას გოლი ამჯერადაც არ აღმოჩნდა საკმარისი: როგორც უკვე აღვნიშნეთ, მატჩის ბოლომდე დარჩენილ ტაიმ-ნახევარში, მოედნის ბატონ-პატრონი "დინამო" იყო, რაც საბოლოოდ აბსოლუტურად ლოგიკურ შედეგშიც აისახა. აი, ასე:

"დინამომ" პირველი მატჩი მოიგო საიუბილეო ჩემპიონატში (თუმცა, წაგებას არც პირველ ტურში იმსახურებდა), ხოლო "ლოკომოტივი" - ზედიზედ მეორედ დამარცხდა...

მრისხანე ტრიო და ყოჩაღი კუცია

მატჩის პირველი ნახევარი საათის განმავლობაში ლაშა ჭაღიაშვილის გუნდი, ფაქტობრივად, ყველა კომპონენტში სჯობნიდა ტიტულოვან მეტოქეს; სწორედ მოედანზე არსებული მდგომარეობის გამოსწორებას ემსახურებოდა კიდეც სტუმართა შემადგენლობაში განხორციელებული ნაადრევი ცვლილება (რაც "დინამოს" თავკაცს კახა კაჭარავას ნამდვილად არ ახასიათებს ხოლმე).

18 წლის გიორგი კუცია მართლაც მშვენივრად ჩაერთო თამაშში, არც ორთაბრძოლებს ერიდებოდა და მატჩის ბოლოს საგოლე პასიც მიითვალა!

სტუმართა ახალგაზრდა საყრდენის გარდა, "დინამოს" შემადგენლობაში, რაღა თქმა უნდა, შემტევი სამეულის მართლაც გამორჩეულად აქტიური და, რაც მთავარია, ეფექტიანი თამაშიც უნდა ვახსენოთ:

აკაკი შულაიამ, თავისი სისწრაფისა და დრიბლინგის ხარჯზე, მარჯვენა ფლანგზე მეურვეები აშკარად დაჩაგრა, გიორგი ივანიშვილმა, ფაქტობრივად, ყველა სახიფათო შეტევაში აქტიური მონაწილეობა მიიღო, ხოლო ოთარ კიტეიშვილმა ისე ითამაშა, როგორც გუნდის კაპიტანს, და საერთოდ, საქართველოს ჩემპიონატის ერთ-ერთ საუკეთესო ფეხბურთელს შეშვენის!

ჰოდა, ალბათ, სამართლიანიც იყო, ამ სამივე მათგანმა მოედანი უგოლოდ რომ არ დატოვა, ეგ კი არა, კიტეიშვილმა სულაც "დუბლი" შეასრულა! თანაც, ამ სამეულმა ყველა "გემოვნების" გოლები გაიტანა:

ივანიშვილმა ინდივიდუალური ოსტატობის ხარჯზე, II ტურის ერთ-ერთი საუკეთესო გოლი გაიტანა, აკაკი შულაიამ იმავე ივანიშვილისა და ბუდუ ზივზივაძის ეფექტური კომბინაცია დაასრულა ზუსტი დარტყმით, კიტეიშვილმა კი, ტაიმების მიწურულს, საშუალო მანძილიდან, ზუსტი და გამოზომილი დარტყმებით შანსი არ დაუტოვა მასპინძელთა მეკარეს...

მატჩის გმირი

"დინამოს" 21 წლის კაპიტანმა მართლაც გამორჩეული მატჩი ჩაატარა და ამ შემთხვევაში, საქმე მხოლოდ ორ გატანილ გოლში არ არის: ოთარ კიტეიშვილმა ინდივიდუალურადაც გაიბრწყინა რამდენჯერმე და თანაგუნდელებისათვისაც არ "ინანებდა" ბურთის დროულად და, რაც მთავარია, ზუსტად გადაწოდებას!

სხვათა შორის, ამ დედაქალაქურ "დერბიში" ნათლად გამოჩნდა, რომ "დინამოს" ახალგაზრდა კაპიტნის მარგი ქმედების კოეფიციენტი ბევრად უფრო მაღალია, როცა ცენტრფორვარდის უკან (ანუ - პლეიმეიკერად) მოქმედებს;

არადა, წინა სეზონში (და, იმის წინაც) არაერთხელ გვინახავს ისეთი მატჩებიც, როცა ოთარ კიტეიშვილს გარემარბისა თუ საყრდენი ნახევარმცველის ფუნქციების შესრულება უწევდა...

დედაქალაქური დერბის დამთავრებამდე ცოტა დროღა რჩებოდა, სტუმართა თავკაცმა კახა კაჭარავამ მესამე ცვლილება რომ განახორციელა და თავისი გუნდის კაპიტანს იმის საშუალებაც მისცა, რომ მოედნიდან ტაშით გაეცილებინათ! კაპიტანი კი, ამ ალალ ტაშს ნაღდად იმსახურებდა...

ყოველდღიური სპორტული გაზეთი "ლელო"
970
მკითხველის კომენტარები / 0 /
მსგავსი ამბები
რუბრიკის სხვა სიახლეები
;