ეროვნული ლიგა. II ტური: "საბურთალოს დიდი ამბიციები ექნებაო... [VIDEO]

კოლხეთი 1:4 საბურთალო - 10.03. ზესტაფონი. დავით აბაშიძე
1:0 გოგონაია (20-პენ), 1:1 გორგიაშვილი (47), 1:2 კოხრეიძე (54), 1:3 რეხვიაშვილი (76), 1:4 ტატანაშვილი (88-პენ)

კოლხეთი (4-4-1-1): სოლოსინი - გ. კილასონია, მახარაძე, გოგონაია, კაბორე - გოგბერაშვილი (82. არქანია), დანილოვი, ტყემალაძე, ლ. კაკულია (82. ჩუბითიძე) - არზიანი (67. ჯიმშელეიშვილი) - მიხაილოვი.

სათადარიგოები: გურგენიძე, პონომარიოვი
მწვრთნელი: კონსტანტინ გალკინი

საბურთალო (4-2-3-1): ლ. კუპატაძე - იაშვილი (35. ტატანაშვილი), თედ. გრიგალაშვილი, მარგველაშვილი, ნადარაია (46. რეხვიაშვილი) - გორგიაშვილი, თარხნიშვილი - ვაგნერი, დიასამიძე (81. გოშთელიანი), ვოლკოვი - კოხრეიძე.

სათადარიგოები: ქურდაძე, მამუჩაშვილი, გვარაძე, ჩაბრაძე
მწვრთნელი: გია ჭიაბრიშვილი
არბიტრი: დ. ხარიტონაშვილი


თუ არაფერი შეიცვალა...

"საბურთალომ" ეროვნული ლიგის მეორე ტურში მეორედ იმარჯვა და ერთხელაც დაადასტურა, რომ მიმდინარე სეზონში დიდი ამბიციები ექნება. ფაქტია, გია ჭიაბრიშვილის გაწვრთნილი გუნდი გამართულ, ლამაზ და სანახაობრივ ფეხბურთს თამაშობს, თან ჩვენი პირველობის კვალობაზე შემსრულებლებიც საკმაოდ ჰყავს.

პირველი ტაიმი ფოთის "კოლხეთმა" სენსაციურად მოიგო, მეორეში კი მეტოქეს აშკარად დაეჩაგვრინა. ის მოუმზადებელი და დაულაგებელი გუნდის შთაბეჭდილებას ტოვებს. თუ არაფერი შეიცვალა, ფოთელებს გაუჭირდებათ მთავარ ლიგაში ადგილის შენარჩუნება.

ხუთი გოლის ისტორია

ფოთელები მას შემდეგ დაწინაურდნენ, რაც "საბურთალოს" საჯარიმოში ვლადიმერ გოგბერაშვილი წააქციეს. პენალტი ზუსტად დაარტყა ფოთელთა კაპიტანმა ლაშა გოგონაიამ. ეს იყო ფოთელთა პირველი და, ალბათ, უკანასკნელი გააზრებული ქმედება შეტევაში.

დაიწყო მეორე ტაიმი და ანგარიში თორნიკე გორგიაშვილმა გაათანაბრა. სიმბოლურია, რომ მას "დავით აბაშიძეზე" "ზესტაფონის" მაისურით არაერთი შეხვედრა ჩაუტარებია.

ისევე, როგორც გია ჭიაბრიშვილს დაუმოძღვრავს მასპინძელი გუნდი. შეგახსენებთ, სწორედ ჭიაბრიშვილის ხელმძღვანელობით მოიგო "ზესტაფონმა" არსებობის ისტორიაში მეორე და, ჯერჯერობით, უკანასკნელი საჩემპიონო ტიტული.

მერე იყო გიორგი კოხრეიძისა და მისი სეხნია რეხვიაშვილის გოლები, რასაც ტატანაშვილის მიერ თერთმეტი მეტრიდან ზუსტი დარტყმა მოჰყვა და ამით დასრულდა "კოლხეთის" განადგურება.

ანტიგმირი

ვინმემ ისე არ იფიქროს, თითქოს ფოთელთა მთავარ მწვრთნელ კონსტანტინ გალკინს იმიტომ ვასახელებთ ანტიგმირად, რომ უცხოელია და ამით რამეს ვერიდებით.

უბრალოდ, მისმა გაწვრთნილმა გუნდმა აშკარად ჩააგდო მეორე ტაიმი და ეს იმდენად თვალსაჩინო იყო, ასე არც ერთმა გუნდმა არ უნდა დათმოს პოზიციები თამაშის არც ერთ მონაკვეთში.

ყველამ კარგად ვიცით, რომ "კოლხეთი" სულაც არ არის ყველაზე მდიდარი ქართული კლუბი. ამასთან ერთად, გუნდი საკუთარ სტადიონზე ვერ თამაშობს. ეს ყველაფერი გასაგებია, მაგრამ თუნდაც ფიზიკური მომზადების მხრივ, უკეთეს კონდიციებში უნდა იყოს.

მით უმეტეს, "კოლხეთმა" თურქული შეკრება გაიარა და რამდენიმე საკონტროლო შეხვედრაც ჩაატარა. ამასთან ერთად, ზესტაფონურ მატჩში ვერანაირ კრიტიკას ვერ უძლებდა ფოთელთა რუსი ლეგიონერების თამაში. განსაკუთრებით სუსტად გამოიყურებოდა ფორვარდი ილია მიხაილოვი.

ციდან ვარსკვლავები არც დანარჩენებს მოუწყვეტიათ, მაგრამ ლეგიონერი იმის ლეგიონერია, რომ ადგილობრივს რაღაცით მაინც სჯობდეს...

გმირი

"საბურთალო" ანგარიშში რომ ჩამორჩა, თითქოს გუნდი უნდა ანერვიულებულიყო, თუმცა ამ დროს საქმეში თბილისური კლუბის მთავარი მწვრთნელი ჩაერია. უკვე 35-ე წუთზე ჭიაბრიშვილმა პირველი ტაქტიკური გადაადგილება განახორციელა - მცველ ნოდარ იაშვილის ნაცვლად მინდორზე ფორვარდი დიმიტრი ტატანაშვილი შეუშვა.

მეორე ტაიმის დასაწყისში კი ასევე ფლანგელი მცველის, ცოტნე ნადარაიას ნაცვლად გიორგი რეხვიაშვილი შეუშვა. რა თქმა უნდა, ამანაც განაპირობა ის, რომ მეორე ნახევარში მინდორზე მხოლოდ ერთი გუნდი თამაშობდა.

"საბურთალომ" "კოლხეთს" ბოლომდე მოახვია თავს თამაშის საკუთარი მანერა. ჩაგდებული პირველი ნახევრის შემდეგ სტუმრებმა მეორეში მართლაც რომ გემრიელი ფეხბურთი შემოგვთავაზეს - ოთხი ხომ გაიტანეს და კიდევ ერთი ამდენი (მინიმუმ) შეეძლოთ.

ყოველდღიური სპორტული გაზეთი "ლელო"
886
მკითხველის კომენტარები / 0 /
მსგავსი ამბები
რუბრიკის სხვა სიახლეები
;