ეროვნული ლიგა. II ტური: ჩემპიონის ადრეული გოლით... [VIDEO]

რუსთავი  0:1 ტორპედო - 10.03. თბილისი. დავით პეტრიაშვილი
0:1 კუხიანიძე (5)

რუსთავი (4-2-3-1): რევიშვილი - გეგეჭკორი, კობახიძე, ცხოვრებოვი, ცარიკაევი - ფონიავა (86. ბ. ქავთარაძე), პაპავა - გაბულოვი, გორელიშვილი (68. მარცვალაძე), კვირკვია (38. ჩოგაძე) - მიქელთაძე.

სათადარიგოები: სეფიაშვილი, სიჭინავა, კლიმიაშვილი, ენდელაძე
მწვრთნელი: ვლადიმირ გაზაევი

ტორპედო (4-2-3-1): კვასხვაძე - ტაბატაძე, ხურცილავა, გურული, ქიმაძე - კუხიანიძე (81. ლიპარტია), გიგაური - დოლიძე (74. მამასახლისი), სარდალიშვილი, კუტალია - ბოხაშვილი (65. კაპანაძე).

სათადარიგოები: ხაინდრავა, ჭიჭინაძე, წიქარიძე, თორ. გრიგალაშვილი
მწვრთნელი: კახა ჩხეტიანი
გაფრთხილება: ტაბატაძე (51), ცარიკაევი (52), რევიშვილი (90+4)

არბიტრი: ჯ. ხორავა


მესამე მეტოქე

ამ მატჩისადმი მოლოდინი დიდი იყო. ქუთაისელთა სასარგებლოდ იმ ფაქტმა იმოქმედა, რომ ჩემპიონმა ძირითადის ორი მცველი დაიბრუნა - გიორგი გურული და გიორგი ქიმაძე.

ცხადია, მეტოქეზე მეტი და დასაბუთებული ამბიცია სწორედ "ტორპედოს" გააჩნდა, რომლისთვისაც მნიშვნელოვანი იყო, გასვლაზე მოეგო გუნდისთვის, რომელიც მისთვის ტიტულის წართმევაზე აცხადებს პრეტენზიას.

თავიდანვე ვთქვათ - კახა ჩხეტიანის გაწვრთნილებმა, რომლებმაც პირველ ტურში შინ 2:3 წააგეს "დილასთან", "რუსთავზე" აზრიანი ფეხბურთი აჩვენეს...

ორივე გუნდს მოედანზე მესამე მეტოქე დახვდა - ძლიერი ქარი, რომელიც ფეხბურთელებს ბურთის გაგორების შანსს არ აძლევდა, "სტანდარტების" შესრულება კი იმიტომ იწელებოდა, რომ ბურთის გაჩერება ჭირდა. სხვათა შორის, პირველ გოლზე გავლენა სწორედ ქარმა იქონია...

ჩემპიონები ადრეული გოლით დაწინაურდნენ: მე-5 წუთზე გრიგოლ დოლიძის მიერ ჩაწოდებული ბურთი თითქოს ნუკრი რევიშვილს უნდა აეღო, თუმცა ეპიზოდზე ქარმა იქონია გავლენა - ბურთს მიმართულება ოდნავ შეუცვალა, რის გამოც მეკარეს ხელიდან გაუვარდა და კარის წინ მყოფმა გიორგი კუხიანიძემ ანგარიში გახსნა - 0:1.

გაზაევის პრობლემა

მეორე ნახევარი შედარებით უფერული გამოდგა. "ტორპედოს" ეს ანგარიში აწყობდა და შედარებით ფრთხილად თამაშობდა. რუსთაველები კი, მიუხედავად იმისა, რომ აგებდნენ, შანსს მაინც კონტრშეტევებში ეძებდნენ. თუმცა, ქუთაისელები მაინც უკეთ გამოიყურებოდნენ და მეტი მომენტიც შექმნეს.

გოლების გატანა შეეძლო მიხეილ სარდალიშვილს, რომელიც კუტალიამ მეკარესთან პირისპირ დატოვა (რევიშვილმა ივარგა); მატჩის ბოლოს, მერაბ გიგაურის პასით, რევიშვილთან ერთი-ერთზე თორნიკე კაპანაძეც დარჩა, მასაც გასცდა, მაგრამ... ბურთი ქარმა წაიღო.

ერთი სიტყვით, "ტორპედომ" თამაში დამსახურებულად მიიყვანა გამარჯვებამდე. აქვე გამოჩნდა "რუსთავის" პრობლემაც, რომელიც ამ ეტაპზე არც არის გასაკვირი - გაზაევის გუნდს ძალიან აკლია შეთამაშება.

როცა ეს პრობლემა მოგვარდება, მერე მთავარი იქნება გუნდის ბირთვის შენარჩუნება, თორემ სხვა შემთხვევაში რუსთაველები გამარჯვების აღლუმს ვერ ჩაატარებენ.

ორი პრეტენზია

ქუთაისელები უფრო აგრესიულად თამაშობდნენ, რუსთაველები კი კონტრშეტევების იმედად დაცვაში ჩასხდნენ. მე-7 წუთზე ნომინალური მასპინძლები პენალტს ითხოვდნენ.

გიორგი გაბულოვი ფლანგიდან აწვდიდა, ბურთის მოგერიებისას დავით ხურცილავა ნახტომში უხერხულად დაეცა და ბურთს მთელი ტანით გადაეფარა. მასპინძელთა აზრით, ქუთაისელთა მცველმა ხელით ითამაშა, მაგრამ არბიტრმა სხვაგვარად განსაჯა და თამაშის გაგრძელება ბრძანა...

ქუთაისელებს მალე ორბურთიანი სხვაობით შეეძლოთ დაწინაურება - დოლიძემ საჯარიმოს ხაზიდან ძლიერად დაარტყა, რევიშვილს ბურთი ხელიდან გაუვარდა, მაგრამ კარის წინ მყოფმა ევგენი ბოხაშვილმა ვერ იყოჩაღა და რუსთაველთა მეკარემ გუნდი გადაარჩინა.

პირველი რეალური საგოლე მომენტი რუსთაველებმა ტაიმის მიწურულს შექმნეს - მიხაილ გორელიშილის ფლანგური გადაცემის შემდეგ გაბულოვმა ბურთი წინ გაიგდო და კარის წინ აღმოჩნდა, მაგრამ... მიზანს ააცილა.

45-ე წუთზე მასპინძლები კიდევ ერთხელ ითხოვდნენ პენალტს: კუთხურის მოწოდების შემდეგ, დოლიძესთან შეჯახებისას, მოედანზე თემურ ჩოგაძე დაეცა, მაგრამ ჯენერი ხორავამ 11-მეტრიანი არც ამჯერად დანიშნა.

ყოველდღიური სპორტული გაზეთი "ლელო"
904
მკითხველის კომენტარები / 0 /
მსგავსი ამბები
რუბრიკის სხვა სიახლეები
;