ეროვნული ლიგა. III ტურის მიმოხილვა: შესვენებაც საჭიროა და დაფიქრებაც

დასვენება ყველას სჭირდება და ეროვნული ლიგის გუნდები რატომ უნდა იყვნენ გამონაკლისნი?!.

ჰოდა, ზოგიერთისთვის მართლაც სულზე მისწრება უნდა იყოს ჩვენს ჩემპიონატში გამოცხადებული ორკვირიანი პაუზა - ეროვნული ლიგის, სულ მცირე, ოთხი გუნდის ხელმძღვანელებსა თუ მწვრთნელებს ეს დრო ნამდვილად დასჭირდებათ გარკვეული დასკვნების გასაკეთებლად.

ისე, ნურც იმას გამოვრიცხავთ, რომ ამ პაუზის დროს, ამა თუ იმ გუნდში გარკვეული საკადრო ცვლილებაც მოხდეს...

მშვენიერი განწყობით კლასიკომდე

მომდევნო ტურში I წრის ცენტრალური მატჩი გველოდება: თბილისის "დინამომ" მოქმედ ჩემპიონს "ტორპედოს" უნდა უმასპინძლოს! ჰოდა, კახა კაჭარავას გუნდიც მშვენიერ განწყობაზე ხვდება "ქართულ კლასიკოს":

III ტურის ერთ-ერთ საინტრიგო მატჩში, "დინამომ" ყველა კომპონენტში დაჯაბნა სეზონის ერთ-ერთ ფავორიტად შერაცხილი "სამტრედია" და ზედიზედ მეორე შეხვედრაში გაახარა თავისი ქომაგები აშკარად შეტევაზე ორიენტირებული ფეხბურთით!

ისე, ინტრიგა, ფაქტობრივად, მხოლოდ მატჩის წინ იყო: ბევრისთვის მოულოდნელად, "დინამოს" აშკარაზე მეტი რომ ჰქვია, აი, ისეთი უპირატესობა ჰქონდა 90 წუთის განმავლობაში! წინა ტურის მსგავსად, ამჯერადაც მშვენიერი შთაბეჭდილება დატოვა "დინამოს" შემტევმა ოთხეულმა: აკაკი შულაიამ, ოთარ კიტეიშვილმა, გიორგი ივანიშვილმა და ბუდუ ზივზივაძემ.

არანაკლებ ჩინებულად გაისარჯა ამ სეზონში ძირითად შემადგენლობაში პირველად მოხვედრილი გიორგი კუციაც: 18 წლის საყრდენმა მთელი მატჩიც მაღალ დონეზე ჩაატარა და გოლიც ისეთი გაიტანა, თქვენი მოწონებული! სხვათა შორის, ამ ახალგაზრდა და ნიჭიერმა ფეხბურთელმა წინა სეზონშიც არანაკლებ ეფექტური გოლი გაიტანა "შუქურასთან" გასვლით მატჩში...

ჩემპიონიც ათამაშდა...

წესითა და რიგით, განწყობას, ჩემპიონიც არ უნდა უჩიოდეს: "ტორპედომ" ზედიზედ მეორე მატჩი მოიგო და კიდევ ერთხელ "მიანიშნა" ყველას, რომ ამ სეზონშიც უნდა მივიჩნიოთ ოქროს მედლების მოპოვების ერთ-ერთ ყველაზე რეალურ კანდიდატად!

კახა ჩხეტიანის გუნდი ისედაც აშკარა ფავორიტად მოიაზრებოდა "ლოკომოტივთან" მატჩში და "ტორპედომაც" ეს სტატუსი 100 პროცენტით გაამართლა: მეტოქე დიდი ანგარიშითაც დაამარცხა და "ქართული კლასიკოს" წინ, არანაკლებ მშვენიერი განწყობაც შეიქმნა.

აღსანიშნავია, რომ ამ მატჩში დუბლი შეასრულა მასპინძელთა შემტევმა ნახევარმცველმა ლევან კუტალიამ, რომელიც "ტორპედოს" შუახაზში არსებული დიდი კონკურენციის მიუხედავად, სრულიად დამსახურებულად ხვდება ძირითად შემადგენლობაში.

მიმდინარე სეზონში პირველი გოლი გაიტანა ძირითადში დაბრუნებულმა თორნიკე კაპანაძემ: წინა სეზონის ერთ-ერთმა გმირმა და საჩემპიონო გოლის ავტორმა, ამჯერად საკმაოდ შორი მანძილიდან, ეფექტური დარტყმით გამოიჩინა თავი.

აი, მეოთხე გოლი კი მართლაც კურიოზული გამოდგა: მასპინძელთა მორიგი "სტანდარტულის" შემდეგ, საკუთარ საჯარიმოში მცველების დასახმარებლად ჩასულ "ლოკომოტივის" ფორვარდ ვატო არველაძეს ბურთი უცნაური ტრაექტორიით "აეჭრა".

იმედს ვიტოვებთ, რომ ეს ავტოგოლი ფსიქოლოგიურად არ იმოქმედებს ამ 20 წლის ნიჭიერ შემტევზე და უკვე მომავალი ტურიდან (გნებავთ, ახალგაზრდული ნაკრების მაისურითაც) მეტოქეთა კარში გატანილი ეფექტური გოლებითაც, შარშანდელის მსგავსად, გაგვანებივრებს...

სამქულიანი შეცვლები

ეროვნულ ლიგაში მოღვაწე მწვრთნელებს შორის ყველაზე გამოცდილი სოსო ფრუიძე გახლავთ, რომელსაც, ჯერ კიდევ 90-იანი წლების დასაწყისიდან მოყოლებული, არაერთი ქართული გუნდი გაუწვრთნია; ეს გამოცდილი და მართლაც კვალიფიციური სპეციალისტი კი, ბოლო 10 (ათი) წელიწადია, "ჩიხურას" მოძღვრავს და წარმატებითაც.

თანაც, არცთუ სოლიდური რესურსის (მატერიალურსაც ვგულისხმობთ და ადამიანურსაც) მიუხედავად, საჩხერელთა გუნდი მუდამ მოწინავე პოზიციებზე იმყოფება და საქმეს ისეთი პირი უჩანს, რომ "ჩიხურა" ამ სეზონშიც არ დაარღვევს ტრადიციას და კვლავაც ევროტურნირების საგზურისათვის იბრძოლებს.

აი, "რუსთავმა" კი ზედიზედ მეორე მატჩი წააგო და კიდევ ერთხელ გამოჩნდა, რომ ამ გუნდის ახალ მთავარ მწვრთნელს ვლადიმირ გაზაევს, უპირველეს ყოვლისა, ოპტიმალური შემადგენლობის შერჩევასთან ერთად, თავისი გუნდის ფეხბურთელების ერთმანეთთან შეთამაშების პრობლემის გადაჭრა მოუწევს.

არადა, ჩვენი აზრით, "რუსთავმა" იმაზე უკეთესი შთაბეჭდილება დატოვა, ვიდრე წინა ორ ტურში (მათ შორის, "დინამოსთან" მოგებულ მატჩთან შედარებით); თუმცა, ამ გუნდის გულშემატკივრების უკმაყოფილებაც სამართლიან პრეტენზიად მიგვაჩნია: ერთიმეორეზე ცნობადი ახალწვეულებით დაკომპლექტებული "რუსთავის" თამაში, რბილად რომ ვთქვათ, უკეთესის სურვილს ტოვებს...

...გამოცდილების ფაქტორი შემთხვევით არ გვიხსენებია: როგორც კი მეტოქე კაცნაკლული დარჩა, სოსო ფრუიძემ ჯერ საყრდენი ნახევარმცველი ჩაანაცვლა შემტევი სტილის ნახევარმცველით, შემდეგ კი გარემარბის ნაცვლად მოედანზე ცენტრფორვარდიც გამოიყვანა.

ჰოდა, სწორედ შეცვლაზე შემოსულმა ახალგაზრდა ახალწვეულებმა გადაწყვიტეს კიდეც ამ მატჩის ბედი: 21 წლის დემურ ჩიხლაძის უზუსტესი პასის შემდეგ, 19 წლის დავით იონანიძემ ეფექტური დარტყმით თავის გუნდს გამარჯვება მოუტანა.

ესეც მორიგი საფეხბურთო დინასტია: საქართველოს ჩემპიონატების ისტორიაში აბსოლუტური რეკორდსმენის, ზურაბ იონანიძის ვაჟმა დავით იონანიძემ უმაღლეს ლიგაში სადებიუტო გოლი გაიტანა!

იყო თუ არა პენალტ(ებ)ი?

"ჩიხურა"-"რუსთავის" მატჩში, ორი საკამათო ეპიზოდიც იყო და ორივე შემთხვევაში, მეტოქეები პენალტს ითხოვდნენ. თუმცა, საჩხერელთა გუნდის კიდევ ერთი ნიჭიერი ახალწვეულის, 21 წლის ირაკლი ბუღრიძის შემთხვევაშიც არ უნდა დანიშნულიყო პენალტი სტუმართა კარში და არც იმ ეპიზოდშიც, როცა "რუსთავის" ყველაზე "ხარისხიანი" ლეგიონერი გიორგი გაბულოვი წაიქცა მეტოქის საჯარიმოში;

ანუ, ჩვენი აზრით, მატჩის არბიტრმა ირაკლი კვირიკაშვილმა, ორივე შემთხვევაში სწორი გადაწყვეტილება მიიღო; რასაც ნამდვილად ვერ ვიტყვით გიორგი გაბულოვისათვის ყვითელი ბარათის (რომელიც, მეორე იყო "რუსთავის" ერთ-ერთი საკვანძო ფეხბურთელისათვის) ჩვენებაზე: ანუ, არბიტრმა მიიჩნია, რომ სიმულაციას ჰქონდა ადგილი, არადა, მეტოქის საჯარიმოში შემტევისა და დამცველის ძალისმიერ ორთაბრძოლას უფრო წააგავდა ყველაფერი...

დაბრუნებები...

ამ ტურში ორი ისეთი ფეხბურთელის დაბრუნება მოხდა საქართველოს ჩემპიონატში, თავის დროზე ორივე მათგანზე დიდ იმედებს რომ ამყარებდნენ ქართველი გულშემატკივრები! და, წესითა და რიგით, ახლაც უნდა გვქონდეს იმედი, რომ ორივე მათგანს კვლავაც ექნება სანაკრებო პრეტენზია:

თბილისის "დინამოს" ახალწვეული, 26 წლის ნიკა ძალამიძე რვაწლიანი პაუზის მერე დაბრუნდა საქართველოს ჩემპიონატში, "რუსთავის" 23 წლის საყრდენი ნახევარმცველი მათე ცინცაძე კი - წელიწადნახევრიანი პაუზის შემდეგ...

არის პირველი ქულა!

პირველ ორ ტურში "კოლხეთმა" ისეთი ცუდი შთაბეჭდილება დატოვა, ლამის წინასწარ "გამოვაცხადეთ" რანგით ქვედა ლიგაში დაქვეითებულად! და აი, გუნდში მომხდარმა გარკვეულმა საკადრო ცვლილებებმაც სასურველი შედეგი მოიტანა: დროებითი თავკაცის, ნუგზარ თვარაძის დამოძღვრილმა "კოლხეთმა" ქულა მოიპოვა "სიონთან" მატჩში; არადა, ამ წყვილის ფავორიტად ხომ ყველა ბოლნისურ გუნდს მიიჩნევდა...

"კოლხეთს" მომდევნო ტურში ახალი მწვრთნელი უხელმძღვანელებს, მანამდე კი ფოთელთა გუნდის ახალწვეული მეკარე უნდა შევაქოთ: 26 წლის უკრაინელმა ანდრეი პოლტავცევმა საიმედოდ ითამაშა და თავის ახალ ქართულ გუნდს (შარშან, "გურიაში" გამოდიოდა) პირველი ქულის მოპოვებაში დიდად დაეხმარა.

დამსახურებული ლიდერი

ეროვნულ ლიგას მართლაც დამსახურებული ლიდერი ჰყავს: ერთადერთი მხოლოდ "საბურთალოა", სამივე მატჩი რომ მოიგო, თანაც, გიორგი ჭიაბრიშვილის გუნდი, სხვებთან შედარებით, ყველაზე ხარისხიან ფეხბურთსაც თამაშობს! ცალკე საუბრის თემაა აშკარად სწორად წარმართული სატრანსფერო კამპანია:

სეზონის დაწყების წინ "საბურთალომ", ფაქტობრივად, ყველა რგოლში დაიმატა აშკარად "ხარისხიანი" ახალწვეულები და გუნდშიც, დღესდღეობით, ფაქტობრივად, ორი თანაბარი სიძლიერის შემადგენლობაა!

ასეთი კონკურენციის პირობებში კი უკვე მეტოქეებისათვის არის გამოცანა, თუ "საბურთალოს" რომელი ფეხბურთელებისაგან უნდა ელოდნენ საფრთხეს. ამის დასტურად ის ფაქტიც გამოდგება, რომ განვლილ სამ ტურში "საბურთალოს" უკვე შვიდმა ფეხბურთელმა მოახერხა გოლის გატანა...

III ტურის სიმბოლური ნაკრები

ყოველდღიური სპორტული გაზეთი "ლელო"
1487
მკითხველის კომენტარები / 0 /
მსგავსი ამბები
რუბრიკის სხვა სიახლეები
;